កាលពីព្រឹកថ្ងៃទី១១ ខែវិច្ឆិកា ឆ្នាំ២០២០ ម្សិលមិញអាជ្ញាធរខេត្តកំពង់ធំរួមមាន មន្រ្តីថ្នាក់ខេត្ត ស្រុក ឃុំនិងភូមិ បានបើកវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្ត ដែលមានការចូលពីប្រជាពលរដ្ឋសរុបចំនួន ១៥០នាក់ផងដែរ។ វេទិកានេះធ្វើឡើងនៅក្នុងបរិវេនសាលាស្រុកបារាយណ៍។
វេទិកានេះគឺធ្វើឡើងក្នុងគោលបំណងដើម្បីស្តាប់នូវមតិយោបល់របស់ពលរដ្ឋ ដោះស្រាយរាល់បញ្ហាកង្វល់ សំណូមពររបស់ប្រជាពលរដ្ឋ ហើយក៏មានជាប្រអប់សំណួរ ដើម្បីអោយប្រជាពលរដ្ឋសរសេរសំណួរសំណូមពរផងដែរ។
អ្នកស្រី ស៊ឹម សុខុម បង្ហាញអារម្មណ៍សប្បាយរីករាយដែលបានចូលរួមវេទិកានេះ ព្រោះអាចឱ្យពលរដ្ឋលើករាល់បញ្ហាទុក្ខកង្វល់នឹងសំណូមពររបស់ពួកគាត់ទៅថ្នាក់ដឹកនាំផ្ទាល់ដើម្បីជួយដោះស្រាយ។
ចំណែកលោក សៅ កា ក្រុមប្រឹក្សាស្រុកបារាយណ៍ឱ្យដឹងថា វេទិកាសាធារណពេលនេះប្រារព្ធឡើងដើម្បីតាមដាន និងវាយតម្លៃពីសមិទ្ធិផលសម្រេចបានរបស់រដ្ឋបាលភូមិ ឃុំ និងស្រុក រយៈពេលពេញមួយឆ្នាំឆ្លើយតបនឹងតម្រូវការរបស់ប្រជាពលរដ្ឋឬទេ។
លោកបញ្ជាក់ថា ការសំណូមពររបស់ប្រជាពលរដ្ឋក្នុងវេទិកាក្នុងការកសាងឬស្ថាបនាអ្វីមួយ គឺអាស្រ័យលើទំហំថវិកា និងវិស័យពាក់ព័ន្ធ។ បើសិនការស្នើក្នុងទំហំតូចអាចចំណាយថវិកាឃុំដែលមានស្រាប់ប្រើបាន នោះការសំណូមពរអាចប្រើរយៈពេលខ្លី។ តែបើតម្រូវការរបស់ពលរដ្ឋមានទំហំធំ គឺត្រូវដាក់សំណើទៅថ្នាក់មន្ទីរ និងថ្នាក់ក្រសួង ដើម្បីជួយដោះស្រាយ ដែលអាចប្រើរយៈពេលយូរ។
យ៉ាងណាលោករីករាយដែលប្រជាពលរដ្ឋបានចូលរួមយ៉ាងផុសផុលក្នុងការចូលរួមវេទិកាលើកមតិយោបល់សេចក្តីត្រូវការ ដើម្បីឱ្យអាជ្ញាធរបានដឹង និងដោះស្រាយទាន់ពេលវេលា៕
ខាងក្រោមនេះជារូបភាពសកម្មភាពក្នុងវេទិកាខាងលើ៖
អត្ថបទខ្លីសរសេរដោយ ហុក ដេប៉ូ យុវជនខេត្តកំពង់ធំ ជាសិក្ខាកាមក្នុងវគ្គបណ្តុះបណ្តាលអំពីអក្ខរកម្មព័ត៌មាន និងប្រព័ន្ធផ្សព្វផ្សាយ (MIL) រៀបចំដោយមណ្ឌលព័ត៌មានស្រ្តីកម្ពុជា(WMC) ក្រោមជំនួយបច្ចេកទេសពីអង្គការអភិវឌ្ឍន៍ប្រព័ន្ធផ្សព្វផ្សាយអាឡឺម៉ង់(DW)។
