ភ្នំពេញ៖ លោក ហ៊ុន ម៉ាណែត កូនប្រុសច្បងរបស់សម្តេច ហ៊ុន សែន បានសរសេរនៅលើទំព័រហ្វេសប៊ុករបស់លោក នៅថ្ងៃទី ០៦ ខែកញ្ញា ឆ្នាំ២០១៦នេះថា ការចុះផ្សាយព័ត៌មានមួយចំនួនពាក់ព័ន្ធនឹងករណីបណ្តឹងរបស់លោក មាជ សុវណ្ណារ៉ា ដែលថាលោកចាញ់ក្តីដើមបណ្ដឹងគឺជាការបំផ្លើសការពិត។
មេបញ្ជាការរងកងទ័ពជើងគោក និងជានាយករងសេនាធិការចម្រុះនៃកងយោធពលខេមរភូមិន្ទរូបនេះ ត្រូវបានប្ដឹងដោយគ្រួសាររបស់លោក មាជ សុវណ្ណារ៉ា នៅរដ្ឋកាលីហ្វញ៉ា សហរដ្ឋអាមេរិក ករណីហិង្សា កាលពីឆ្នាំ ២០១៤ និងករណីចោទថា បណ្ដោយឱ្យអង្គរក្សរបស់លោកវាយជនជាតិអាមេរិក ឈ្មោះ ផល ហេ ឱ្យរងរបួស។
លោក ហ៊ុន ម៉ាណែត បានសរសេរនៅលើហ្វេសប៊ុកលោកនៅថ្ងៃទី ៦ កញ្ញានេះថា លោក Morton Sklar ដែលជាមេធាវីតំណាងឱ្យដើមបណ្តឹងបានធ្វើសេចក្តីប្រកាសព័ត៌មានបំផ្លើសមួយចំនួន និងរហូតដល់មានបុគ្គលមួយចំនួនបានផ្សាយព័ត៌មានថា តុលាការបានកាត់សេចក្តីឱ្យរូបលោកចាញ់ក្តី។ លោកថាទង្វើនេះគឺជាការបំភ័ន្តសាធារណមតិដែលជាការបំផ្លើសការពិត ធ្វើឱ្យសាធារណជនមានការយល់ច្រឡំចំពោះដំណើរការនៃនីតិវិធីតុលាការ។
លោក ហ៊ុន ម៉ាណែត គូសបញ្ជាក់ថា ករណីនេះមេធាវីរបស់លោក គឺលោក John Purcell និងអ្នកជំនាញច្បាប់អាមេរិក លោក Christopher Beres បានធ្វើការបកស្រាយយ៉ាងច្បាស់នៅក្នុងបទសម្ភាសន៍ជាមួយនឹងសារព័ត៌មានខ្មែរថាមស៍(Khmer Times) ថា៖ "លោក Sklar ដែលជាមេធាវីរបស់ដើមបណ្តឹង បានអះអាងបំផ្លើសការពិត និងបំភ័ន្តសាធារណមតិពាក់ព័ន្ធនឹងសេចក្តីសម្រេចរបស់តុលាការ និងដំណើរការនីតិវិធីនៅតុលាការ" ។
តាមលោក ហ៊ុន ម៉ាណែត លោក Beres បានបន្ថែមទៀតថា៖ «ដើមបណ្តឹងមិនទាន់ឈ្នះក្តីនៅឡើយទេ។ ដើមបណ្តឹងបានអះអាងទៅតុលាការអាមេរិកថា ដើមបណ្តឹងមិនមានអង្គហេតុណាដើម្បីបញ្ជាក់ថា តុលាការមានសមត្ថកិច្ចឡើយ។ ដូច្នេះសួរថាតើមេធាវីរបស់ដើមបណ្តឹងនេះអាចដាក់ពាក្យបណ្តឹងដោយឆន្ទៈសុច្ចរិតដោយរបៀបណា ប្រសិនគ្មានអង្គហេតុណាមួយដែលបញ្ជាក់ថាតុលាការមានសមត្ថកិច្ចផងនោះ។ មកដល់ពេលនេះ ដើមបណ្តឹងមិនបានបង្ហាញ អង្គហេតុណាមួយទៅតុលាការសហរដ្ឋអាមេរិក ដើម្បីអាចតម្រូវឱ្យ លោក ហ៊ុន ម៉ាណែត ត្រូវចូលខ្លួនទៅតុលាការដើម្បីឆ្លើយតបទៅនឹងបណ្តឹងដែលបានដាក់នោះ"។
លោក ហ៊ុន ម៉ាណែត បញ្ជក់ទៀតថា ការធ្វើសេចក្តីប្រកាសព័ត៌មានរបស់មេធាវី Morton Sklar និងបុគ្គលមួយចំនួនថា តុលាការរដ្ឋកាលីហ្វញ៉ាបានកាត់ក្តីឱ្យរូបលោកចាញ់កាលពីថ្ងៃទី០១ ខែកញ្ញា ឆ្នាំ២០១៦ គឺជាការបំផ្លើសការពិត ពីព្រោះថា តុលាការពុំទាន់សម្រេចទទួលយកបណ្តឹងនេះមកដំណើរការបន្តនៅឡើយទេ។ លោកថា រឿងក្តីនេះគឺស្ថិតត្រឹមដំណាក់កាលនៃការទាមទារព័ត៌មានបន្ថែម ដើម្បីកំណត់សមត្ថកិច្ចតុលាការក្នុងការជំនុំជម្រះក្តីតែប៉ុណ្ណោះ៕
