លោក រ៉ុង ឈុន ទីប្រឹក្សាគណបក្សកម្លាំងជាតិ ត្រូវសាលាឧទ្ធរណ៍រាជធានីភ្នំពេញ បដិសេធមិនផ្ដល់នីតិសម្បទាឱ្យលោកឡើងវិញ ដើម្បីមានសិទ្ធិធ្វើសកម្មភាពនយោបាយ ក្រោមហេតុផលទីប្រឹក្សារូបនេះ មិនទាន់សងសំណងទៅឱ្យគណៈកម្មាធិការចម្រុះកិច្ចការព្រំដែនរួចរាល់។ លោក គីម ចាន់ចាវ រាយការណ៍
នៅព្រឹកថ្ងៃទី១២ ខែឧសភានេះ សាលាឧទ្ធរណ៍រាជធានីភ្នំពេញ បើកសវនាការលើការស្នើសុំផ្ដល់នីតិសម្បទាលោក រ៉ុង ឈុន។ ក្នុងបន្ទប់សវនាការ ជំនុំជម្រះអស់រយៈពេលជិត ២ម៉ោង លោក យន់ ណារ៉ុង ប្រធានក្រុមប្រឹក្សាជំនុំជម្រះ សម្រេចបដិសេធមិនផ្ដល់នីតិសម្បទាឱ្យទីប្រឹក្សាគណបក្សកម្លាំងជាតិ ដោយសារពាក្យស្នើសុំនីតិសម្បទា ធ្វើឡើងមិនត្រឹមត្រូវ និងរួមផ្សំលោក រ៉ុង ឈុន មិនទាន់សងសំណងខូចខាតនៅឡើយ។
ការស្នើសុំនីតិសម្បទានេះ ធ្វើឡើងដើម្បីលុបចោលទណ្ឌកម្មព្រហ្មទណ្ឌ និងស្តារសិទិ្ធនយោបាយរបស់លោក រ៉ុង ឈុន ពាក់ព័ន្ធនឹងសំណុំរឿងរបស់លោកកាលពីឆ្នាំ២០២១ ត្រូវបានតុលាការផ្តន្ទាទោសពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ដោយដាក់ឱ្យជាប់ពន្ធនាគារចំនួន ១៥ខែ និងបង្គាប់ឱ្យសងជំងឺចិត្តដល់ដើមបណ្តឹងដែលជាគណៈកម្មាធិការកិច្ចការព្រំដែនកម្ពុជា ចំនួន ៤០០លានរៀល ឬប្រមាណជាង ១០ម៉ឺនដុល្លារ។ ការបង់ប្រាក់សំណងប្រមាណ ១០ម៉ឺនដុល្លារនេះ ពាក់ព័ន្ធនឹងសកម្មភាពលោក រ៉ុង ឈុន ចុះទៅកាន់ព្រំដែនកម្ពុជា-វៀតណាម ខេត្តត្បូងឃ្មុំ ដែលពេលនោះលោក ចេញសេចក្តីថ្លែងការណ៍ទៅកាន់សាធារណជនថា ការបោះបង្គោលព្រំដែនថ្មី រវាងកម្ពុជា-វៀតណាម បានចូលដីកម្ពុជាប្រហែល៥០០ម៉ែត្រ។ ក៏ប៉ុន្តែគណៈកម្មាធិការព្រំដែនកម្ពុជាបានចេញមុខទាត់ចោលការលើកឡើងរបស់លោក រ៉ុង ឈុន នាពេលនោះ។
ក្រោយចេញពីបន្ទប់សវនាការ លោក រ៉ុង ឈុន ទីប្រឹក្សាគណបក្សកម្លាំងជាតិ ថ្លែងប្រាប់អ្នកសារព័ត៌មានថា សាលាឧទ្ធរណ៍រាជធានីភ្នំពេញ បដិសេធមិនផ្តល់នីតិសម្បទាដល់រូបលោក ក្រោមហេតុផលថា លោកមិនទាន់បង់ប្រាក់ពិន័យទៅឱ្យគណៈកម្មាធិការចម្រុះកិច្ចការព្រំដែន។ លោកចាត់ទុកហេតុផលបដិសេធនេះ ជាលេសរបស់សាលាឧទ្ធរណ៍ ដើម្បីដោះខ្លួនពីការទទួលខុសត្រូវ ដែលធ្វើឱ្យលោកមិនអាចទទួលបានយុត្តិធម៌ឡើយ។
ទោះបីពេលនេះសាលាឧទ្ធរណ៍រាជធានីភ្នំពេញ បដិសេធការផ្ដល់នីតិសម្បទាក្ដី ប៉ុន្តែនៅចុងឆ្នាំ២០២៦ លោកនឹងទទួលបាននីតិសម្បទាពេញលេញដោយស្វ័យប្រវត្តិ ដើម្បីមានសិទ្ធិសេរីភាពក្នុងការធ្វើសកម្មភាពនយោបាយ។
លោក រ៉ុង ឈុន៖ «ការសម្រេចសេចក្ដីរបស់តុលាការយើងមិនអាចទទួលយកបានទេ ពីព្រោះថាសម្រេចយកអំណះអំណាងបែបអ៊ីចឹងមិនផ្ដល់នីតិសម្បទា វាគ្រាន់តែជាលេស ភាសាដោះសារទេ មិនមែនជាភាសាទទួលខុសត្រូវរឿងសវនាការទេ ហើយបើតុលាការនៅតែប្រកាន់ឥរិយាបទបែបហ្នឹង មិនអាចរកយុត្តិធម៌ជូនពលរដ្ឋបានទេ ពីព្រោះឈរនៅលើជំហរនយោបាយ ច្រើនជាងវិជ្ជាជីវៈរបស់ខ្លួនបាទ!»។
ទីប្រឹក្សាគណបក្សរូបនេះ នឹងមិនរង់ចាំដល់ថ្ងៃទទួលបាននីតិសម្បទាស្វ័យប្រវត្តិឡើយ លោក និងមេធាវី បន្តនីតិវិធីតាមផ្លូវច្បាប់ ដោយប្ដឹងទៅតុលាការកំពូល ដើម្បីស្នើសុំផ្ដល់នីតិសម្បទាឱ្យលោក។
លោក រ៉ុង ឈុន៖ «យើងត្រូវសង្ឃឹមតុលាការនៅស្រុកយើងមាន ៣ថ្នាក់ មានដំបូង មានឧទ្ធរណ៍ និងកំពូល ប៉ុន្តែមានតុលាការមួយថ្នាក់ទៀត គឺតុលាការប្រជាពលរដ្ឋ ថ្វីត្បិតតែតុលាការថ្នាក់ទីមួយទីពីរមិនផ្ដល់យុត្តិធម៌ឱ្យខ្ញុំ។ ខ្ញុំសង្ឃឹមថាថ្ងៃណាមួយតុលាការថ្នាក់ទីបួន ដែលជាតុលាការប្រជាពលរដ្ឋលោកនឹងផ្ដល់យុត្តិធម៌ឱ្យខ្ញុំ ហើយយើងនឹងរុញធ្វើម៉េចឱ្យសង្គមយើងមានយុត្តិធម៌ ហើយប្រជាពលរដ្ឋខ្មែរមិនមានការបែងចែកឋានៈទេស្មើភាពចំពោះមុខច្បាប់ដូចដែលច្បាប់បានកំណត់»។
កាលពីខែមេសាកន្លងទៅនេះ សាលាដំបូងរាជធានីភ្នំពេញ បានបង្គាប់ឱ្យរឹបអូសអចលនវត្ថុរបស់លោក រ៉ុង ឈុន ដើម្បីលក់ឡៃឡុងយកប្រាក់សងការខូចខាតរបស់ដើមបណ្តឹង ដែលជាគណៈកម្មាធិការកិច្ចការព្រំដែនកម្ពុជា។ មុនឈានដល់ការរឹបអូសនេះ កន្លងមក លោក រ៉ុង ឈុន ទទួលបានលុយពីសប្បុរសជនឧបត្ថម្ភជួយលោកជាង ២ម៉ឺនដុល្លារ និងលុយខ្មែរជាង ៧លានរៀល ដើម្បីសងការខូចខាត ប៉ុន្តែទឹកប្រាក់នេះមិនគ្រប់ចំនួន ត្រូវសាលាដំបូងបដិសេធមិនទទួលយក។
ប៉ុន្តែលោក ឃុន លាងម៉េង អ្នកនាំពាក្យសាលាឧទ្ធរណ៍រាជធានីភ្នំពេញ បញ្ជាក់ប្រាប់វិទ្យុស្ដ្រីថា មុនសម្រេចបដិសេធនេះ សាលាឧទ្ធរណ៍ បានធ្វើការដេញដោល និងពិនិត្យឃើញទម្រង់នៃពាក្យស្នើសុំផ្ដល់នីតិសម្បទារបស់លោក រ៉ុង ឈុន មិនត្រឹមត្រូវតាមទម្រង់មាត្រា៥៣៧ នៃក្រមនីតិវិធីព្រហ្មទណ្ឌ ហើយចំណុចមួយទៀត លោក រ៉ុង ឈុន មិនទាន់រួមគ្នាសងសំណងថ្លៃខូចខាតនៅឡើយ។
លោក ឃុន លាងម៉េង៖ «ចៅក្រមប្រឹក្សាគាត់ពិនិត្យឃើញថាពាក្យស្នើសុំរបស់គាត់ហ្នឹងធ្វើឡើងវាអត់ត្រឹមត្រូវតាមទម្រង់ និងចំណុចមួយទៀតដោយសារសមីខ្លួនហ្នឹងអត់ទាន់រួមគ្នាសងសំណងខូចខាត អ៊ីចឹងការស្នើសុំហ្នឹងវាអត់ត្រឹមត្រូវតាមនីតិវិធី»។
វិទ្យុស្ដ្រីព្យាយាមសួរលោក លាងម៉េង ចំពោះការបដិសេធនេះពាក់ព័ន្ធនឹងរឿងនយោបាយច្រើនជាងការអនុវត្តច្បាប់ដូចអ្វីដែលោក រ៉ុង ឈុន លើងឡើងដែរទេ? ប៉ុន្តែអ្នកនាំពាក្យរូបនេះ បដិសេធក្នុងការឆ្លើយតប ដោយប្រាប់ថាខ្លួនរវល់ប្រជុំ។
ជុំវិញរឿងនេះ លោក អំ សំអាត នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្ស លីកាដូ ប្រាប់វិទ្យុស្ដ្រីដែរថា បើមើលទៅតាមនីតិវិធីផ្លូវច្បាប់ ទណ្ឌិតទាំងឡាយណាដែលអនុវត្តទោសរួចរាល់ ទាំងទណ្ឌកម្ម និងសំណង ដូច្នេះពួកគេអាចស្នើសុំតុលាការផ្ដល់នីតិសម្បទា។ ប៉ុន្តែលោកថា ចំពោះករណីលោក រ៉ុង ឈុន សាលាឧទ្ធរណ៍បានលើកហេតុផលថា លោក រ៉ុង ឈុន មិនទាន់អនុវត្តទោសសងសំណងជាង ១០ម៉ឺនដុល្លារទៅឱ្យគណៈកម្មាធិការចម្រុះកិច្ចការព្រំដែនរួចរាល់នៅឡើយ។
លោក អំ សំអាត៖ «លោក រ៉ុង ឈុន ទីមួយគាត់ជាសកម្មជនសង្គម ទីពីរ សកម្មជនសិទ្ធិការងារ ទីបីជាសកម្មជននយោបាយ អ៊ីចឹងគាត់ជាអ្នកនយោបាយគាត់ត្រូវការនីតិសម្បទា ដើម្បីធ្វើនយោបាយ ដើម្បីធ្វើជាមន្ត្រីជាន់ខ្ពស់ ឬក៏មេដឹកនាំគណបក្សនយោបាយ។ នៅពេលដែលគាត់អត់មានការផ្ដល់នីតិសម្បទា បានន័យថាគាត់អត់អាចធ្វើបាន អាហ្នឹងបើយើងនិយាយពីសិទ្ធិវាប៉ះពាល់ដល់សិទ្ធិធ្វើនយោបាយរបស់គាត់បាទ!»។
បច្ចុប្បន្ននេះ លោក រ៉ុង ឈុន ក៏កំពុងជាប់ក្តីក្នុងសំណុំរឿងព្រហ្មទណ្ឌផ្សេងទៀត ដែលសាលាដំបូងរាជធានីភ្នំពេញចោទពីបទ «មិនរាងចាលក្នុងបទមជ្ឈិម» និងបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» កាលពីខែសីហា ឆ្នាំ២០២៤ ពាក់ព័ន្ធទៅនឹងការផ្តល់បទសម្ភាសន៍របស់លោកជាមួយវិទ្យុអាស៊ីសេរី អំពីវត្តមានលោកនាយករដ្ឋមន្ត្រីចុះតាមបន្ទាត់ព្រំដែន ការចុះសួរសុខទុក្ខប្រជាពលរដ្ឋរស់នៅបឹងតាមោក ការចុះជួបប្រជាពលរដ្ឋដែលមានវិវាទដីធ្លីនៅព្រលានយន្តហោះថ្មីក្នុងខេត្តកណ្តាល និងនៅពេលលោកទៅសម្ពោធទីស្នាក់ការគណបក្សនៅស្រុកកោះធំ ខេត្តកណ្តាល។ នៅក្នុងសំណុំរឿង សាលាដំបូងរាជធានីភ្នំពេញ សម្រេចឱ្យលោក រ៉ុង ឈុន ជាប់ពន្ធនាគារចំនួន ៤ឆ្នាំ ពិន័យជាប្រាក់ចំនួន ៤លានរៀល និងបានដកហូតសិទ្ធិបោះឆ្នោត និងឈរឈ្មោះបោះឆ្នោតរបស់លោក រ៉ុង ឈុន ជាអចិន្ត្រៃយ៍៕
អត្ថបទដោយ កញ្ញា ជា សុខនី
