ភ្នំពេញ ៖ ប្រធាន មជ្ឈមណ្ឌលសកម្មភាពកម្ចាត់មីនកម្ពុជា កាលពីថ្ងៃទី២៣ ខែកុម្ភៈ ឆ្នាំ២០១៨ បានចុះហត្ថលេខាជាមួយអង្គការ JMAS ដែលជាដៃគូ ទទួលបានជំនួយពីរដ្ឋាភិបាលជប៉ុន នូវទឹកប្រាក់ប្រមាណជាង ៣០ម៉ឺនដុល្លារ ដើម្បីបោសសម្អាតមីន និងគ្រាប់បែកចង្កោម ក្នុងខេត្ដកំពង់ធំ។
លោក លៀ ស៊ីណា រាយការណ៍ ៖
លោក ហេង រតនា ប្រធាន មជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថា ស៊ីម៉ាក់ បានប្រាប់វិទ្យុស្ដ្រី នៅថ្ងៃទី២៧ ខែកុម្ភៈ នេះថា ទឹកប្រាក់ជាង ៣០ម៉ឺនដុល្លារនេះ ស៊ីម៉ាក់នឹងអនុវត្ដការងារបោសម្អាតចម្ការដែលមានគ្រាប់មីន និងគ្រាប់បែកចង្កោម ក្នុងស្រុកចំនួនពីរ នៅខេត្ដកំពង់ធំ ដែលជាតំបន់សម្បូរយុទ្ធភណ្ឌមិនទាន់ផ្ទុះច្រើនជាងគេ។
ប្រធាន មជ្ឈមណ្ឌលសកម្មភាពកម្ចាត់មីនកម្ពុជា បន្ដថា គម្រោងដែលផ្ដល់ការគាំទ្រដោយរដ្ឋាភិបាលជប៉ុននាពេលនេះ គឺមានរយៈពេល ១២ខែ ហើយនឹងត្រូវចាប់ផ្ដើមសកម្មភាពការងារ ពីថ្ងៃទី០១ ខែមីនា ឆ្នាំ២០១៨ ទៅលើផ្ទៃប្រមាណ ៥គីឡូម៉ែត្រក្រឡា។ លោក ហេង រតនា បន្ថែមថា ជំនួយដែលបានផ្ដល់ឲ្យអង្គភាព ស៊ីម៉ាក់ គឺពិតជាចាំបាច់ក្នុងការរំដោះ ផ្ទៃដីដែលមានគ្រាប់មីន និងយុទ្ធភណ្ឌមិនទាន់ផ្ទុះនៅកម្ពុជា។
លោក ហេង រតនា ៖«យើងខ្ញុំសូមថ្លែងអំណរគុណចំពោះរដ្ឋាភិបាល និងប្រជាជនជប៉ុន ហើយជំនួយនេះនៅតែជាការចាំបាច់ក្នុងការរំដោះផ្ទៃដីដែលមានបញ្ហាគ្រាប់មីន និងយុទ្ធភណ្ឌមិនទាន់ផ្ទុះនៅកម្ពុជា ដើម្បីផ្ដល់សុខសុវត្ថិភាពជូនប្រជាជនកម្ពុជា»។
លើសពីនេះលោក ហេង រតនា បញ្ជាក់ថា ក្រោយពីមជ្ឈមណ្ឌលសកម្មភាពកម្ចាត់មីនកម្ពុជាបានខិតខំរំដោះគ្រាប់មីនដែលមានបង្កប់ក្នុងដីរហូតមកដល់ពេលនេះ បានធ្វើឲ្យអត្រាគ្រោះថ្នាក់ និងការភ័យខ្លាចរបស់ប្រជាជន បានថយចុះយ៉ាងច្រើន។
ប្រទេសកម្ពុជា ផ្ទៃដីដែលមានគ្រាប់មីន និងគ្រាប់យុទ្ធភណ្ឌមិនទាន់ផ្ទុះគ្រប់ប្រភេទ មានប្រមាណជិត ២០០០គីឡូម៉ែត្រក្រឡា។
លោក ហេង រតនា អំពាវានាវដល់ប្រជាពលរដ្ឋ នៅពេលដែលបានឃើញ ឬជួបប្រទះគ្រាប់មីន និងគ្រាប់យុទ្ធភណ្ឌមិនទាន់ផ្ទុះ ត្រូវរួសរាន់ផ្ដល់ដំណឹងទៅកាន់អាជ្ញាធរមូលដ្ឋាន ឬក៏កម្លាំងអាជ្ញាធរ ដោះមីន ដែលក្នុងភូមិ ស្រុក។ ប្រជាព លរដ្ឋមួយចំនួននៅតែព្យាយាមឆ្នៃគ្រាប់មីន និងយុទ្ធភណ្ឌមិនទាន់ផ្ទុះ ដើម្បីធ្វើជាប្រយោជន៍ ដែលត្រង់ចំណុចនេះ គឺពិតជាមានគ្រោះណាស់។ ជាក់ស្ដែងកាលពីថ្ងៃទី២២ ខែកុម្ភៈ ឆ្នាំ២០១៨ កន្លងទៅមានករណីផ្ទុះគ្រាប់បែក បានកើតឡើងបណ្ដាលឲ្យបុរសពីរនាក់រងរបួសធ្ងន់ ស្ថិតក្នុងឃុំអរបួន ស្រុកកោះញែក ខេត្ដមណ្ឌលគិរី ព្រោះតែការឆ្នៃគ្រាប់បែកដើម្បីយកទៅបោកត្រី។
រាជរដ្ឋាភិបាលកម្ពុជា បានដាក់ចេញនូវផែនការយុទ្ធសាស្ដ្របោសសម្អាតគ្រាប់មីន ប្រឆាំងមនុស្សឲ្យអស់ត្រឹមឆ្នាំ២០២៥ ដោយសំដៅកាត់បន្ថយឲ្យបានច្រើនបំផុត នូវសំណល់ជាតិផ្ទុះពីសង្គ្រាម ដើម្បីធានានូវសុវត្ថិភាពជូនប្រជាជន និងសង្គមជាតិ។
ក្នុងឆ្នាំ២០១៧ មជ្ឈមណ្ឌលសកម្មភាពកម្ចាត់មីនកម្ពុជា បានបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះនៅលើផ្ទៃដីបានចំនួន ៨៦៣៦ហិចតា ។ ក្នុងនោះ គឺបានកម្ទេចចោលគ្រាប់មីន និងគ្រាប់យុទ្ធភណ្ឌមិនទាន់ផ្ទុះ គ្រប់ប្រភេទបានចំនួន ៣៧៤៤៨គ្រាប់៕
