ក្រុមប្រឹក្សាសន្តិសុខអង្គការសហប្រជាជាតិ បានសម្រេចដាក់ទណ្ឌកម្មបន្ថែមមួយករណីទៀត ប្រឆាំងរបបទីក្រុងព្យុងយ៉ាង ដោយចុះបញ្ជីឈ្មោះនាវាចំនួន ២៧និង ក្រុមហ៊ុនចំនួន២១ នៅក្នុងលក្ខខណ្ឌ នៃការតាមដាន រឹបអូស បើនាវា និងក្រុមហ៊ុនទាំងនោះ បន្តលួចមានទំនាក់ទំនងជាមួយប្រទេសកូរ៉េខាងជើងបន្ដទៀត។
យោងតាមបណ្ដាញផ្សាយព័ត៌មាន BBC សេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ធ្វើឡើងតាមសំណើរបស់អាមេរិកដែលបានស្នើកាលពីខែកុម្ភៈ។ សហរដ្ឋអាមេរិក បានលើកឡើងថា នាវានិងក្រុមហ៊ុនទាំងនេះ បានលួច ដឹងស្បៀងនិង ប្រេងឥន្ធនៈ ចូលទៅប្រទេសកូរ៉េខាងជើង ដែលជាការរំលោភលើសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។
សូមជម្រាបថា នេះជាការដាក់ទណ្ឌកម្មដ៏ធ្ងន់ធ្ងរលើកចុងក្រោយ ប្រឆាំងរបបក្រុងព្យុងយ៉ាង ដែលជាប្រទេស ធ្វើឱ្យពិភពលោកភ័យខ្លាច ដោយសារការបាញ់សាកល្បងអាវុធនុយក្លេអ៊ែរ។ ឯកអគ្គរដ្ឋទូត អាមេរិក ប្រចាំអង្គការសហប្រជាជាតិ លោកស្រី Nikki Haley បាននិយាយថា វិធានការចុងក្រោយនេះ គឺជាការ បញ្ជាក់យ៉ាងច្បាស់ណាស់ថា សហគមន៍អន្តរជាតិ បានរួបរួមគ្នាដាក់សម្ពាធទៅលើរបបក្រុងព្យុងយ៉ាង។
តាម BBC ក្រុមហ៊ុនដែល នៅបន្តលួច មានទំនាក់ទំនង ពាណិជ្ជកម្មជាមួយ កូរ៉េខាងជើង មានក្រុម ហ៊ុន ប្រទេសចិន ក្រុងហុងកុង កោះតៃវ៉ាន់ ប្រទេសប៉ាណាម៉ា និងប្រទេសសិង្ហបុរី៕