ក្រុងភ្នំពេញ៖ សម្តេច ហ៊ុន សែន នាយករដ្ឋមន្ត្រីនៃព្រះរាជាណាចក្រកកម្ពុជាបានលើកឡើងថា ក្រុមហ៊ុនវិនិយោគមកពីក្រៅប្រទេសជាច្រើន បង្ខំចិត្តត្រូវយកបុគ្គលិកមកពីខាងក្រៅ ព្រោះតែធនធានបញ្ញា ចំណេះដឹង ចំណេះធ្វើ របស់បុគ្គលិកកម្ពុជានៅមានកម្រិត។ តែអ្នកស្រាវជ្រាវម្នាក់ ថាមកពី វិស័យអប់រំកម្ពុជានៅមានកម្រិត។
ស្តាប់សំឡេង លោក សេរី វឌ្ឍនៈ ៖
នៅក្នុងឱកាសប្រគល់សញ្ញាប័ត្រ ជូនដល់និស្សិតវិទ្យាស្ថានវ៉ាន់ដា នៅសាលសន្និបាត និង ពិព័ណ៌កោះពេជ្រ នៅព្រឹកថ្ងៃទី ០៣ ខែមេសា ឆ្នាំ២០១៨ នេះ សម្តេច ហ៊ុន សែន បានសរសើរដល់ការខិតខំប្រឹងប្រែងរបស់និស្សិត ដែលបន្តអភិវឌ្ឍន៍សមត្ថភាព រហូតមកដល់ការបញ្ចប់ការសិក្សា។
នៅចំពោះមុខ និស្សិតស្រីប្រុស ជាង ២ពាន់នាក់ សម្តេច ហ៊ុន សែន បានថ្លែងទទួលស្គាល់ថា កម្រិតសមត្ថភាព ចំណេះដឹង ចំណេះធ្វើ និង ធនធានបញ្ញា បុគ្គលិកកម្ពុជានៅមានកម្រិត។ សម្តេច បន្ថែមថា មានពេលខ្លះ ក្រុមហ៊ុនវិនិយោគរបស់បរទេស បានបង្ខំចិត្តយកបុគ្គលិកពីក្រៅប្រទេសព្រោះតែធនធានមនុស្សរបស់កម្ពុជានៅទាបនៅឡើយ។
សំឡេង សម្តេច ហ៊ុន សែន៖
យ៉ាងណាក៏ដោយ សម្តេច បន្ថែមថា កម្ពុជាគួរតែពង្រឹងទៅលើវិស័យអប់រំ ឲ្យបានខ្លាំងជាងនេះ ដើម្បីប្រកួតប្រជែងជាមួយធនធានមនុស្សពីប្រទេសដទៃ។
ខណៈនេះដែរ លោក ឆាំ ប៊ុនថេត អ្នកស្រាវជ្រាវបញ្ហាសង្គមយល់ស្របនឹងការលើកឡើងរបស់សម្តេចហ៊ុនសែន។ លោកថាមានកត្តា២ យ៉ាងដែលធ្វើឲ្យកម្ពុជាមានការខ្វះខាតធនធានមនុស្សគឺ៖
ទី ១ ជនជាតិខ្មែរចូលចិត្តធ្វើការច្រើន ដូចជាគ្រូបង្រៀន មន្រ្តី ឬ ធ្វើការក្នុងការិយាល័យជាជាងធ្វើជំនួញ ឬ រៀនបច្ចេកទេស ផ្សេង។ លោក បង្ហាញថា អាចមកពីកត្តា ចរិករបស់ជនជាតិខ្មែរ ដែលពុំសូវចូលចិត្តរៀនជំនាញណាដែលលំបាក។
ទី ២ គឺបណ្តាលមកពីវិស័យអប់រំរបស់កម្ពុជានៅមានកម្រិត។ លោកបន្ថែម គ្រប់វិស័យដែលពាក់ព័ន្ធ ទៅនិង វិស័យអប់រំ ហាក់ដូចជាធ្វើការនៅមិនទាន់អស់ពីសមត្ថភាព ដែល លោកថានេះ គឺជាកត្តាចំបងដែលកម្ពុជាពុំទាន់មានធនធានមនុស្ស បច្ចេកទេសគ្រប់គ្រាន់ដើម្បីធ្វើការផ្គត់ផ្គង់ នៅក្នុងវិស័យការងារនៅកម្ពុជា។
សំឡេង លោក ឆាំ ប៊ុនថេត៖
យ៉ាងណា លោកក៏បានសរសើរដល់ សិស្ស និស្សិត ជំនាន់ថ្មីថា មានគំនិត ចង់ចេះ ចង់រៀន នូវមុខវិជ្ជាបច្ចេកទេស និង ជំនួញ ដែល លោកថា កម្ពុជា នៅថ្ងៃអនាគត នឹងអាចធ្វើការប្រកួតប្រជែងលើឆាកអន្តរជាតិ ប្រសិនបើកម្ពុជាពង្រឹងទៅលើវិស័អប់រំឲ្យបានខ្លាំង។
គួររំលឹកថា ស្របពេលដែលការលើកឡើងរបស់ប្រមុខរដ្ឋាភិបាលនេះ កម្ពុជាក៏មានពលករពលការិនីមានបច្ចេកទេសច្រើន ដែលភាគច្រើនកំពុងធ្វើការនៅប្រទេសកូរ៉េខាងត្បូង។
តាមរបាយការណ៍របស់ក្រសួងការងារនិងបណ្តុះបណ្តាលវិជ្ជាជិវៈ កម្ពុជាគឺជាប្រទេសដែលជាប់ចំណាត់ថ្នាក់លេខ១ លើគុណភាពពលករដែលធ្វើការនៅក្រៅប្រទេស ក្នុងនោះប្រទេសកូរ៉េខាងត្បូង ពលករពលការិនីខ្មែរមានចំណួន ៦៥០០០ នាក់ ដែលភាគច្រើនសុទ្ធសឹងតែជាអ្នកជំនាញផ្នែកបច្ចេកទេស៕