ភ្នំពេញ៖ ក្រោយពេលដែលដឹងលទ្ធផលជាផ្លូវការនៃការប្រឡងសញ្ញាប័ត្រមធ្យមសិក្សាទុតិយភូមិរួចមកឬគេហៅថា បាក់ឌុបនោះ មានសិស្សជាប់ប្រមាណជា៦៦. ០២ ភាគរយ ហើយ សិស្សជាប់និទ្ទេស A មានការថយចុះខណៈដែលសិស្សដែលបានជាប់និទ្ទេសរួមមានការកើនឡើង។ នៅក្នុងលទ្ធផលនេះ គេសង្កេតឃើញថា មានសិស្សពូកែផ្នែកគណិតវិទ្យាមួយចំនួនបានផុសលើបណ្ដាញសង្គមហ្វេសបុករបស់ខ្លួនគេផ្ទាល់ថា ពួកគាត់មិនអាចទទួលយកបាននូវលទ្ធផលនេះឡើយ ដោយហេតុថា ផ្នែកគណិតវិទ្យារបស់គាត់គឺធ្លាក់។
លោក សោម លាភ រាយការណ៍ជូនពីព័ត៌មាននេះ!
លទ្ធផលប្រឡងសញ្ញាប័ត្រមធ្យមសិក្សាទុតិយភូមិ បានធ្វើអោយសិស្សមួយចំនួនដែលគាត់ទន្ទឹមរង់ចាំ និងខំរៀនអស់រយៈពេល១២ ឆ្នាំ និងគ្រូមួយចំនួនអស់សង្ឃឹមជាខ្លាំង និងគិតថា វាមិនអាចទៅរួចនោះទេដោយសារពួកគេ ធ្លាក់មុខវិជ្ជាដែលពួកគេ រៀនពូកែហើយបែរជាធ្លាក់មមុខវិជ្ជានេះទៅវិញ។ ពួកគេសង្ឃឹមថា បាននិទ្ទេសរួម A ឬB តែបែរជាធ្លាក់មក C ឬD ជាលទ្ធផលដែលមិនអាចទទួលយកបានសម្រាប់ខ្លួនផ្ទាល់ក៏ដូចជាសាលាជាដើម។
ជាក់ស្ដែង យុវសិស្ស ឆាយ លីអាន បានបង្ហាញការខកចិត្តចំពោះលទ្ធផលនេះ ខណៈដែលខ្លួនជាសិស្សពូកែផ្នែកគណិតវិទ្យាតែបែរធ្លាក់ធ្លាក់ផ្នែកគណិតវិទ្យាទៅវិញ។
លោក ឆាយ លីអាន ប្រាប់វិទ្យុស្រ្តីថា ខ្លួនជាសិស្សពូកែផ្នែកគណិតវិទ្យាដែលទទួលបានមេដាយទាំងមេដាមាស និងមេដាយប្រាក់ជាច្រើនលើកច្រើនសារ។ លីអាន បញ្ជាក់ថា ខ្លួនជាសិស្សពូផ្នែកគណិតវិទ្យាចំណាត់ថ្នាក់លេខ ២មេដាយប្រាក់ ទូទាំងប្រទេស កាលពីថ្នាក់ទី ៩ និងលេខ១ មេដាយមាស ទូទាំងប្រទេសផ្នែកគណិតវិទ្យាម្ដងទៀតនៅថ្នាក់ទី ១២។ មិនត្រឹមតែប៉ុណ្ណោះ លោក ឆាយ លីអាន ក៏ធ្លាប់បានទៅប្រឡងផ្នែកគណិតវិទ្យានេះជាច្រើនប្រទេសផងដែរ។
លីអាន បានប្រាប់ថា លទ្ធផលនេះនឹងធ្វើឱ្យមានផលវិបាកដល់ពួកគេជាច្រើនការស្វែងរកឱកាសអារូបករណ៍ផ្សេងៗដើម្បីបន្ដសិក្សានៅឧត្តមសិក្សានៅក្នុងស្រុក និងក្រៅស្រុក។
ជាលទ្ធផលនៃការប្រលងបាក់ឌុបនេះ គេសង្កេតឃើញថាក្រសួងបានរឹតបន្តឹងទាំងដំណើរការនៃការប្រឡង និងវិញ្ញាសារផងដែរដោយក្រសួងតែងតែនិយាយថា អ្នកចេះគឺជាប់។
មិនខុសគ្នាពីនេះនោះទេ យុវសិស្សម្នាក់ ឈ្មោះថា កែវ ពិសិដ្ឋ ដែលរៀននៅសាលាប៊ែលធីសាខាទី ៩ នៅរាជធានីភ្នំពេញ បានប្រាប់វិទ្យុស្រ្តីនៅថ្ងៃដដែលថា ខ្លួនខំរៀនយ៉ាងខ្លាំងលើមុខវិទ្យាគណិតវិទ្យា ឬមុខវិទ្យាផ្សេងៗ។
យ៉ាងណាមិញ ពិសិដ្ឋបញ្ជាក់ថា មុនពេលទៅប្រឡង គ្រូ ក៏ដូចជាសាលាផ្ទាល់ គឺសង្ឃឹមលើខ្លួនខ្លាំងជាងគេ ដែលអាចទទួលបាននិទ្ទេស A។ ជាងនេះ ពិសិដ្ឋថា ខ្លួនទទួលបាននីទ្ទេស Aជាច្រើនមុខ តែផ្នែកគណិតវិទ្យាវិញធ្លាក់ ដែលជាហេតុធ្វើឱ្យខ្លួនទទួលបានត្រឹមតែនិទ្ទេសរួម គឺនិទ្ទេស Dតែប៉ុណ្ណោះ ។
យុវសិស្ស កែវ ពិសិដ្ឋក៏ជាសិស្សពូកែផ្នែកអក្សសាស្រ្តខ្មែរផងដែរ។
លោក កែវ ពិសិដ្ឋ បញ្ជាក់ម្ដងហើយម្ដងទៀតថា ខ្លួនពូកែខាងគណិតវិទ្យាខ្លាំងជាងគេនៅក្នុងថ្នាក់របស់គាត់។ តួយ៉ាងលទ្ធផលនៃការប្រឡងប្រចាំថ្នាក់របស់ខ្លួន គឺមានតែគាត់ទេដែលធ្វើលំហាត់ពេលប្រឡងដែលធ្វើបានពិន្ទុពេញ ១២៥ លើ១២៥នៃខែខ្លះ។ ពិសិដ្ឋក៏បានចូលរួមប្រឡងប្រជែងយកអាហារូបករណ៍ទៅសិក្សានៅប្រទេសសិង្ហបុរីហើយទទួលបានចំណាត់ថ្នាក់លេខ៤ ក្នុងការប្រឡងនោះ។
ទោះបីជាយ៉ាងណាក៏ដោយ ពិសិដ្ឋ សុំទៅក្រសួងពិនិត្យមើលដើមមានភាពយុត្តិធម៌ទាំងអស់គ្នា ដែលបានខំរៀនយ៉ាងខ្លាំង។
ពាក់ព័ន្ធនឹងបញ្ហានេះ ក្នុងនាមជាគ្រូម្នាក់ដែលបង្រៀន យុវសិស្សឈ្មោះ កែវ ពិសិដ្ឋ ក៏ដូចជាសិស្សផ្សេងៗទៀតដែលបានដឹងពីសមត្តភាពសិស្សរបស់ខ្លួនផ្ទាល់បានបង្ហាញការមិនអាចទទួលយកបាននូវលទ្ធផលបាក់ឌុបឆ្នាំនេះឡើយ។
លោក ឡេង សុវណ្ណារ៉ា គ្រូបង្រៀនផ្នែកគណិតវិទ្យានៅសាលាប៊ែលធីអន្តរជាតិ សាខាទី៩ នៅរាជធានីភ្នំពេញបានប្រាប់វិទ្យុស្រ្តីថា ការសិក្សាផ្នែកគណិតវិទ្យារបស់ សិស្សឈ្មោះ កែវ ពិសិដ្ឋរូបនេះគឺរៀនពូកែណាស់លើផ្នែកនេះ។
លោកថា ក្រសួងត្រូវតែពិនិត្យសើរើទាំងអស់លើមុខវិទ្យាគណិតវិទ្យា ប្រសិនបើសិស្សគាត់ឈ្មោះកែវ ពិសិដ្ឋម្នាក់នេះធ្លាក់ផ្នែកនេះ លោកនឹងឈប់បង្រៀន។ ជាងនេះមានជំនឿចិត្តលើគាត់ខ្លាំងណាស់។
សម្រាប់សិស្សដែលលោក ឡេង សុវណ្ណា ជឿទុកចិត្តលើសមត្តភាព និងមិនអាចទទួលយកបាននូវលទ្ធផលនេះមិនមែនមានតែកែវ ពិសិដ្ឋតែប៉ុណ្ណោះនោះទេ ពោលគឺមានអ្នកពូកែប្រហាក់ប្រហែលជាប្រមាណជា ៤ ទៅ៥នាក់ទៀតឯណោះ។
ដូចគ្នានេះដែរ លោក ព្រុំ កុសល គ្រូបង្រៀននៅវិទ្យាល័យសម្ដេចហេងសំរិនព្រៃល្វា ក៏មិនយល់ព្រមចំពោះលទ្ធផលនេះឡើយ។ លោក គ្រូ ព្រុំ កុសល បញ្ជាក់ថា លោកបានណែនាំសិស្សរបស់ខ្លួនមួយចំនួនដែលលោក ជឿជាក់ថា មិនអាចនឹងធ្លាក់ក្នុងការប្រឡងនោះ ឱ្យស្នើទៅក្រសួងឱ្យពិនិត្យឡើងវិញលើលទ្ធផលទាំងនេះ។
ចំពោះសិស្សរបស់លោក ព្រុំ កុសល ប្រមាណ៥ ទៅ៦នាក់ កំពុងតែធ្វើពាក្យស្នើមកក្រសួងនៅថ្ងៃនេះហើយ។ សូមបញ្ជាក់ថា សិស្សរបស់លោកគ្រូ ព្រុំ កុសល មិនមែនតវ៉ាតែគណិតវិទ្យាតែប៉ុណ្ណោះនោះទេ តែតវ៉ាលើលទ្ធផលទាំងអស់តែម្ដង។
គិតមកដល់ពេលនេះ វិទ្យុស្រ្តី មិនអាចទាក់ទងទៅអ្នកនាំពាក្យក្រសួងអប់រំបានទេ ដោយទូរស័ព្ទហើយអត់អ្នកលើក។
គួររំលឹកថា សិស្សពូកែគណិតវិទ្យាទាំងនោះ និងគ្រូផងដែរ ថាលទ្ធផលនេះមានកំហុសផ្នែកបចេ្ចកទេសក្នុងការធ្វើកំណែវិញ្ញាសារ។ យ៉ាងណាមិញ ពួកគាត់បានសុំឱ្យក្រសួងពិនិត្យរឿងនេះឱ្យខានបាន៕
