ឧត្តមសេនីយ៍ ប្រាយុទ្ធចាន់អូចារ នាយករដ្ឋមន្ត្រីថៃ កាលពីថ្ងៃពុធ ទី១៥ កុម្ភៈ បានអំពាវនាវ ដល់អ្នកវិនិយោគទុនបរទេសឱ្យបង្កើនការដាក់ទុនវិនិយោគច្រើនថែមទៀត នៅប្រទេសថៃ ខណៈលោកថ្លែងអះអាងពីស្ថិរភាពនយោបាយនិងកំណើនសេដ្ឋកិច្ច។
ការថ្លែងរបស់លោក ប្រាយុទ្ធ បានធ្វើឡើងក្នុងកម្មវិធីសិក្ខាសាលាមួយរបស់គណៈកម្មាការវិនិយោគប្រទេសថៃ។ លោកបានថ្លែងទៀតថា រយៈពេល២ឆ្នាំចុងក្រោយនេះ បន្ទាប់ពីរដ្ឋាភិបាលបានធ្វើការកែទម្រង់ការដឹកនាំនិងការកែប្រែច្បាប់មួយចំនួនបាននាំឱ្យស្ថិរភាពសេដ្ឋកិច្ច កាន់តែមានទំនុកចិត្តដល់ការវិនិយោគទុន។ លោកបានបញ្ជាក់ទៀតថា ថៃត្រូវការវិនិយោគទុនថែមទៀតនោះគឺទៅលើវិស័យ បច្ចេកទេស ការអភិវឌ្ឍហេដ្ឋារចនាសម្ព័ន្ធនិងសហគ្រាសនៅតាមជនបទ។
លោក ប្រាយុទ្ធចាន់អូចារ បានឡើងកាន់អំណាចជានាយករដ្ឋមន្ត្រីបច្ចុប្បន្ននេះ តាមរយៈការធ្វើរដ្ឋប្រហារកាលពីខែឧសភា ឆ្នាំ២០១៤ ដោយទម្លាក់រដ្ឋាភិបាលស្របច្បាប់របស់លោកស្រី យីងឡាក់ ស៊ីណាវ៉ាត់ត្រា។
កាលពីថ្ងៃម្សិលមិញ មន្ត្រីជាន់ខ្ពស់អាមេរិកទទួលបន្ទុកកិច្ចការប្រតិបត្តិការលើវិស័យការពារជាតិ បានទៅទស្សនកិច្ចនៅទៅក្រុងបាងកក សំដៅជំរុញឱ្យលោក ប្រាយុទ្ធចាន់អូចារ ស្តារលទ្ធិប្រជាធិបតេយ្យឡើងវិញ តាមរយៈការបោះឆ្នោត ដើម្បីជាទំនុកចិត្តនៃការវិនិយោគទុន អាមេរិក។
ប្រទេសថៃនឹងរៀបចំការបោះឆ្នោតនៅខែកក្កដា ឆ្នាំ២០១៨ ប៉ុន្តែលោកស្រី យីង ឡាក់ មិនមានសិទ្ធិចូលរួមការបោះឆ្នោតទៀតទេ ព្រោះតែលោកស្រីមានទោសដោយសារតែ បណ្តោយឱ្យមានរឿងអាស្រូវអំពើពុករលួយក្នុងគម្រោងទិញស្រូវរបស់រដ្ឋ៕ ប្រភព:The Nation
