ភ្នំពេញ៖ នៅថ្ងៃព្រហស្បត្តិ៍នេះ មន្ត្រីជាន់ខ្ពស់សមាគមអាដហុក ២ រូប គឺលោកស្រី លឹម មុនី និងលោក យី សុខ សាន ត្រូវបាននាំខ្លួនមកសាកសួរបន្ថែមនៅសាលាដំបូងរាជធានីភ្នំពេញ ក្នុងសំនុំរឿងសូកប៉ានសាក្សី ខណៈនាង ខុម ចាន់តារ៉ាទី ក៏បានមកកាន់តុលាការនៅថ្ងៃនេះដែរ។ មន្ត្រីសមាគមអាដហុកទាំងនេះ បានសុំឲ្យចៅក្រមស៊ើប សួរនៃសាលាដំបូងរាជធានីភ្នំពេញ ហៅនាង ខុម ចាន់តារ៉ាទី ចូលបំភ្លឺទល់មុខគ្នាចំពោះតុលាការ។ ស្របពេលជាមួយគ្នានេះនាង ខុម ចាន់តារាទី ហៅស្រីមុំ ក៏ត្រូវហៅចូលខ្លួនមកកាន់តុលាការ ដើម្បីសាកសួរបន្ថែមជុំរឿង សញ្ចាកម្ម ។
លោកស្រី លឹម មុនី មន្ត្រីជាន់ខ្ពស់សមាគមអាដហុក ត្រូវបានដឹកតាមរថយន្ត ម២ នៃពន្ធធានាគារព្រៃស ដាក់រួមគ្នាជាមួយអ្នកទោសផ្សេងទៀតចំនួនពី ទៅបីនាក់ មកកាន់សាលាដំបូងរាជធានីភ្នំពេញ ដើម្បីសាកសួរបន្ថែមជុំវិញសំនុំរឿង នាង ខុមចាន់តារ៉ាទី ហៅស្រី មុំ ពីបទសូកប៉ាន់សាក្សី។
មេធាវីការពារក្តីឲ្យមន្ត្រីអាដហុក គឺលោក ហួន ជុនឌី បានថ្លែងប្រាប់អ្នកសារព័ត៌មានថា កូនក្តីរបស់លោកសុំឲ្យចៅក្រមស៊ើបសួរហៅ នាង ខុម ចានតារ៉ាទី និងសាក្សីផ្សេងទៀតមកសួរទល់មុខគ្នា ប៉ុន្តែមេធាវីថាសំណើរផ្ទាល់មាត់នេះ មិនទាន់មានការឆ្លើយតបពីចៅក្រមស៊ើបសួរនៅឡើយទេ។ លោក ហួន ឈុនឌី៖ «គាត់ក៏ស្នើដែរនៅក្នុងពេលសាក់សួរនោះថា គាត់ស្នើសុំឲ្យមានការសួរតទុលរវាងគាត់(លោកស្រី លឹម មុនី) ជាមួយស្រីមុំ ជាមួយ សាក្ស៊ីមួយចំនួនទៀត។ គាត់(ចៅក្រមស៊ើបសួរ) មិនទានឆ្លើយតបក្នុងពេលនេះទេ ក៏ប៉ុន្តែក្នុងនីតិវិធីកូនក្តីរបស់យើងមានសិទ្ធិធ្វើដូច្នេះ ហើយខ្ញុំជាមេធាវីក៏មានស្នើសុំតុលាការធ្វើការសាក់សួរតទុលគ្នានេះដែរ»។
មេធាវីការពារក្តីឲ្យមន្ត្រីអាដហុក គឺលោក ហួន ជុនឌី ។
លោកមេធាវី ហួន ជុនឌី បានបន្តថា តាមការឆ្លើយបំភ្លឺរបស់កូនក្តីលោកប្រាប់ទៅចៅក្រមស៊ើបសួរបង្ហាញថា គ្មានចំនុចណាមួយជាប់ពាក់ព័ន្ធទៅនឹងបទចោទសូកប៉ានសាក្សីឡើយ។ លោកមេធាវីសង្ឃឹមថា តុលាការនឹងពិចារណាឲ្យកូនក្តីរបស់លោកអាចឲ្យនៅក្រៅឃុំបណ្តោះអាសន្ន។ លោកមេធាវី ហួន ជុនឌី បន្ថែមទៀតថា នៅព្រឹកមិញនេះ កូនក្តីរបស់លោកគឺ លោក ស្រី លឹម មុនី បានបដិសេធថា មិនបានសន្យាធានានាង ខុម ចាន់តារ៉ាទី និងក្រុមគ្រួសារនាងទៅរស់ក្រៅប្រទេសឡើយ។ លោកថាលោកស្រី លឹម មុនី ក៏មិនបានសូកប៉ាន់សាក្សីដែរ ព្រោះថាទឹកប្រាក់ចំនួន ២០៤ ដុល្លារឲ្យស្រីមុំ ជាគោលការណ៍មនុស្សធម៌របស់សមាគមអាដហុកក្នុងការជួយជនរងគ្រោះប៉ុណ្ណោះ។
កាលពីថ្ងៃម្សិលមិញ ចៅក្រមស៊ើបសួរនៃតុលាការដដែរនេះ ក៏បានកោះហៅលោក នី ចរិយា អគ្គលេខា ធិការរងគ.ជ.ប ចូលខ្លួនបំភ្លឺករណីដូចមន្ត្រីសមាគមនអាដហុកផងដែរ។ ប៉ុន្តែលោក នី ចរិយា បដិសេធមិនឆ្លើយនឹងសំណួររបស់ចៅក្រមស៊ើបសួរ ព្រោះតែអវត្តមានមេធាវី។
លោក នី សុខា និងណៃ វង់ដា មន្ត្រីជាន់ខ្ពស់សមាគមអាដហុក ក៏ស្ថិតនៅក្នុងបទចោទដូចអ្នកស្រី លឹម មុនី និងលោក យី សុខសាន ផងដែរ។ តាមបទចោទនេះ បើរកកំហុសឃើញគឺមន្ត្រីសមាគមអាដហុក ៤រូប និងលោក នី ចរិយា អាចនឹងមានទោសពីជាប់ពន្ធនាគារពី ៥ ទៅ ១០ ឆ្នាំ ក្រោមមាត្រា ២៩ និង ៥៤៨ នៃក្រមព្រហ្មទណ្ឌ។ ខណៈចៅកក្រមសាកសួរលោកស្រី លឹម មុនី គឺនាង ខុម ចាន់តារ៉ាទី ហៅស្រី មុំ ក៏បានចូលខ្លួនដែរ ក្នុងសំនុំរបស់នាងដដែល ។
នាង ខុម ចាន់តារ៉ាទី ក៏ត្រូវបានចៅក្រមស៊ើបសួរកោះហៅ ពាក់ព័ន្ធជាមួយ លោក កឹម សុខា ប្រធានស្តីទី គណបក្សសង្គ្រោះជាតិ។ តែក្នុងពេលនេះនាង ខុមចាន់តារ៉ា ត្រូវបានដឹកតាមរថយន្តទំនើប Luxus 470 ពណ៌ស អមដំណើរជាមួយមេធាវីរបស់នាងគឺលោក គឹម វាសនា មកសាលាដំបូងរាជធានីភ្នំពេញនៅម៉ោងប្រមាណ ៩ ព្រឹក ថ្ងៃទី១៦ ខែ មិថុនានេះ។
ក្រោយពីចេញពីបន្ទប់សួរចម្លើយ មេធាវីការពារនាង ខុម ចាន់តារ៉ាទី គឺលោក គឹម វាសនា បានថ្លែងប្រាប់អ្នកសារព័ត៌មានថា ចៅក្រមសាកសួរនាងជុំវិញរឿង សញ្ចាកម្ម ដែលមេធាវីរូបនេះអះអាថា មានជាប់ពាក់ព័ន្ធលោក កឹម សុខា ប្រធានស្តីទីគណបក្សសង្គ្រោះជាតិ និង អ្នកតំណាងរាស្ត្រពីរូបទៀតគឺ លោក តុប វ៉ាន់ចាន់ និង លោក ពិន រតនា។ លោក គឹម វាសនា៖«ការសាក់សួរថ្ងៃនេះជុំបទចោទសញ្ចាកម្មគឺ រឿង លោក កឹម សុខា តុប វ៉ាន់ចាន់ លោក ពិន រតនា ប៉ុណ្ណោះ។ កូនក្តីរបស់ខ្ញុំគឺជាជនរងគ្រោះ»។
លោក សុផាណា បន្តថា ការសាកសួរនេះជាវិធានការមួយដ៏សំខាន់ក្នុងការស្រាវជ្រាវស៊ើបអង្កេតរបស់ព្រះរាជអាជ្ញាក្នុងការបន្តចំណាត់ការរឿងក្តីនេះ។ លោក លី សុផាណា៖«ការសាក់សួរនេះជាវិធានការស្រាវជ្រាវនៅក្នុងការស៊ើបអង្កេតរបស់ព្រះរាជអាជ្ញា ហើយបានផ្តល់នូវប្រយោជន៍យ៉ាងខ្លាំងសម្រាប់បន្តចំណាត់ការរឿងក្តីនេះ»។
សូមជំរាបថា សំនុំរឿងរបស់នាងខុមចាន់តារាទីហៅស្រីមុំ គឺជាករណីរសើបខាងនយោបាយដែលមកដល់ពេលនេះលោក កឹមសុខា ប្រធានស្ដីទីគណបក្សសង្គ្រោះជាតិ ក៏រងការកោះហៅចូលខ្លួនបំភ្លឺដែរគឺករណីសញ្ជារកម្ម ដែលគេថាពាក់ស្នេហាជាមួយនាងស្រីមុំ ៕
