តាមសេចក្តីរាយការណ៍របស់មន្រ្តីលីប៊ីបានឱ្យដឹងថា រាប់គិតចាប់ពីថ្ងៃអាទិត្យ ទី១០ ខែកញ្ញានេះ ប្រជាជនលីប៊ីជាង៥,០០០នាក់ បានបាត់បង់ជីវិត ខណៈមនុស្សជិត ១០,០០០នាក់ផ្សេងទៀតបានបាត់ខ្លួននៅក្នុងហេតុការណ៍ជំនន់ទឹកភ្លៀងនៅភាគឦសាននៃប្រទេសលីប៊ី។ លើសពីនេះ ជំនន់ទឹកភ្លៀងនេះបានបំផ្លាញហេដ្ឋារចនាសម្ព័ន្ធ ផ្ទះសម្បែងប្រជាពលរដ្ឋ អគារតូចធំ និងធ្វើឱ្យខូចខាតទំនប់វារីអគ្គិសនីស្ទើរតែទាំងស្រុង។
យ៉ាងហោចណាស់មនុស្សចំនួន ៥៣០០នាក់បានស្លាប់ ខណៈមនុស្សចំនួន ៨០០០នាក់បានបាត់ខ្លួននៅក្នុងហេតុការណ៍ជំនន់ទឹកភ្លៀងលិចលង់ទីក្រុង Derna នៃប្រទេសលីប៊ី។ នេះបើយោងទៅតាមក្រសួងមហាផ្ទៃនៃរដ្ឋាភិបាលភាគខាងកើតនៃប្រទេសលីប៊ីកាលពីថ្ងៃអង្គារ ទី១២ ខែកញ្ញានេះ។
តួយ៉ាង ជំនន់ទឹកភ្លៀងនេះ គឺជាគ្រោះមហន្តរាយបរិស្ថានដ៏ធ្ងន់ធ្ងរបំផុតមួយក្នុងប្រវត្តិសាស្ត្រនៃសតវត្សថ្មីរបស់ប្រទេសលីប៊ី។ ប្រទេសលីប៊ីបានឆ្លងកាត់នូវសង្រ្គាមជាច្រើនឆ្នាំ និងដោយសារការខ្វះខាតរដ្ឋាភិបាលកណ្តាលផងនោះ បានធ្វើឱ្យប្រទេសទាំងមូលងាយរងគ្រោះនឹងបញ្ហាគ្រោះធម្មជាតិយ៉ាងខ្លាំង។ គួរបញ្ជាក់ដែរថា បច្ចុប្បន្នប្រទេសលីប៊ីជាប្រទេសតែមួយគត់ដែលមិនទាន់បង្កើតយុទ្ធសាស្ត្រអាកាសធាតុ ដើម្បីការពារពីបញ្ហាដែលបង្កឡើងពីគ្រោះធម្មជាតិជាយថាហេតុ។ នេះបើតាមអង្គការសហប្រជាជាតិបានចុះផ្សាយ។
អ្នកនាំពាក្យសេវាសង្គ្រោះបន្ទាន់ លោក Osama Aly បានប្រាប់សារព័ត៌មាន CNN ថា មន្ទីរពេទ្យនៅទីក្រុង Derna នៃប្រទេសលីប៊ី មិនអាចដំណើរការបានទៀតនោះទេនៅពេល ដ្បិតគ្រែដាក់អ្នកជំងឺក៏ពេញ ហើយកន្លែងបញ្ចុះសាកសពក៏ពេញផងដែរ។ លោកបានបញ្ជាក់ទៀតថា សាកសពមួយចំនួនត្រូវបានទុកចោលនៅខាងក្រៅកន្លែងបញ្ចុះសព ឬខ្លះទុកនៅលើចិញ្ចើមផ្លូវក៏មាន។
ចំណែកឯ សាច់ញាតិរបស់ជនរងគ្រោះក្នុងហេតុការណ៍នេះបានឱ្យដឹងថា ពួកគេមានការភ័យខ្លាចជាខ្លាំង បន្ទាប់ពីបានឃើញវីដេអូនៃជំនន់ទឹកភ្លៀងហូរទៅបំផ្លាញ និងលិចលង់មនុស្សម្នា បណ្តាហេដ្ឋារចនាសម្ព័ន្ធ ដួលរលំអគារតូចធំនៅក្នុងទីក្រុង Derna នៃប្រទេសលីប៊ី។
អ្នកស្រី Ayah ជាស្ត្រីជនជាតិប៉ាឡេស្ទីនដែលមានបងប្អូនជីដូនមួយនៅទីក្រុង Derna នេះបាននិយាយថាអ្នកស្រីមិនអាចធ្វើដំណើរទៅរកពួកគេភ្លាមៗបានឡើយ ក៏ព្រោះតែទឹកជំនន់បន្តជនលិច និងមានសភាពខ្លាំងគួរជាក្តីបារម្ភ។ អ្នកស្រីបានសម្តែងក្តីកង្វក់នឹកនាបងប្អូនជីដូនមួយ ដែលហាក់ទាក់ទងមិនបាន ក្រោយផ្ទុះហេតុការណ៍គ្រោះទឹកជំនន់នេះ។ អ្នកស្រីបានបន្តនិយាយថា មិនដឹងថាសាច់ញាតិរបស់អ្នកស្រីនៅរស់ ឬស្លាប់នៅឡើយទេ ដោយសារតែអ្នកស្រីទាក់ទងមិនចូល។
ក្រៅពីនេះ ព្យុះជំនន់ទឹកភ្លៀងនេះបានសម្លាប់មនុស្សយ៉ាងហោចណាស់ ២៧ នាក់ ដែលជាជនជាតិរបស់ប្រទេសក្រិក ប៊ុលហ្គារី និងតួកគីជាដើម។ នៅក្នុងនោះ មន្ត្រីនៅក្នុងទីក្រុង Tobruk ភាគឦសាននៃប្រទេសលីប៊ីបាននិយាយកាលពីថ្ងៃអង្គារ ទី១២ ខែកញ្ញាថា ក្នុងចំណោមចំនួននៃអ្នកស្លាប់នៅក្នុងហេតុការណ៍គ្រោះទឹកជំនន់នេះ មានយ៉ាងហោចណាស់មនុស្សជាង ១៤៥ នាក់ជាជនជាតិអេហ្ស៊ីប៕
ប្រភព៖ CNN ចុះថ្ងៃពុធ ទី១៣ ខែកញ្ញា ឆ្នាំ២០២៣