ស៊ូ ចូវ៖ ប្រធាននាយកដ្ឋានផ្នែកព័ត៌មានប្រចាំទីក្រុង ស៊ូចូវ(Xuzhou) នៃប្រទេសចិន បានលើកឡើងថា កម្ពុជាជាប្រទេសដែលមានប្រវត្ដិសាស្ដ្រយូរអង្វែងមកហើយ។ លោកថា មិនតែប៉ុ ណ្ណោះកម្ពុជា ជាប្រទេសដែលមានទំនាក់ទំនងល្អជាមួយបណ្ដាប្រទេសជិតទៀតផង។ ការថ្លែងដូចនេះធ្វើឡើងនៅក្នុងពិធីសំណេះសំណាលជាមួយអ្នកសារព័ត៌មានដែលទៅពីប្រទេសកម្ពុជា នៅព្រឹកថ្ងៃទី ០៤ ខែ វិច្ឆិកា ឆ្នាំ ២០១៦។
អ្នកសារព័ត៌មានប្រមាណ ១២នាក់ ទៅពីស្ថាប័នខុសៗគ្នា ក្នុងប្រទេសកម្ពុជាបានជួបសំណេះសំណាលជាមួយគណៈប្រតិភូប្រចាំក្រុង ស៊ូចូវ នៃប្រទេសចិន ក្នុងគោលបំណងដើម្បីផ្សាភ្ជាប់ទំនាក់ទំនងល្អរវាងរដ្ឋាភិបាលកម្ពុជា និងរដ្ឋាភិបាលចិនឲ្យកាន់តែមានភាពល្អប្រសើរឡើង។
ប្រធាននាកដ្ឋានផ្នែកព័ត៌មានប្រចាំទីក្រុង ស៊ូចូវ លោក (ហ្វឹង ហ្សឺពូ) Feng Qipu បានថ្លែងប្រាប់ក្រុមអ្នកសារព័ត៌មានកម្ពុជាតាមរយៈអ្នកបកប្រែថា ប្រទេសចិនជាដៃគូល្អមួយជាមួយប្រទេសកម្ពុជាជាយូមកហើយ។ លោក (ហ្វឹង ហ្សឺពូ) Feng Qipu បន្ដថា កម្ពុជាគឺជាប្រទេសដែលមានប្រវត្ដិសាស្ដ្រ វប្បធម៌ល្អ និងមានទំនាក់ទំនងល្អជាមួយប្រទេសជិតខាង។
លោកថា ប្រទេសចិន និងប្រទេសកម្ពុជាគឺមិនអាចឃ្លាងឆ្ងាយពីគ្នាបាននោះទេ គឺមានន័យថា ប្រទេសទាំងពីមានកម្រិតទំនាក់ទំនងល្អជាមួយគ្នាទៅវិញទៅមកមិនអាចខ្វះគ្នាបានឡើយ។
សូមជម្រាបថា ទីក្រុង ស៊ូចូវ ជាទីក្រុងមួយដែលមានអាយុចំណាស់ជាងគេនៅក្នុងខេត្ដ ជាំង ស៊ូ ដែលមានផ្ទៃដីសរុបប្រមាណ ១០០០ គីឡូម៉ែត្រការ៉េ មានប្រជាជនសរុបប្រមាណជាង ៥ពាន់ម៉ឺននាក់ ចំណែក GDP ប្រជាជនមានប្រមាណជាង ៥ពាន់ដុល្លា ក្នុងមួយឆ្នាំ។ បន្ថែមពីនេះអ្វីដែលធ្វើឲ្យទីក្រុង ស៊ូចូវ មានការរីកចម្រើនគឺព្រោះតែទីក្រុងនេះសម្បូរទៅដោយឧស្សាហកម្មដែលធ្វើឲ្យប្រជាជនមានជីវភាពល្អប្រសើរ។
ទីក្រុង ស៊ូចូវ ចែកជា ៣ស្រុក និង ២ឃុំ ហើយទីក្រុនេះ គឺមានប្រវត្ដិសាស្ដ្រជាង ៥ពាន់ឆ្នាំមកហើយ ដែលហុំព័ទ្ធដោយខេត្ដចំនួន ០៤។ ទីក្រុង ស៊ូចូវ ជាចំណុចកណ្ដាលនៃខេត្ដ ជាំងស៊ូ ដែលមានប្រព័ន្ធហេដ្ឋារចនាសម្ព័ន្ធគ្រប់ផ្លូវទាំងអស់នៅក្នុងប្រទេសចិន ដែលធ្វើឲ្យមានភាពងាយស្រួលក្នុងការធ្វើដំណើរតាមរយៈរថភ្លើងល្បើនលឿន ឬតាមរយៈយន្ដហោះជាដើម៕
