ភ្នំពេញ៖ លោក ជាម យៀប ប្រធានគណៈកម្មការទី២ គឺគណៈកម្មការសេដ្ឋកិច្ច ហិរញ្ញវត្ថុ ធនាគារនិងសវនកម្ម នៃរដ្ឋសភា បានស្នើទៅកាន់ប្រតិភូសហភាពអឺរ៉ុបចំនួន បីចំណុចដើម្បីពង្រឹកប្រសិទ្ធិភាពការងារ។
ចំណុចទាំង៣នេះ រួមមាន ទី១ ស្នើឱ្យពង្រឹង និងពង្រីកនូវទីផ្សាររបស់កម្ពុជានៅសហភាពអឺរ៉ុប ដើម្បីបង្កភាពងាយស្រួលក្នុងការនាំចូលអង្ករដែលមានរសជាតិឆ្ងាញ់ និងគ្មានជាតិគីមី។ ទី២. ស្នើឱ្យបើកទូលាយបន្ថែមទៀតនូវទីផ្សារនាំចូលសម្លៀកបំពាក់ និងស្បែកជើង ទៅទីផ្សារអឺរ៉ុប និងបន្តផ្តល់ជំនួយផ្នែកហិរញ្ញវត្ថុ និងបច្ចេកទេស និងទី៣. ជួយផ្សព្វផ្សាយទៅកាន់វិនិយោគិននៅអឺរ៉ុប ឱ្យមកវិនិយោគនៅកម្ពុជា កាន់តែច្រើន។
ការស្នើ នេះធ្វើឡើងបន្ទាប់ពីបញ្ចប់កិច្ចពិភាក្សា រវាងគណៈកម្មការទី២រដ្ឋសភា និងតំណាងសហភាពអឺរ៉ុប នៅវិមានរដ្ឋសភានាព្រឹកថ្ងៃទី ២៨កក្កដា២០១៦នេះ។
ជាមួយនឹងការស្នើនេះ លោក ជាម យៀប បានឱ្យដឹងផងដែរថា កម្ពុជានឹងបើកជើងមេឃឱ្យបានទូលាយ ដើម្បីឱ្យអ្នកទេសចរណ៍របស់សហគមន៍អឺរ៉ុប ចូលមកកម្ពុជា ឱ្យបានកាន់តែច្រើន។
លោក ជាម យៀប បានអះអាងថា តំណាងសហភាពអឺរ៉ុបដែលបានមកប្រជុំនៅព្រឹកនេះ បានសន្យាថា នឹងពាំនាំសំណើរទាំងអស់ ទៅប្រាប់ដល់សហគមន៍អឺរ៉ុប។
យ៉ាងណាមិញ នៅព្រឹកមិញនេះដែរ លោក ជាម យៀប បានបញ្ជាក់ថា តំណាងសហគមន៍អឺរ៉ុបមិនបានលើកឡើង អំពីការកាត់ជំនួយ និងកាត់បន្ថយទីផ្សារនាំចេញសំលៀកបំពាក់នោះទេ។
សូមជម្រាបថា កិច្ចពិភាក្សានេះដែរ ក៏មានតំណាងរាស្ត្ររបស់គណបក្សសង្គ្រោះជាតិ ដែលជាសមាជិករបស់គណៈកម្មការទី២ ចំនួន២រូបក៏ចូលរួមផងដែរ៕
