ប្រភព៖ C N A ថ្ងៃទី ១៨ ខែ កក្កដា ឆ្នាំ ២០២៣
បាងកក៖ បេក្ខជននាយករដ្ឋមន្ត្រីថៃ បាននិយាយកាលពីថ្ងៃចន្ទទី១៧ ខែកក្កដាថា លោកកំពុងស្វែងរកការគាំទ្រក្នុងការបោះឆ្នោតនៅសភាម្ដងទៀត បន្ទាប់ពីសមាជិកព្រឹទ្ធសភាដែលតែងតាំងដោយយោធាមិនបានគាំទ្រលោកដើម្បីក្លាយជានាយករដ្ឋមន្រ្តីកាលពីថ្ងៃទី១៣កក្កដាកន្លងទៅ។
កិច្ចខិតខំប្រឹងប្រែងដើម្បីបង្កើតរដ្ឋាភិបាលបានជាប់គាំងដោយសភាមិនបានអនុម័តយល់ព្រមបេក្ខភាព លោក Pita Limjaroenrat ដែលជាប្រធានគណបក្ស Move Forward ឬ MFP។សមាជិកសភាដែលមិនគាំទ្រលោកបានចាត់ទុកគោលនយោបាយរបស់គណបក្ស Move Forward ឬMFPដែលចង់ធ្វើវិសោធនកម្មច្បាប់បរិហារកេរ្តិ៍ព្រះមហាក្សត្រថាជាបន្ទាត់ក្រហម ដែលមិនអាចទទួលយកបាន។
លោក Pita បាននិយាយថា សម្ព័ន្ធគណបក្សទាំងប្រាំបីបានយល់ព្រមតែងតាំងលោកម្តងទៀតសម្រាប់ការបោះឆ្នោតលើកទីពីរនៅថ្ងៃពុធទី១៩ កក្កដា ឆ្នាំ២០២៣។លោក Pita បានបន្ថែមថាលោកកំពុងស្ទាបស្ទង់មតិសមាជិកព្រឹទ្ធសភាដែលបានបោះឆ្នោតបដិសេដបេក្ខភាពរបស់លោកនៅក្នុងជុំទីមួយ។លោក បានប្រាប់អ្នកយកព័ត៌មានថា “យើងកំពុងតែចរចាដើម្បីស្វែងរកការគាំទ្របន្ថែមទៀត”។លោកបានបន្តថា «មានសមាជិកសភាមួយចំនួនខកខានមិនបានទៅបោះឆ្នោតដោយសារមានធុរៈផ្សេងៗ។ «វានៅតែអាចទៅរួចដែលពួកគេអាចនឹងបោះឆ្នោតគាំទ្រ»។
សូមរំលឹកផងដែរថាគណបក្សចលនាឆ្ពោះទៅមុខ MFP បានឈ្នះការបោះឆ្នោតជិត៤០ភាគរយកាលពីខែឧសភា ប៉ុន្តែការប៉ុនប៉ងរបស់លោក Pita ក្នុងការបង្កើតរដ្ឋាភិបាលត្រូវបានរារាំងដោយសមាជិករដ្ឋសភានិងព្រឹទ្ធសភាមួយចំនួន។សមាជិកព្រឹទ្ធសភាដែលតែងតាំងដោយយោធាបានជំទាស់នឹងគោលនយោបាយរបស់គណបក្ស MFP ក្នុងការកែច្បាប់បរិហារកេរ្តិ៍ព្រះមហាក្សត្រ ដែលអ្នកល្មើសច្បាប់នេះអាចជាប់គុករហូតដល់១៥ឆ្នាំ។មានសមាជិកព្រឹទ្ធសភាតែ១៣នាក់ប៉ុណ្ណោះក្នុងចំណោមចំនួន២៥០នាក់បានបោះឆ្នោតគាំទ្រលោក Pita កាលពីសប្តាហ៍មុន។
ជាមួយគ្នានេះផងដែរតុលាការធម្មនុញ្ញថៃក៏អាចបើកសវនការនៅថ្ងៃពុធទី១៩ កក្កដានេះផងដែរ លោកសំនុំរឿងដកអភ័យឯកសិទ្ធិលោកPita ដោយសារការកាន់កាប់ភាគហ៊ុននៅក្នុងក្រុមហ៊ុនប្រព័ន្ធផ្សព្វផ្សាយដែលរដ្ឋធម្មនុញ្ញថៃបានហាមឃាត់សម្រាប់សមាជិកសភា។លោកPita បាននិយាយថាភាគហ៊ុននេះលោកទទួលមរតកពីឪពុករបស់លោក ហើយប្រព័ន្ធផ្សព្វផ្សាយនេះមិនបានដំណើរការតាំងពីឆ្នាំ ២០០៧មកម្ល៉េះ។លោកបាននិយាយកាលពីថ្ងៃចន្ទទី១៧ កក្កដាថាលោកមិនបានបិទបាំងរឿងនេះទេ។លោកបានថ្លែងថា៖ «វាមិនប៉ះពាល់ដល់បេក្ខភាពរបស់ខ្ញុំសម្រាប់តំណែងនាយករដ្ឋមន្ត្រីទេ។
ជាមួយគ្នានេះដែរតុលាការក៏បានទទួលយកសំណុំរឿងចោទប្រកាន់អំពីយុទ្ធនាការឃោសនារបស់គណបក្ស MFPរបស់លោកPita ដែលចង់ធ្វើវិសោធនកម្មច្បាប់បរិហារកេរ្តិ៍ព្រះមហាក្សត្រ គឺស្មើនឹងមានផែនការ “ផ្តួលរំលំ” របបរាជានិយមអាស្រ័យរដ្ឋធម្មនុញ្ញ។ រឿងរ៉ាវនៅក្នុងប្រទេសថៃនេះបានទាក់ទាញការចាប់អារម្មណ៍ពីសហគមន៍អន្តរជាតិរួមទាំងពីទីក្រុងវ៉ាស៊ីនតោនផងដែរ។អ្នកនាំពាក្យក្រសួងការបរទេសអាមេរិកលោក Matthew Miller បានប្រាប់អ្នកយកព័ត៌មានថា “យើងកំពុងឃ្លាំមើលយ៉ាងដិតដល់នូវការវិវឌ្ឍន៍ក្រោយការបោះឆ្នោតនៅប្រទេសថៃ ដោយរាប់បញ្ចូលទាំងការវិវឌ្ឍន៍ថ្មីៗនៅក្នុងប្រព័ន្ធច្បាប់ដែលគួរឱ្យបារម្ភ” ។លោកបានបន្ថែមថា៖ «យើងជឿថាពេលនេះជាឱកាសសម្រាប់ប្រទេសថៃដើម្បីបង្ហាញពីការប្តេជ្ញាចិត្តរបស់ខ្លួនចំពោះលទ្ធិប្រជាធិបតេយ្យ»៕
