ភ្នំពេញ៖ សាលាដំបូងរាជធានីភ្នំពេញ នៅថ្ងៃទី ១ ខែ ឧសភា បានសម្រេចចេញដីកាបង្គាប់ឲ្យឃុំខ្លួនបណ្តោះអាសន្នបុរសជនជាតិចិន ៣ នាក់ និងស្ត្រីខ្មែរម្នាក់ នៅពន្ធនាគារព្រៃស ពាក់ព័ន្ធនឹងការនាំស្ត្រីខ្មែរទៅរៀបការនៅប្រទេសចិន។
តុលាការសម្រេចចោទប្រកាន់ពីបទ «ការនាំយកចេញដោយខុសច្បាប់ ដោយមានគោលដៅ» តាមមាត្រា ១០ នៃច្បាប់ស្តីពីអំពើជួញដូរមនុស្ស និងអំពើធ្វើអាជីវកម្មផ្លូវភេទ។
ជនត្រូវចោទជនជាតិចិនទាំងនេះគឺ ឈ្មោះ JI JIAXIN ភេទប្រុស ត្រូវជាប្តីរបសអ្នកស្រី តែម អឿន ជាជនជាតិខ្មែរ និង ឈ្មោះ ZHANG LIANG ភេទប្រុស អាយុ ២៧ឆ្នាំ ហើយនិងឈ្មោះ YAN FAN ភេទប្រុស អាយុ២៨ឆ្នាំ។
ជនជាតិជនចិនទាំងនោះត្រូវបានអាជ្ញាធរមានសមត្ថកិច្ចឃាត់ខ្លួនកាលពីថ្ងៃទី ២៤ ខែ មេសា នៅផ្ទះសំណាក់មួយនៅខណ្ឌមាន ជ័យ រាជធានីភ្នំពេញ។
បើតាមមាត្រា ១០ នៃច្បាប់ស្តីពីអំពើជួញដូរមនុស្ស និងអំពើធ្វើអាជីវកម្មផ្លូវភេទ បានចែងថា ជនណានាំយកជនដទៃចេញដោយមិនស្របច្បាប់ក្នុងគោលដៅស្វែងរកប្រយោជន៍ បំពានខាងផ្លូវភេទ ផលិតរូបភាពអាសអាភាស រៀបអាពាហ៍ពិពាហ៍ផ្ទុយពីឆន្ទះរបស់ជនរងគ្រោះ ស្មុំកូន ឬ ទម្រង់ណាមួយនៃការកេងប្រវ័ញ្ចផ្សេងទៀត ត្រូវផ្តន្ទាទោសដាក់ពន្ធនាគារពី ៧ ឆ្នាំ ទៅ ១៥ ឆ្នាំ ហើយ ដាក់ពន្ធនាគារពី ១៥ ដល់ ២០ ឆ្នាំ ក្នុងករណីជនរងគ្រោះអនីតិជន។
ករណីជួញដូរមនុស្សទៅក្រៅប្រទេស កាលពីថ្ងៃទី២៧ ខែ មីនា ឆ្នាំ ២០១៨នេះ អាជ្ញាធរមានសមត្ថកិច្ចឃាត់ខ្លួននិងបញ្ជូនស្ត្រីម្នាក់ឈ្មោះ វ៉ាន់ ធារី អាយុ៤៥ ឆ្នាំ ទៅតុលាការពាក់ព័ន្ធនឹងការនាំពលករទៅធ្វើការនៅលើទូកនេសាទនៅប្រទេសថៃ និងពលការិនីទៅបម្រើការងារជាជំនួយការមេផ្ទះនៅប្រទេសម៉ាឡេស៊ីចំនួន៩៦នាក់។ ក្នុងនោះសមត្ថកិច្ចម៉ាឡេស៊ីនិងថៃបានអន្តរាគមន៍ជួយសង្គ្រោះនិងបញ្ជូនត្រឡប់មកកម្ពុជាវិញជាបន្តបន្ទាប់សរុប២៧នាក់។
ករណីជួញដូរស្ត្រីយកទៅរៀបការដោយបង្ខំជាមួយបុរសជនជាតិចិន អ្នកស្រី ឆន សុគន្ធា ប្រធានផ្នែកស្រី្តនិងកុមារនៃអង្គការសមាគមការពារសិទ្ធិមនុស្សអាដហុក ឲ្យដឹងថា ចាប់ពីខែ មករា ដល់ ខែ មីនា ឆ្នាំ ២០១៨នេះ អង្គការស្ត្រីទទួលពាក្យបណ្តឹងពីសាច់ញាត្តិជនរងគ្រោះយ៉ាងតិច ១១ ករណី។ក្នុងនោះនារីខ្មែរពីរនាក់ត្រូវបានជួយសង្គ្រោះនិងបញ្ជូនមកប្រទេសកំណើតវិញ។ អ្នកស្រីថា ស្ត្រីខ្មែរភាគច្រើនចាញ់ការអូសទាញ និងលួងលោមពីក្រុមមេខ្យល់យកទៅលក់ ដើម្បីរៀបការជាមួយបុរសជនជាតិចិន។
អ្នកស្រី ឆន សុគន្ធា៖ «ភាគច្រើនគឺមានអ្នកខ្លះពេលមេខ្យល់មកបញ្ចុះបញ្ចូលគឺអត់ប្រាប់គាត់ថាទៅការទេ។គឺទៅប្រទេសផ្សេងដូចជា ទៅកូរ៉េ ម៉ាឡេ ជប៉ុន ហុងកុង ដើម្បីទៅធ្វើការបានប្រាក់ខែច្រើន ប៉ុន្តែពេលគាត់ទៅដល់នោះរូបភាពបុរសជនជាតិមើល ឬទោះបីពេញចិត្ត ឬមិនពេញចិត្តត្រូវតែបង្ខំចិត្តយកបុរសនិង ហើយមានករណីខ្លះទៀតគឺគាត់ដឹង។»
អ្នកស្រីថា ករណីការជួញដូរកម្លាំងពលកម្ម និងជួញដូរមនុស្សទៅក្រៅប្រទេសក្រោមរូបភាពរៀបការដោយបង្ខំក្នុងឆ្នាំ២០១៧ មានចំនួន១៥២ករណី។
អ្នកស្រី ឆន សុគន្ធា អះអាងថា នារីរងគ្រោះខ្មែរភាគច្រើនត្រូវបានបុរសជាប្តីជនជាតិចិនប្រើអំពើហិង្សាវាយដំ បង្ខំផ្លូវភេទ និងលក់បន្តជាដើម។
អ្នកស្រី ឆន សុគន្ធា៖ «បើករណីដែលខ្ញុំទទួលបានគេនៅពេលដែលគាត់ទៅគេមានបង្ខំឲ្យរួមភេទ ហើយអ្នកខ្លះនៅពេលអត់ងាចមានកូនគាត់លក់បន្ត ឬគាត់រស់នៅជាមួយគ្នាអស់ចិត្តគាត់លក់បន្តទៅឲ្យអ្នកផ្សេង ហើយគាត់ប្រើអំពើហិង្សាអញ្ចឹងទៅ។»
លោកវរសេនីយ៍ឯក គឹម ចិន្ដា នាយការិយាល័យឆ្លងដែន នៃនាយកដ្ឋានប្រឆាំងការជួញដូរមនុស្សនៃក្រសួងមហាផ្ទៃមានប្រសាន៍ថា ក្នុងឆ្នាំ២០១៧ រដ្ឋាភិបាលកម្ពុជាបានជួយស្ដ្រីរងគ្រោះពីក្រៅប្រទេសបានចំនួន ២៦២នាក់។ ក្នុងនោះស្ដ្រី ៥៨នាក់ ដែលបានរៀបការជាមួយជនជាតិចិន។ ក៏ប៉ុន្ដែមានតែស្ដ្រី ២៩នាក់តែប៉ុណ្ណោះដែលជាជនរងគ្រោះធ្ងន់ធ្ងរដោយលក់បន្ដពីប្ដីជាជនចិនម្នាក់ ទៅឲ្យបុរសជានជនជាតិចិនម្នាក់ទៀត។
របាយការណ៍របស់ក្រសួងការបរទេសនិងសហប្រតិបត្តិការអន្តរជាតិកាលពីឆ្នាំ២០១៧ ឲ្យដឹងថា ពលករចំណាក់ស្រុកចំនួន ៩៨៦ ត្រូវបានជួយសង្គ្រោះនិងមាតុភូមិនិវត្តន៍ពីប្រទេសថៃ វៀតណាម ឡាវ មីយ៉ាន់ម៉ា ម៉ាឡេស៊ី ឥណ្ឌូនេស៊ី សឹង្ហបុរី ចិន និងជប៉ុន។
ក្នុងចំណោមនោះពលករចំណាក់ស្រុកពីប្រទេសថៃ ២៨៨នាក់ វៀតណាម១៧១នាក់ ៣៨២នាក់ពីប្រទេសម៉ាឡេស៊ី ៤៩នាក់ពីប្រទេសឡាវ ២៣នាក់ពីឥណ្ឌូនេស៊ី ៥៣នាក់ពីប្រទេសចិន ១២នាក់ពីជប៉ុននិង ៣នាក់ពីប្រទេសមីយ៉ាន់ម៉ា។
បើតាមលោកវរសេនីយ៍ឯក គឹម ចិន្ដា ទទួលស្គាល់ថា ការធ្វើចំណាកស្រុកទៅក្រៅប្រទេស ក៏ជារឿងល្អមួយដែរ ដែលអាចរកចំណូលបានច្រើនសម្រាប់គ្រួសារ តែលោកសុំឲ្យប្រជាពលរដ្ឋត្រូវដឹងព័ត៌មានឲ្យបានច្បាប់លាស់ និងកំណត់គោលដៅឲ្យជាក់លាក់ មុនពេលដែលចាកចេញពីកម្ពុជាទៅក្រៅប្រទេស ហើយប្រជាពលរដ្ឋរក្សាលេខទូរស័ព្ទ របស់អាជ្ញាធរកម្ពុជាទុកដើម្បីសុំជំនួយ ដែលមានលេខរបស់អគ្គស្នងការដ្ឋាននគរបាលជាតិ ១១៧ ១១៨ និងលេខរបស់ នាយកដ្ឋានប្រឆាំងការជួញដូរមនុស្ស ១២៨៨ និងលេខមួយខ្សែទៀតដែលជាលេខប្រចាំការ ២៤ម៉ោង លើ ២៤ម៉ោង ០១៧ ៤៤ ៣៥ ៣៦៕
