ភ្នំពេញ៖ខណៈការបោះឆ្នោតក្រុមប្រឹក្សាឃុំ-សង្កាត់ កាន់តែខិតជិតមកដល់ អង្គការមួយចំនួនដែលធ្វើការពាក់ព័ន្ធនិងយុវជន និងមន្ត្រីរបស់រដ្ឋាភិបាល បានអំពាវនាវឱ្យក្រុមយុវជនគោរពក្រមសីលធម៌របស់ខ្លួនឱ្យបានខ្ជាប់ខ្ជួន ជៀសវាងផុងខ្លួនកាន់តែជ្រៅក្នុងរឿងនយោបាយដែលអាចបង្ករឱ្យមានអំពើហិង្សាណាមួយកើតទ្បើងដោយការងុបងល់រឿងនយោបាយហួសហេតុ។
ការថ្លែងនេះធ្វើទ្បើងក្រោយកិច្ចសន្ទនាយុវជនស្តីពីសន្តិសុខសម្រាប់យុវជនក្នុងការចូលរួមការបោះឆ្នោតក្រុមប្រឹក្សាឃុំ-សង្កាត់ ឆ្នាំ២០១៧ ព្រឹកថ្ងៃទី ១៦ ខែកុម្ភៈ។ «យុវជនមិនត្រូវផុងខ្លួនជ្រៅជ្រុលនិងងុបងល់ក្នុងរឿងនយោបាយពេកនោះទេ។» នេះគឺជាសារក្រើនរំលឹករបស់ក្រុមអង្គការសង្គមស៊ីវិលនិងមន្ត្រីរដ្ឋាភិបាលដែលធ្វើការទាក់ទងជាមួយក្រុមយុវជន។ ការដាស់តឿនធ្វើឡើងខណៈការបោះឆ្នោតក្រុមប្រឹក្សាឃុំ-សង្កាត់ កាន់តែខិតជិតមកដល់។ ការបោះឆ្នោតដែលគ្រោងធ្វើនៅថ្ងៃទី៤ ខែមិថុនា ខាងមុខនេះ។
លោក យង់ គិមអេង ប្រធានក្រុមប្រឹក្សាភិបាលសម្ព័ន្ធយុវជនដើម្បីឯកភាពនិងអភិវឌ្ឍន៍ មានប្រសាសន៍នៅក្នុងកិច្ចសន្ទនាយុវជនស្តីពីសន្តិសុខសម្រាប់យុវជនក្នុងការចូលរួមការបោះឆ្នោតក្រុមប្រឹក្សាឃុំ-សង្កាត់ ឆ្នាំ២០១៧ នៅថ្ងៃនេះថាយុវជនកម្ពុជានាពេលបច្ចុប្បន្នហ៊ានចូលរួមជជែកដេញដោលរឿងនយោបាយ។ ហើយយុវជនក៏ជាអតិថិជនដ៏មានសក្តានុពលនៃទំនិញនយោបាយផងដែរ។ ប៉ុន្តែលោកយង់ គឹមអេង រំលឹកថា យុវជនក៏មិនត្រូវផ្កាប់មុខរឿងនយោបាយជ្រុលហួសហេតុនោះទេ។ ដោយហេតុថា ការងុបងល់ផ្កាប់មុខក្នុងរឿងនយោបាយអាចនឹងនាំឲ្យមានគ្រោះថ្នាក់ដល់ខ្លួន។ «អ្វីដែលជាការព្រួយបារម្ភធ្វើយ៉ាងណាថា យុវជនយើងត្រូវគោរពនូវសីលធម៌ទោះបីអ្នកដែលមាននិន្នាការនយោបាយខុសគ្នាគឺជាខ្មែរដូចតែគ្នាអញ្ចឹងទេគឺត្រូវតែមានការគោរពគ្នាទៅវិញទៅមកកុំប្រើប្រាស់ពាក្យសំដីកំហឹងដាក់គ្នារវាងបក្សមួយទៅបក្សមួយទៀត»។
អនុប្រធាននាយកដ្ឋានកិច្ចការរដ្ឋបាល ក្រុង ស្រុក ឃុំ សង្កាត់ នៃក្រសួងមហាផ្ទៃលោក មិន ស៊ីថា ទទួលស្គាល់ថា ការចូលរួមរបស់យុវជនក្នុងរឿងនយោបាយពិតជាមានសារៈសំខាន់ក្នុងការអភិវឌ្ឍន៍ប្រទេសជាតិ។ ទន្ទឹមនឹងនេះលោករំលឹកថា យុវជនមិនត្រូវចាញ់បោកបុគ្គលណាមួយដែលអូសទាញពួកគេឱ្យប្រព្រឹត្តិអំពើខុសច្បាប់ដែលនាំឱ្យពួកគេរងគ្រោះនោះទេ។ «យុវជនយើងត្រូវគិតឱ្យបានច្បាស់លាស់ ឱ្យបានវែងឆ្ងាយកុំចាញ់បោកគេ ការចាញ់បោកនេះវាមានរូបភាពច្រើនណាស់ដែលយើងត្រូវគិតត្រូវដឹងមុននឹងជឿយើងត្រូវគិតវិភាគខ្លួនយើងថាគួរតែវាអញ្ចឹងឬក៏មិនគួរវាពិតអញ្ចឹងកើត ទ្បើងទេឬក៏មិនពិត យុវជនត្រូវគិត សង្ឃឹមថាថ្ងៃមុខទៀតយុវជនយើងទាំងអស់ចូលរួមអភិវឌ្ឍន៍ជាតិ ប្រសើរជាងការចាញ់បោករឿងដែលមិនត្រឹមត្រូវ»។
ចំនួនយុវជនដែលមានសិទ្ធិបោះឆ្នោតមានចំនួនកាន់តែច្រើនក្នុងរយៈពេលប៉ុន្មានឆ្នាំនេះ។ តាមតួលេខចុងក្រោយរបស់គណកម្មាធិការរៀបចំការបោះឆ្នោតយុវជនដែលបានចុះឈ្មោះបោះឆ្នោតមានចំនួនជាង១,៦លាននាក់។
លោក ធួន មុន្នី ជានិស្សិតបញ្ចប់ថ្នាក់បរិញ្ញាបត្រនៅសាកលវិទ្យាល័យភូមិន្ទភ្នំពេញ សម្តែងការព្រួយបារម្ភថាសេរីភាព ពីការបញ្ចេញមតិរបស់យុវជននៅលើបណ្តាញសង្គមពាក់ព័ន្ធរឿងនយោបាយ ជាពិសេសរឿងការបោះឆ្នោតដែលអាចទទួលរងសម្ពាធពីអ្នកនយោបាយដែលមានអំណាច។ យុវជនរូបនេះលើកទ្បើងដែរថា សន្ទុះការចូលរួមរបស់យុវជនក្នុងវិស័យនយោបាយពិតជាមានការកើនទ្បើង ហើយយុវជនមួយចំនួនទទួលរងគ្រោះដោយសារនយោបាយផងដែរ។ «ខ្ញុំអំពាវនាវឱ្យយុវជនមេត្តាចូលរួមសកម្មភាពនយោបាយដោយប្រកាន់ភ្ជាប់នូវគោលការណ៍អហិង្សា ហើយប្រកាន់ភ្ជាប់នូវការទំនាក់ទំនងល្អក្រមសីលធម៌ក៏ដូចជាកុំមានគំនិតរើសអើងប្រកាន់បក្សពួកនិន្នាការនយោបាយនៅក្នុងសង្គម»។
យ៉ាងហោចណាស់មានយុវជនមួយរូបឈ្មោះ គង់ រ៉ៃយ៉ា បានក្លាយជាអ្នកទោស ដោយសារតែយុវជនរូបនេះ បានបង្ហោះសារជាសាធារណៈលើទំព័រហ្វេសប៊ុករបស់ខ្លួនថា នឹងធ្វើបដិវត្តន៍ពណ៌ដើម្បីផ្លាស់ប្តូររបបនៅកម្ពុជា។ ក្រៅពីនោះមានយុវជនមួយចំនួនទៀតបានរងគ្រោះក្នុងការប៉ះទង្គិចដោយសារការប្រកាន់និន្នាការនយោបាយផ្សេងៗគ្នា៕
