សាកសពស្ត្រីជនជាតិហ្វីលីពីន ម្នាក់ដែលជាកម្មករបម្រើតាមផ្ទះ នៅប្រទេសគុយវ៉ែត ត្រូវបានបញ្ជូនមកដល់ប្រទេសហ្វីលីពីននៅថ្ងៃសុក្រនេះ។
តាមសារព័ត៌មាន នៃប្រទេស ហ្វីលីពីន ដែលស្រង់មកចុះផ្សាយដោយ ទីភា្នក់ងារសារព័ត៌មាន AFP សាកសពនាង ជូណា ដេម៉ាហ្វីលីស អាយុ ២៩ ឆ្នាំ ត្រូវបានរកឃើញ នៅក្នុងទូទឹកកកនៅផ្ទះមួយក្នុងប្រទេសគុយវ៉ែត។
តាមប្រភពដដែល ម្ចាស់ផ្ទះ នោះគឺប្ដីជាជនជាតិ លីបង់ ហើយប្រពន្ធជាជនជាតិស៊ីរី។
មរណភាពរបស់នាង បាននាំឲ្យការប្រឈមមុខដាក់គ្នាផ្នែកការទូតរវាង ប្រទេសហ្វីលីពីន និង គុយវ៉េតតានតឹងជាខ្លាំង។
រដ្ឋាភិបាលហ្វីលីពីន បាននិយាយថា ពលរដ្ឋរបស់ខ្លួន បានទៅធ្វើការនៅប្រទេសគុយវ៉េត មាន ២៥២ ពាន់នាក់ ដែលភាគច្រើនពួកគេ ជាស្រ្តីបម្រើការងារតាមផ្ទះ។
ប្រធានាធិបតីហ្វីលីពីនកាលពីសប្តាហ៍មុនបានថ្កោលទោសយ៉ាងខ្លាំង ចំពោះការខ្វះវិធានការការពារ របស់អាជ្ញាធរគុយវ៉ែតដែល លោក ឌុយធើទេ បាននិយាយថា ពលរដ្ឋរបស់ខ្លួនធ្វើការនៅប្រទេសគុយវ៉ែត កាន់តែរងការធ្វើទុកបុកម្នេញ ខ្លាំងឡើង។
លោក ក៏បានអំពាវនាវឲ្យពលរដ្ឋហ្វីលីពីន ដែលធ្វើការងារនៅ ប្រទេសគុយវ៉ែតត្រូវរាយការណ៍ទៅកាន់ស្ថានទូតរបស់ខ្លួនស្ថិតនៅក្នុងប្រទេសនេះ បើមានបញ្ហាគ្រោះថ្នាក់ណាមួយកើតឡើងលើពួកគេ៕