ភ្នំពេញ៖ គណបក្សភ្លើងទៀនកាលពីថ្ងៃទី០៤ ខែមិថុនា ម្សិលមិញបានចេញសេចក្តីថ្លែងការណ៍របស់ខ្លួនដោយចាត់ទុកហេតុការណ៍សមត្ថកិច្ចចាប់ឃាត់ខ្លួនសកម្មជនបក្សភ្លើងទៀនមួយរូប ថាជាទង្វើធ្វើទុក្ខបុកម្នេញផ្នែកនយោបាយ ដែលផ្ទុយពីច្បាប់និងរដ្ឋធម្មនុញ្ញ។ យ៉ាងណា សមត្ថកិច្ចភ្នំពេញបំភ្លឺថា ការឃាត់ខ្លួនសកម្មជនបក្សភ្លើងទៀននេះ គឺអនុវត្តតាមនីតិវិធីច្បាប់ព្រោះមានពាក់ព័ន្ធបទចោទក្លែងបន្លំឯកសារសារធារណៈ។
លោក រឿន សុភាន់ ជូនសេចក្តីរាយការណ៍
បន្ទាប់ពីលោក មឿក ឆាន អនុប្រធានគណៈកម្មាធិការប្រតិបត្តិគណបក្ស ភ្លើងទៀន ខណ្ឌមានជ័យ និងជាចៅសង្កាត់រងទី២ នៃសង្កាត់ស្ទឹងមានជ័យទី ១ ខណ្ឌមានជ័យ រាជធានីភ្នំពេញ រងការចាប់ខ្លួន គណបក្សភ្លើងទៀន តាមរយៈសេចក្តីថ្លែងការណ៍របស់ខ្លួន បានចាត់ទុកថា ជារូបភាពមួយបង្ហាញពីចេត នាធ្វើទុក្ខបុកម្នេញផ្នែកនយោបាយមកលើសមាជិកបក្សរបស់ខ្លួន។
សេចក្តីថ្លែងការណ៍របស់បក្សភ្លើងទៀន បានរំលឹកថា លោក មឿក ឆាន ត្រូវបានសមត្ថកិច្ចប៉ុស្តិ៍នគរបាលរដ្ឋបាល សង្កាត់ស្ទឹងមានជ័យទី ១ ឃាត់ខ្លួន ក្រោយពីបានទៅបំភ្លឺតាមការកោះហៅរបស់សមត្ថកិច្ចកាលពីថ្ងៃទី០៣ ខែមិថុនា ឆ្នាំ២០២៥។
សម្រាប់បក្សប្រឆាំងយល់ថា ការចាប់ឃាត់ខ្លួនសកម្មជនរបស់ខ្លួននេះ បានស្តែងច្បាស់ពីសកម្មភាពគំរាមកំហែង ការធ្វើទុក្ខបុកម្នេញ បង្គប់បំណងរារាំងការធ្វើសកម្មភាពនយោបាយស្របច្បាប់របស់សមាជិកគណបក្សភ្លើងទៀន។
ជាការប្រកាសតបនឹងសកម្មភាពចាប់ខ្លួនសកម្មជននយោបាយខាងលើ គណបក្សភ្លើងទៀន សូមអំពាវនាវដល់អាជ្ញាធរមានសមត្ថកិច្ច ត្រូវដោះលែង លោក មឿក ឆាន រួមទាំងសកម្មជនគណបក្សទាំងអស់ ព្រមទាំងបញ្ឈប់ការធ្វើទុក្ខបុកម្នេញតាមគ្រប់រូបភាព មកលើសកម្មជនគណបក្ស ភ្លើងទៀន តទៅទៀត។
លោក មឿក ឆាន។រូបភាពពីបក្សភ្លើងទាន។
ជាការឆ្លើយតប ចំពោះសេចក្តីថ្លែងការណ៍ខាងលើ ស្នងការដ្ឋាននគរបាលរាជធានីភ្នំពេញបានចេញសេចក្តីបំភ្លឺរបស់ខ្លួនភ្លាមៗដោយបញ្ជាក់ថា ការឈានទៅចាប់ឃាត់ខ្លួនលោក មឿក ឆាន គឺដោយសារសមត្ថកិច្ចទទួលបានចម្លើយសារភាព និងប្រមូលបានភស្តុតាង បញ្ជាក់ថា បុគ្គលខាងលើមានជាប់ពាក់ព័ន្ធនឹងករណីក្លែងបន្លំឯកសារសារធារណៈ ដែលមានឈ្មោះ ឡេង វ៉ាន់ឌី ជាអ្នកប្តឹង។
សមត្ថកិច្ចរាជធានីភ្នំពេញ បញ្ជាក់ភាពស្អាតស្អំថា ខ្លួនអនុវត្តទៅតាមអង្គហេតុ និងអង្គច្បាប់នៃបទល្មើសដែលមានចែងក្នុងក្រមព្រហ្មទណ្ឌ ដោយមិនជាប់ពាក់ព័ន្ធនឹងរឿងនយោបាយ ឬការគាបសង្កត់ បំភិតបំភ័យ និងការធ្វើទុក្ខបុកម្នេញផ្នែកនយោបាយដល់សមាជិកគណបក្សនយោបាយណាមួយឡើយ។
បន្ថែមពីនេះអ្នកនាំពាក្យស្នងការដ្ឋាននគរបាលរាជធានីភ្នំពេញ សុំបដិសេធ និងច្រានចោលទាំងស្រុងរាល់ការចោទប្រកាន់ ទាំងបំពាន ដោយគ្មានមូលដ្ឋានច្បាស់លាស់របស់គណបក្សភ្លើងទៀន។
របាយការណ៍សិទ្ធិមនុស្សប្រចាំឆ្នាំ២០២៣របស់ក្រសួងការបរទេសសហរដ្ឋអាមេរិក ដែលចេញផ្សាយជាសាធារណៈកាលពីខែមេសាឆ្នាំមុនបានបញ្ជាក់ថា ការចាប់ខ្លួនតាមតែអំពើចិត្ត ឬការឃុំខ្លួនដោយបំពានចំពោះអ្នកទោសនយោបាយ បានបន្តកើតឡើងនៅប្រទេសកម្ពុជា។ របាយការណ៍ដដែល បង្ហាញទៀតថា គិតត្រឹមខែតុលាការឆ្នាំ២០២៣ មានការចាប់ខ្លួនតាមតែអំពើចិត្តចំនួន ៤០ករណីទៅសកម្មជននយោបាយ២៨នាក់ ក្នុងនោះមាន១១នាក់ត្រូវបានដកហូតដីធ្លី ហើយម្នាក់ជាសមាជិកសហជីព។
បើតាមរបាយការណ៍ក្រសួងការបរទេសសហរដ្ឋអាមេរិក ដែលផ្អែកតាមទិន្នន័យពីអង្គការក្រៅរដ្ឋាភិបាលនៅកម្ពុជាដែលធ្វើការក្នុងវិស័យសិទ្ធិមនុស្ស បានប៉ាន់ស្មានថា ចំនួននៃការចាប់ខ្លួន និងការឃុំខ្លួនតាមតែអំពើចិត្តមានចំនួនច្រើនជាងនេះ ប៉ុន្តែដោយសារមានការភ័យខ្លាចចំពោះការសងសឹក ជនរងគ្រោះនិងគ្រួសាររបស់ពួកគេពុំហ៊ានរាយការណ៍អំពីឧប្បត្តិហេតុនោះទេ៕
អត្ថបទដោយ រឿន សុភាន់
