អនុប្រធាន មជ្ឃមណ្ឌលជាតិផ្តល់ឈាម កម្ពុជា លោកស្រីវេជ្ជបណ្ឌិត មើក សាមាន បានបញ្ជាក់ថា ការបរិច្ចាគឈាមមិនប៉ះពាល់ដល់សុខភាពនោះទេ ហើយឈាមមានប្រភពតែមួយគត់គឺពីមនុស្ស មិនមានរោងចក្រណា ឬឱសថស្ថានណា អាចផលិតឈាមបានទេ។ លោកស្រីថា ការបរិច្ចាគឈាមមានអត្ថប្រយោជន៍ណាស់សម្រាប់សង្គមជាតិ តាមសាសនា លោកស្រីបានបញ្ជាក់បន្ថែមថា «ការបរិច្ចាគឈាមថែមទាំងមានអត្ថប្រយោជន៍ ៣ សំខាន់គឺអត្ថប្រយោជន៍ផ្ទាល់ខ្លួន កាត់បន្ថយហានិភ័យជំងឺមហារីក កាត់បន្ថយកំហាត់ឈាម ការលើសជាតិដែកដែលប៉ះពាល់ដល់ថ្លើម និងលំពែង ជួយធ្វើឱ្យប្រសើរឡើងនូវសុខភាពបេះដូង កាត់បន្ថយការឡើងទម្ងន់ និងជំងឺដាច់សរសៃឈាមខួរក្បាលទៀតផង»។
កាលពីថ្ងៃទី ២១ ខែមិថុនា ឆ្នាំ២០២៤ កន្លងទៅនេះមានកម្មវិធីមួយឈ្មោះថា កម្មវិធីផ្តល់ឈាមសង្គ្រោះជីវិត “Give Blood, Save Lives” គឺជាកម្មវិធីបរិច្ចាគឈាម ដែលជាការគំនិតផ្តួចផ្តើមដោយក្រុមហ៊ុនជាច្រើនរួមគ្នារួមមាន ក្រុមហ៊ុនឯកជនជាច្រើនសហការជាមួយមជ្ឈមណ្ឌលជាតិផ្តល់ឈាមនៃកម្ពុជា។ វាគឺជាកម្មវិធីសម្រាប់បុគ្គលម្នាក់ៗក្នុងការបរិច្ចាគឈាម និងជាផ្នែកមួយនៃបណ្តាញសង្គ្រោះជីវិតរបស់មនុស្សគ្រប់ៗរូបដែលកំពុងខ្វះខាតឈាម និងត្រូវការឈាមជាចាំបាច់ផងដែរ។ កម្មវិធីមានឆន្ទៈក្នុងការរួមចំណែកដល់សុខុមាលភាពរបស់មនុស្សទូទៅដែលត្រូវការឈាម។ កម្មវិធីផ្តល់ឈាមសង្គ្រោះជីវិត”Give Blood, Save Lives” គឺដើម្បីជួយភ្ជាប់គម្លាតរវាងការផ្គត់ផ្គង់ឈាម និងអ្នកជំងឺដែលត្រូវការឈាមជាបន្ទាន់ ដែលអាចជួយសង្គ្រោះជីវិតពួកគាត់បានតាមរយះការផ្តល់ឈាមនេះ។ ក្នុងការរៀបចំកម្មវិធីនេះ ក៏បានបង្កើតការយល់ដឹងអំពីសារៈសំខាន់នៃការបរិច្ចាគឈាមផងដែរ។
អ្នកស្រី ផាន់ រាសី ជាអ្នកគ្រប់គ្រងទូទៅ នៅក្រុមហ៊ុន អេសភីប៊ីលឌីងមេនិចម៉ិន ជាតំណាងអគារ GIA ហើយក៏ជាផ្នែកមួយនៃគណៈកម្មាធិការក្នុងការរៀបចំកម្មវិធីបរិច្ចាគឈាមក្នុងថ្ងៃនោះ។ អ្នកស្រីបានលើកឡើងថា ក្រុមរបស់អ្នកស្រីបានធ្វើកម្មវិធីនេះឡើង ក្នុងគោលបំណងរួមតែមួយដើម្បីដោះស្រាយបញ្ហាកង្វះខាត នៃការផ្គត់ផ្គង់ឈាមនៅក្នុងមន្ទីរពេទ្យនានា ក៏ដូចជាជួយសង្គ្រោះជីវិតអ្នកជំងឺនៅក្នុងសហគមន៍។ ការបរិច្ចាគឈាមនេះពិតជាមានសារៈសំខាន់ណាស់ ព្រោះអាចជួយសង្រ្គោះជីវិតមនុស្សបាន ហើយថែមទាំងអាចជួយកាត់បន្ថយកូឡេស្តេរ៉ូល និងកាត់បន្ថយជំងឺសម្រាប់ខ្លួនឯងបានទៀតផង។ ហើយក្នុងថ្ងៃនេះអ្នកស្រីក៏បានបរិច្ចាគឈាមផងដែរ បន្ទាប់ពីបរិច្ចាគឈាមរួចអ្នកស្រីមានអារម្មណ៍ជ្រះថ្លានិងសប្បាយចិត្តខ្លាំងណាស់ ពីព្រោះថាអ្នកស្រីបានចូលរួមចំណែកជួយសង្រ្គោះជីវិតមនុស្សបាន និងជួយសង្គមជាតិទាំងមូលផងដែរ។ អ្នកស្រីបានមើលឃើញថាមានមនុស្សចូលរួមបរិច្ចាគបានច្រើននៅក្នុងថ្ងៃនោះ។ អ្នកស្រីមានអារម្មណ៍រំភើបណាស់ដែលបានឃើញអ្នកស្ម័គ្រចិត្តមកបរិច្ចាគឈាមមានចំនួនច្រើនកុះករដូច្នេះ។ អ្នកស្រីបានសំណូមពរថាសម្រាប់អ្នកមិនទាន់បរិច្ចាគឈាម សូមកុំខ្លាចក្នុងការបរិច្ចាគឈាម ព្រោះឈាមរបស់យើងនឹងអាចបង្កើតឡើងវិញបាន តែជីវិតមនុស្សដែលត្រូវការឈាមមិនអាចត្រលប់មកវិញបានទេបើគ្មានឈាមសម្រាប់ជួយសង្រ្គោះទាន់ពេលវេលា។ សម្រាប់អ្នកដែលបានបរិច្ចាគរួចហើយ អ្នកស្រីក៏សូមសំនូមពរឱ្យពួកគាត់បន្តបរិច្ចាគឈាម ជាទៀងទាត់ និង ជំរុញអ្នកជុំវិញខ្លួនគាត់ឱ្យចូលរួមបរិច្ចាគឈាមទាំងអស់គ្នាផងដែរ។
តាមរយៈការបរិច្ចាគឈាមរបស់កម្មវិធីក្នុងថ្ងៃនោះផងដែរ បុគ្គលម្នាក់ៗមិនត្រឹមតែជួយសង្គ្រោះជីវិតមនុស្សបានប៉ុណ្ណោះទេ ប៉ុន្តែថែមទាំងជាមនុស្សដែលមានគំនិតផ្តួចផ្តើមសេចក្ដីថ្លៃថ្នូរ និងប្រកបដោយប្រសិទ្ធិភាព ដែលដើរតួយ៉ាងសំខាន់ក្នុងការជួយសង្គ្រោះជីវិត និងបង្កើតសហគមន៍ដែលមានសុខភាពល្អទៀតផង។
នៅក្នុងកម្មវិធីថ្ងៃនោះដែរ កញ្ញាសុលីតា ជាបុគ្គលិកផ្នែកធនធានមនុស្ស មកពីធនាគាឯកទេសអ៊ីអន។ បានបង្ហាញចំណាប់អារម្មណ៍របស់ខ្លួនថា មូលហេតុដែលកញ្ញាមកបរិច្ចាគឈាមក្នុងថ្ងៃនេះ កាលពីមុនសាច់ញាតិរបស់កញ្ញាបានជួបគ្រោះថ្នាក់ចរាចរណ៍ហើយត្រូវទទួលការបញ្ជូលឈាមជាបន្ទាន់ ទើបធ្វើឱ្យកញ្ញាយល់ថាការផ្តល់ឈាមអាចសង្គ្រោះជីវិតមនុស្សបាន។ វាពិតជាសំខាន់ខ្លាំងណាស់ ក្នុងការបរិច្ចាគឈាមមិនត្រឹមតែអាចជួយដល់ជីវិតអ្នកដទៃប៉ុណ្ណោះទេ ថែមទាំងជួយដល់សុខភាពអ្នកផងដែរ។
កញ្ញាបានបន្តទៀតថា កញ្ញាពិតជាសប្បាយចិត្តខ្លាំងណាស់ ដែលមានឱកាសបានជួយដល់សង្គមជាតិទៅតាមលទ្ធភាពរបស់កញ្ញាដូច្នេះ ដូចជាការបរិច្ចាគឈាមនេះជាដើម។ កាលពីមុនកញ្ញាតែងតែខ្លាចថាប៉ះពាល់សុខភាពបន្ទាប់ពីបរិច្ចាគឈាម តែតាមពិតមិនមែនបែបនេះទេ។ ដើម្បីសុវត្ថិភាពក្នុងការបរិច្ចាគ គ្រូពេទ្យនឹងពិនិត្យសុខភាពជាមុនសិន និងធ្វើទៅតាមដំណាក់កាលបច្ចេកទេសជាច្រើន។ កញ្ញាបានសំណូមពរថា «សូមបងប្អូនកុំបារម្ភអី ការបរិច្ចាគឈាមអាចសង្គ្រោះជីវិតមនុស្សជាច្រើន ហើយក៏អាចជួយដល់សុខភាពបងប្អូនផ្ទាល់ផងដែរ។ ជាចុងក្រោយកញ្ញាសុលីតា ពិតជាអរគុណខ្លាំងណាស់ទៅកាន់បងប្អូនដែលបានមកបរិច្ចាគឈាមក្នុងថ្ងៃនោះដូចកញ្ញាដែល ពីព្រោះអាចជួយដល់សង្គមជាតិទាំងមូលផងដែល។ ហើយសូមជូនពរបងប្អូនទាំងអស់មានសុខភាពល្អ និងជោគជ័យគ្រប់ភារកិច្ច»។
កម្មវិធីផ្តល់ឈាមសង្គ្រោះជីវិត “Give Blood, Save Lives” ដែលបានរៀបចំឡើងនៅក្នុងអគារGIA កន្លងទៅនេះដែលមានសប្បុរសជន ៤៦៦ រូបបានចុះឈ្មោះស្ម័គ្រចិត្តបរិច្ចាគឈាម ហើយអ្នកដែលមានលទ្ធភាពបរិច្ចាគបានមានចំនួន ៣៨៩ រូប ក្នុងដំណើរការចាប់ពីម៉ោង ៨ ព្រឹក ដល់ម៉ោង ៤:៣០ល្ងាច។ កម្មវិធីក្នុងថ្ងៃនោះផ្តល់នូវវេទិកាមួយសម្រាប់បុគ្គលគ្រប់រូបក្នុងការរួមចំណែកដ៏មានអត្ថន័យជួយដល់សង្គមជាតិ និងជាការផ្សព្វផ្សាយសារនៃក្តីមេត្តា និងសាមគ្គីភាព។ តាមរយៈការបរិច្ចាគឈាមក្នុងកម្មវិធីនេះ បុគ្គលម្នាក់ៗសុទ្ធតែជាផ្នែកដ៏សំខាន់នៃបណ្តាញសង្គ្រោះជីវិតរបស់មនុស្ស ហើយពិតជាមនុស្សមានចិត្តសប្បុរស និងសេចក្តីសប្បុរធម៌ដែលជាទង្វើដ៏ល្អដែលបានជះឥទ្ធិពលវិជ្ជមានហើយជាគំរូភាពដ៏ល្អនិងយូរអង្វែងដល់មនុស្សជំនាន់ក្រោយជាពិសេសទំពាំងស្នងឫស្សីដែលធ្វើឱ្យសង្គមនេះពោរពេញទៅដោយក្ដីស្រលាញ់ និងការចែករំលែកក្ដីផងដែរ៕
អត្ថបទខ្លីសរសេរដោយ លោក សួន វីន សិក្ខាកាមក្នុងវគ្គបណ្តុះបណ្តាលអំពីអក្ខរកម្មប្រព័ន្ធផ្សព្វផ្សាយ រៀបចំដោយអង្គការមណ្ឌលព័ត៌មានស្រ្តីកម្ពុជា(WMC) ក្រោមជំនួយឧបត្ថម្ភពី ភ្នាក់ងារស្វីសសម្រាប់ការអភិវឌ្ឍ និង កិច្ចសហប្រតិបត្តិការ (SDC) ជាមួយនិងស្ថានទូតស៊ុយអែតប្រចាំកម្ពុជា តាមរយៈអង្គការ BBC Media Action៕
