ភ្នំពេញ៖ ក្រោយបញ្ចប់ការសាកសួរលើជនជាតិប៉ាគីស្ថាន និងណេប៉ាល់ ៥៧នាក់ ទាក់ទងករណីរត់ប្រសាចចេញពីកាស៊ីណូអូរស្មាន់រីសតស្ថិតក្នុងខេត្តឧត្ដរ មានជ័យកាលពីថ្ងៃទី០៥ ខែមករា ឆ្នាំ២០២៥ រួចមក ស្នងការដ្ឋាននគរបាលខេត្តកាលពីមិ្សលមិញចេញសេចក្តីបំភ្លឺថា បាតុភាពនេះ គឺកើតចេញពីការតវ៉ារឿងក្រុមហ៊ុនពុំបានបើកប្រាក់ខែជូនពួកគេជិត ៣ខែ។
លោក កែវ សុខា ជូនសេចក្តីរាយការណ៍
ជាការកត់សម្គាល់ នៅមុនការបំភ្លឺនេះមានការដាក់ការសង្ស័យថា ហេតុការណ៍នេះជាការព្យាយាមរត់គេចខ្លួនពីការបង្ខាំងខ្លួនដោយខុសច្បាប់ បង្កប់នូវសកម្មភាពឃុំជនបរទេសមិនឲ្យមានសេរីភាព ធ្វើទារុណកម្ម និងជំរិតទារប្រាក់ជាដើម ដ្បិតកន្លងមកនេះ កម្ពុជាមានករណីផ្ទុះឡើងជារឿងរ៉ាវប្រើប្រាស់កម្លាំងពលកម្មបរទេសក្នុងឧក្រិដ្ឋកម្មបោកបញ្ឆោតតាមប្រព័ន្ធអ៊ីនធឺណិត។
តែទោះបីជាបែបនេះក្តី សម្រាប់សមត្ថកិច្ចខេត្តឧត្តរមានជ័យអះអាងតាមរយៈសេចក្តីបំភ្លឺថា ករណីនេះគឺជាការរើបម្រាសចេញតវ៉ារឿងប្រាក់ខែតែប៉ុណ្ណោះ ព្រោះថៅកែក្រុមហ៊ុនពុំបានបើកឱ្យជាង ៣ ខែមកហើយ ពោលគឺជំពាក់តាំងពីជនជាតិប៉ាគីស្ថាន និងណេប៉ាល់ទាំងនេះធ្វើការជានៅខេត្តព្រះសីហនុមកម្លេះ។
លិខិតបំភ្លឹចេញផ្សាយកាលពីថ្ងៃទី០៨ ខែធ្នូ ឆ្នាំ២០២៥។រូបភាពពីហ្វេសប៊ុកស្នងការខេត្តឧត្តរមានជ័យ។
តាមចម្លើយសារភាពពីក្រុមជនជាតិបរទេសខាងលើ គឺពួកគេមិនព្រមសុខចិត្តបន្តធ្វើការងារទៀតនោះទេ ដ្បិតមេការដែលជាជនជាតិចិនបង្ខំឱ្យធ្វើការលើសកម្លាំងពលកម្ម គ្មានថ្ងៃឈប់សម្រាកត្រឹមត្រូវ។ ណាមួយទៀត ការកាន់ដំបងចេញតវ៉ានេះ ក៏ដោយសារតែខឹងសម្បាលរឿងធ្វើការជិត ៣ ខែដោយគ្មានបើកប្រាក់ខែហើយពួកគេបារម្ភខ្លាចចាញ់បោកក្រុមហ៊ុននៅអូរស្មាន់រីសតនេះទៀត។
កំណត់ហេតុសារភាពក្នុងសេចក្តីបំភ្លឺបញ្ជាក់បន្ថែមទៀតថា ក្នុងសកម្មភាពចេញតវ៉ានេះ ពួកគេបានកាន់ដំបងក្នុងគោលបំណងតវ៉ាឲ្យមានពេលឈប់សម្រាកគ្រប់គ្រាន់ ខ្លះចង់បន្តការងារនៅកន្លែងដដែល ខ្លះចង់ទៅធ្វើការនៅក្រុមហ៊ុនក្នុងខេត្តព្រះសីហនុ និងខ្លះទៀតចង់វិលត្រឡប់ទៅប្រទេសកំណើតវិញ។
ក្រោយបញ្ចប់ការសាកសួរទៅលើជនបរទេសទាំង៥៧នាក់នោះរួច ស្នងការនគរបាលខេត្ត បានបញ្ជូនជនជាតិប៉ាគីស្ថានទាំង៥៣នាក់ និងណេប៉ាល់៤នាក់ ទៅស្នាក់ការនៃអគ្គនាយកដ្ឋានអន្តោប្រវេសន៍ប្រចាំខេត្តសៀមរាបដើម្បីបន្តនីតិវិធី។
រូបភាពសកម្មភាពចេញតវ៉ារបស់ជនជាតិប៉ាគីស្ថាន និងណេប៉ាល់។រូបភាពពីបណ្តាញសង្គម។
សូមរំលឹកបន្តិចថា កាលពីខែមិថុនា ឆ្នាំ ២០២៤ ក្រសួងការបរទេសសហរដ្ឋអាមេរិកបានចេញផ្សាយរបាយការណ៍ស្តីពីការជួញដូរមនុស្ស ដោយបង្ហាញថា ប្រទេសកម្ពុជាបន្តស្ថិតនៅក្នុងចំណាត់ថ្នាក់ទាបបំផុត ពាក់ព័ន្ធនឹងការចាត់វិធានការលុបបំបាត់ ឬទប់ស្កាត់ការជួញដូរមនុស្ស។ ជាងនេះប្រតិបត្តិការឆបោកអនឡាញនៅកម្ពុជាគឺស្ថិតក្នុងចំណុចស្នូល ស្របពេលដែលអំពើពុករលួយ និងការពាក់ព័ន្ធរបស់មន្ត្រីរដ្ឋាភិបាលក៏ត្រូវបានដាក់បញ្ចូលក្នុងការវាយតម្លៃមួយនេះ។
ជុំវិញករណីនេះអ្នកឃ្លាំមើលសិទ្ធិមនុស្សថ្លែងប្រាប់អ្នកសារព័ត៌មានដោយជំរុញបន្ថែមឲ្យមានការស៊ើបអង្កេត និងស្នើឲ្យរដ្ឋាភិបាលបង្កើនកិច្ចសហការជាមួយបណ្តាប្រទេសនានា បង្ក្រាបបទល្មើសដែលកើតឡើងក្នុងប្រទេស ជាពិសេសការចាប់ជំរិតតាមអ៊ឺនធឺណិតដើម្បីឲ្យបរទេសហ៊ានមកវិនិយោគនៅកម្ពុជា៕
