ពលកម្មកុមារ និងកុមារបោះបង់ការសិក្សាដោយសារបំណុលគ្រឹះស្ថានមីក្រូហិរញ្ញវត្ថុ ឬធនាគារ គឺកើតឡើងញឹកញាប់ខ្លាំង ។ ប្រមាណជា ៣%នៃប្រជាពលរដ្ឋតាមខ្នងផ្ទះ បានឱ្យកូនបោះបង់ការសិក្សា ដោយសារតែកម្ចីមីក្រូហិរញ្ញវត្ថុ ឬធនាគារ ដោយកុមារជាច្រើនត្រូវទៅធ្វើការជួយរកប្រាក់ ដើម្បីបង់សងកម្ចីទាំងនោះវិញ ។ នេះបើតាមរបាយការណ៍របស់អង្គការសមធម៌កម្ពុជា និងអង្គការសម្ព័ន្ធខ្មែរជំរឿន និងការពារសិទ្ធិមនុស្ស (លីកាដូ) ដែលបានចេញផ្សាយនៅខែសីហា ឆ្នាំ២០២៣នេះ។ លោក គីម ចាន់ចាវ រាយការណ៍
របាយការណ៍មួយស្ដីពី ហានិភ័យនៃបំណុល របស់អង្គការទាំងពីរបានសិក្សាស្រាវជ្រាវបែបបរិមាណនៃអ្នកជាប់ជំពាក់កម្ចីខ្នាតតូច នៅខេត្តកំពង់ស្ពឺ បង្ហាញពីការរកឃើញនៅក្នុងការស្ទង់មតិមួយទៅលើប្រជាពលរដ្ឋចំនួន ៧១៧ខ្នងផ្ទះ។ ការសិក្សាស្រាវជ្រាវនេះ បង្ហាញថា ការរីករាលដាលនៃភាពជំពាក់បំណុលច្រើនលើសលប់ បាននាំឱ្យមានការរំលោភសិទ្ធិមនុស្សធ្ងន់ធ្ងរជាច្រើន រួមមានភាពអត់ឃ្លាន ពលកម្មកុមារ និងការលក់ដីដោយបង្ខំជាដើម នៅទូទាំងខេត្តកំពង់ស្ពឺ ។
អ្នកនាង ពីឡូក ណាលី នាយិកាទទួលបន្ទុកកិច្ចការក្រៅតំបន់នៃអង្គការលីកាដូ បានមានប្រសាសន៍ថា “ការស្រាវជ្រាវនេះ ផ្ដល់នូវភស្តុតាងបន្ថែមទៀតថា ការរំលោភសិទ្ធិមនុស្សគឺ កំពុងកើតឡើងជាញឹកញាប់ និងជាលក្ខណៈប្រព័ន្ធនៅក្នុងវិស័យឥណទានខ្នាតតូច នៅកម្ពុជា”។ អ្នកនាងបន្ថែមថា “ប្រជាពលរដ្ឋអ្នកខ្ចីប្រាក់ ពុំមានពេលវេលាសម្រាប់ការពន្យារពេលទៀតនោះទេ ។ ពួកគេ ត្រូវការការអនុគ្រោះបំណុលបន្ទាន់ សម្រាប់អ្នកជាប់ជំពាក់បំណុលច្រើនលើសលប់ជាងគេ ដើម្បីទប់ស្កាត់វិបត្តិសិទ្ធិមនុស្សនេះ កុំឱ្យធ្ងន់ធ្ងរបន្ថែមទៀត”។
យោងតាមការសិក្សាខាងលើ ប្រជាពលរដ្ឋអ្នកខ្ចីកំពុងបង្កើនការយកកម្ចីថ្មី ដើម្បីទៅសងកម្ចីចាស់ ។ ក្នុងឆ្នាំ២០១២ កម្ចីត្រឹមតែ ៣,៤៥% ប៉ុណ្ណោះ ដែលត្រូវបានយកទៅសងកម្ចីដែលមានស្រាប់ ។ ប៉ុន្តែ តួលេខនៃកម្ចីប្រភេទនេះ បានកើនឡើងដល់ ៣៤,៨% នៅក្នុងឆ្នាំ២០២២ ។ អ្នកខ្ចីប្រាក់ភាគច្រើនគឺជាប់ជំពាក់បំណុលច្រើនលើសលប់ ដោយអ្នកខ្ចីប្រាក់ជាង២/៣ “យល់ស្របទាំងស្រុង” ឬ “យល់ស្រប” ថា គ្រួសាររបស់ពួកគេជំពាក់បំណុលច្រើនពេក ហើយអ្នកខ្ចីជាង ២៧% កំពុងចំណាយប្រាក់ចំណូលរបស់ពួកគេជាង ៧០% លើការបង់សងបំណុល ជារៀងរាល់ខែ ។
ការសិក្សានេះឱ្យដឹងទៀតថា ប្រជាពលរដ្ឋតាមខ្នងផ្ទះជាង ៩២% ត្រូវបានតម្រូវឱ្យដាក់ប័ណ្ណកម្មសិទ្ធិដីធ្លីយ៉ាងតិចមួយ ដើម្បីវាយតម្លៃពីកម្ចីឥណទានខ្នាតតូចមួយ ។ ប្រជាពលរដ្ឋតាមខ្នងផ្ទះ ៦,១% បានលក់ដីដើម្បីសងបំណុល ។ គ្រប់គ្រឹះស្ថានមីក្រូហិរញ្ញវត្ថុ ឬធនាគារ ដែលកាន់កាប់កម្ចីច្រើនជាង ១% នៅក្នុងការស្ទង់មតិនេះ គឺមានជាប់ពាក់ព័ន្ធនឹងការលក់ដីដោយសារបំណុល យ៉ាងតិចមួយករណី ។ អ្នកផ្ដល់បទសម្ភាសន៍ ជិត ១/៥ (១៨,៣%) បរិភោគអាហារតិចជាងមុន ក្រោយពេលយកកម្ចីពីគ្រឹស្ថានមីក្រូហិរញ្ញវត្ថុ ឬធនាគារ៕
