សេអ៊ូល៖លោកស្រី ប៉ាក គុនហេ ប្រធានាធិបតី ដែលត្រូវបានតុលាការរដ្ឋធម្មនុញ្ញបង្គាប់ឲ្យចាកចេពីតំណែង បានចាកចេញពីវិមានប្រធានាធិបតីហើយ កាលពីយប់ថ្ងៃអាទិត្យ ទី១២ មីនា ដោយលោកស្រីមានភាពតក់ស្លុត និងសម្រក់ទឹកភ្នែក ហើយពោលពាក្យចុងក្រោយសុំទោសជនរួមជាតិដែលលោកស្រីមិនអាចបំពេញកាតព្វកិច្ចជាប្រធានាធិបតីបានល្អ។
លោកស្រី ប៉ាក ត្រូវបានគេរាយការណ៍មកថា បានទៅដល់លំនៅឋានរបស់លោកស្រីវិញហើយ ដែលស្ថិតនៅភាគខាងត្បូងនៃទីក្រុង សេអ៊ូល ដែលនៅពេលនោះមានអ្នកគាំទ្រលោកស្រីបានទៅទទួលលោកស្រីរាប់ពាន់នាក់ ដែលគេម្នាក់ៗបង្ហាញភាពក្ដុកក្ដួលក្នុងអារម្មណ៍ក្រៃលែង ដោយសារតែខកចិត្ដចំពោះលោកស្រី ដែលជាប់រឿងក្ដីអំពើសូកប៉ាន់នឹងបំពានអំណាចរដ្ឋ។
នៅក្នុងសេចក្ដីថ្លែងការណ៍របស់លោកស្រី ប៉ាក គុនហេ ដែលសរសេរយ៉ាងខ្លីបំផុត បានរៀបរាប់ថា ៖«ទោះបីគេនាំខ្ញុំចេញក៏ដោយតែខ្ញុំជឿងថា សច្ចធម៌នឹងប្រគល់ឲ្យខ្ញុំវិញ។ តែយ៉ាងណា ខ្ញុំសូមអភ័យ ទោសបងប្អូន ដែលគាំទ្រខ្ញុំ ហើយខ្ញុំមិនអាចបំពេញកាតព្វកិច្ចជាប្រធានាធិបតីបានទៀត។»
លោកស្រី ប៉ាក គុនហេ បានបាត់បង់អភ័យឯកសិទ្ធិជាប្រធានាធិបតីទៅហើយ គឺដោយសារតែលោក ស្រីត្រូវបានចោទជាផ្លូវការ ពីបទល្មើសចំនួន បី គឺការចាប់ជំរិត ការទទួលប្រាក់សំណូក និង បំពានអំណាចរដ្ឋ។ អ្វីដែលនាំឲ្យស្រី ប៉ាក មានរឿងអាស្រូវដូចនេះ ដោយសារតែស្ដ្រីម្នាក់ដែលជាមិត្ដភត្ដិជិតស្និទរបស់លោកស្រី គឺលោកស្រី ឆយ ស៊ុនស៊ីល បានប្រើប្រាស់តួនាទីរបស់លោកស្រី ប៉ាក ដើម្បីអង្គាសប្រាក់មូលនិធិមនុស្សធម៌ហើយប្រព្រឹត្ដអំពើពុករលួយ។
ក្នុងសំណុំរឿងនេះនាំឲ្យប្រធានក្រុមហ៊ុន Samsung ម្នាក់ត្រូវបានចាប់ខ្លួនពីបទផ្ដល់ប្រាក់សំណូកឲ្យលោកស្រី ឆយ ស៊ុនស៊ីល។ ប្រទេសកូរ៉េខាងត្បូងនឹងរៀបចំការបោះឆ្នោតជ្រើសរើសប្រធានាធិបតីជំនួសលោកស្រី ប៉ាក គុនហេ នៅថ្ងៃទី០៩ ឧសភា៕ ប្រភព BBC
