នៅព្រឹកថ្ងៃសុក្រ ទី០៦ ខែមិថុនា ឆ្នាំ២០២៥នេះ និស្សិត និងប្រជាជនថៃជាច្រើននាក់បានឈរតវ៉ានៅខាងក្រៅស្ថានទូតកម្ពុជាប្រចាំទីក្រុងបាងកកប្រទេសថៃ ទាមទារប្រឆាំងនឹងនាយករដ្ឋមន្រ្តីកម្ពុជា និងគាំទ្រយ៉ាងពេញទំហឹងលើយោធាថៃក្នុងការការពារទឹកដី។ នេះបើយោងតាមសារព័ត៌មាន The Nation Thailand។ ក្នុងហេតុការណ៍នេះដែរ នាយករដ្ឋមន្រ្តីថៃថា យោធាថៃបានត្រៀមខ្លួនជាស្រេចសម្រាប់ប្រតិបត្តិការយោធាកម្រិតខ្ពស់ ក្នុងករណីដែលចាំបាច់ត្រូវតតាំងប្រឆាំងនឹងការរំលោភលើអធិបតេយ្យភាពនៅច្រកព្រំដែនថៃ-កម្ពុជា។
(កញ្ញា កែវ សុជាតា រាយការណ៍)
យោងតាមការចុះផ្សាយរបស់ The Nation Thailand អ្នកដឹកនាំបាតុកម្មនៅក្នុងជំនួបមុនស្ថានទូតកម្ពុជាប្រចាំទីក្រុងបាំងកកនាព្រឹកថ្ងៃទី៦ ខែមិថុនានេះ គឺលោក Phichit Chaimongkol និង លោក Nasser Yeema បានអានសេចក្តីថ្លែងការណ៍តវ៉ាប្រឆាំងនឹងសម្តេច ហ៊ុន ម៉ាណែត នាយករដ្ឋមន្រ្តីកម្ពុជា ដោយចោទប្រកាន់សម្តេចថាមានចេតនាបង្កភាពតានតឹង និងរឹតបន្តឹងទំនាក់ទំនងរវាងប្រទេសទាំងពីរ។ បាតុករទាំងនេះបានថ្កោលទោសយ៉ាងខ្លាំងចំពោះជំហររបស់សម្តេច ហ៊ុន ម៉ាណែត ក្នុងការស្នើឱ្យមានកិច្ចចរចានៅថ្ងៃទី១៤ ខែមិថុនាខាងមុខនេះ និងការទាមទារឱ្យភាគីថៃដាក់តំបន់ជម្លោះព្រំដែនឡើងទៅតុលាការអន្តរជាតិដើម្បីដោះស្រាយតាមសន្តិវិធី។
តាមប្រភពព័ត៌មាន The Nation Thailand ដដែល បាតុករថៃដែលឈរតវ៉ានៅខាងមុខស្ថានទូត ព្យាយាមយកសេចក្តីថ្លែងការណ៍រួមនេះយកឱ្យភាគីកម្ពុជាពិចារណា ក៏ប៉ុន្តែពុំមានតំណាងណាម្នាក់ចេញមកទទួលលិខិតនោះឡើយ។ តែដោយសារក្តីខឹងសម្បារនិងចង់ឱ្យកម្ពុជាបានឃើញ ក្រុមនេះបានបិទសេចក្តីថ្លែងការណ៍របស់ខ្លួននៅនឹងរបាំងការពារសុវត្ថិភាពរបស់ស្ថានទូត។ ជាមួយគ្នានេះដែរ តំណាងបាតុករថៃបានសង្កត់ធ្ងន់ថា ពួកគេនឹងមិនអនុញ្ញាតឱ្យអធិបតេយ្យភាពរបស់ប្រទេសថៃត្រូវបានសម្របសម្រួលដោយភាគីកម្ពុជាក្នុងកាលៈទេសៈណាឡើយ ហើយពួកគេប្តេជ្ញាគាំទ្រយោធាថៃយ៉ាងពេញទំហឹងក្នុងការការពារប្រទេសជាតិ ពិសេសនៅតាមបណ្តោយច្រកព្រំដែនកម្ពុជា-ថៃ។
ជុំវិញករណីជម្លោះព្រំដែនកម្ពុជា-ថៃនេះ នាយករដ្ឋមន្រ្តីថៃ លោកស្រី Paetongtarn Shinawatra បានលើកឡើងថា ទាំងភាគីថៃនិងកម្ពុជាបានពិភាក្សាគ្នារួចរាល់ហើយទៅលើបញ្ហាព្រំដែន និងស្ថានភាពទាំងមូលកំពុងមានស្ថេរភាព។ ក៏ប៉ុន្តែចំពោះបញ្ហារសើបមួយចំនួន លោកស្រីសុំមិននិយាយលម្អិត ដ្បិតការចរចាកំពុងតែបន្តធ្វើឡើងដូចជាករណីដែលរាយការណ៍ថាកម្ពុជាបានលុកលុយចូលទឹកដីថៃចម្ងាយ ២០០ម៉ែត្រជាដើម។ លោកស្រីថ្លែងបែបនេះបន្ទាប់ពីបញ្ចប់កិច្ចប្រជុំក្រុមប្រឹក្សាសន្តិសុខជាតិ (NSC) ដើម្បីដោះស្រាយបញ្ហាព្រំដែនកម្ពុជា-ថៃ នៅថ្ងៃសុក្រ ទី៦ ខែមិថុនា ឆ្នាំ២០២៥។
យ៉ាងណា លោកស្រីបញ្ជាក់ថា យោធាថៃបានត្រៀមខ្លួនរួចជាស្រេចដើម្បីការពារអធិបតេយ្យភាពរបស់ប្រទេស។ បើយោងតាមកាសែតបាំងកកប៉ុស្តិ៍ចុះផ្សាយនៅថ្ងៃទី៦ ខែមិថុនា ឆ្នាំ២០២៥ កងទ័ពថៃបានរាយការណ៍ថា ប្រតិបត្តិការរបស់អង្គភាពនៅតាមព្រំដែនបានធ្វើឡើងយ៉ាងប្រុងប្រយ័ត្ន ស្ងប់ស្ងាត់ មានស្ថេរភាពធម្មតា និងផ្អែកលើការយល់ដឹងអំពីស្ថានភាព ដើម្បីការពារទុកជាមុន ប៉ុន្តែទន្ទឹមនឹងនោះ ពួកគេក៏កំពុងត្រៀមខ្លួនការពារអធិបតេយ្យភាពរបស់ប្រទេសឱ្យអស់ពីលទ្ធភាព ប្រសិនបើស្ថានការណ៍ផ្ទុះឡើងជាភាពអវិជ្ជមានភ្លាមៗ។ ភាគីពាក់ព័ន្ធទាំងអស់ មិនថាទាំងយោធា និងរដ្ឋាភិបាលថៃនោះទេ កំពុងធ្វើការយ៉ាងជិតស្និទ្ធជាមួយគ្នា ដោយលោកស្រីនាយករដ្ឋមន្រ្តីថៃអះអាងថា ភាគីទាំងពីរមិនមានជម្លោះជាមួយគ្នាដូចការដែលប្រជាជនថៃយល់ច្រឡំនោះទេ។ លោកស្រីថា ខាងយោធានិងរដ្ឋាភិបាលដឹងពីទំនួលខុសត្រូវរៀងៗខ្លួន និងរក្សាការសម្របសម្រួលដ៏ល្អ។ ជាងនេះ លោកស្រីបានមានប្រសាសន៍ថា យោធាក៏បានអះអាងជាថ្មីនូវការប្តេជ្ញាចិត្តរបស់ខ្លួនក្នុងការកំណត់ការប្រើប្រាស់កម្លាំង និងជៀសវាងការប៉ះទង្គិចគ្នាដោយហិង្សា ដែលជាជំហរដែលរដ្ឋាភិបាលគាំទ្រយ៉ាងពេញទំហឹង។
ដោយឡែក រាជរដ្ឋាភិបាលកម្ពុជាបាននិយាយក្នុងសប្តាហ៍នេះថា ខ្លួនប្តេជ្ញាចំពោះសន្តិភាព និងមានផែនការដោះស្រាយបញ្ហាព្រំដែនកម្ពុជា-ថៃ ដោយបញ្ជូនវិវាទនៅតំបន់បួនទីតាំងទៅតុលាការអន្តជាតិទីក្រុងឡាអេ ICJ និងបានស្នើឱ្យប្រទេសថៃសហការ។ ចំពោះប្រទេសថៃវិញ ថាខ្លួនមិនទទួលស្គាល់យុត្តាធិការរបស់តុលាការនោះទេ៕
