ភ្នំពេញ៖ ក្រសួងធនធានទឹក និងឧតុនិយមបានចេញសេចក្ដីជូនដំណឹងមួយស្ដីអំពីអាកាសធាតុ នៃប្រទេសកម្ពុជាដើម្បីឲ្យប្រជាពលរដ្ឋត្រៀមលក្ខណៈប្រុងប្រយ័ត្នពីផលប៉ះពាល ដោយបាតុភូតខ្យល់មូសុងនីរតី ដែលនឹងបកមកប៉ះប្រទេសកម្ពុជាចាប់ពីថ្ងៃទី ១៩ ដល់ ថ្ងៃទី ២៥ ខែ កក្កដា ឆ្នាំ ២០១៦ នេះ។
សេចក្ដីជូនដំណឹងរបស់ក្រសួងធនធានទឹក និងឧតុនិយមដែលចេញនៅថ្ងៃ អង្គារិ៍ ទី ១៩ ខែ កក្កដា នេះបានឲ្យដឹងថា ចាប់ពីពេលនេះ តទៅប្រទេសកម្ពុជានឹងទទួលរងឥទ្ធិពលខ្យល់មូសុងនិរតីខ្សោយ និងជ្រលងសម្ពាធទាបជាបន្ដបន្ទាប់រហូតដល់ថ្ងៃទី ២៥ កក្កដា ខាងមុខនេះ។
សេចក្ដីជូនដំណឹងដដែលបញ្ជាក់ថា តំបន់មួយចំនួនក្នុងប្រទេសកម្ពុជាមានដូចជា តំបន់មាត់សមុទ្រ អាចមានភ្លៀងធ្លាក់ពីតិចទៅបង្គួរ ចំណែកតំបន់វាលទំនាប និងតំបន់ខ្ពង់រាប អាចនឹងមានភ្លៀងធ្លាក់ពីមធ្យមទៅបង្គួរ ដែលនឹងបង្កជាបាតុភូតរន្ទះ និង ខ្យល់កន្ដ្រាក់ ពិសេសពេលមេឃរកកលចង់ភ្លៀង។
ក្រសួងបានអំពាវនាវដល់ប្រជាពលរដ្ឋខ្មែរគ្រប់រូប ដែលរស់នៅតាមតំបន់ខាងលើ ត្រូវបង្កើនការប្រុងប្រយ័ត្នឲ្យបានខ្ពស់ ដោយកុំធ្វើដំណើរខណៈដែលមេឃកំពុងតែរកកលចង់ចង្អុរភ្លៀង ព្រោះខ្លាចបង្កឲ្យមានគ្រោះថ្នាក់ជាយថាហេតុណាមួយ ៕