ផ្ទៀងផ្ទាត់៖ ពលរដ្ឋម្នាក់បានលើកឡើងពាក់ព័ន្ធនឹងលេខទូរសព្ទបន្ទាន់ ឬHotline ដែលមានលេខ១១៨ ដោយគេរាយការណ៍ថា ទាក់ទងមិនបានពេលឃើញមានគ្រោះអគ្គិភ័យ។ ពិតទេដែលលេខទូរសព្ទរាយការណ៍បន្ទាន់ករណីមានអគ្គិភ័យ គ្មានអ្នកលើក និងឆ្លងកាត់ច្រើនដំណាក់កាលពិបាកទាក់ទង? លោក គីម ចាន់ចាវ រាយាការណ៍
អតីតរដ្ឋមន្ត្រីក្រសួងព័ត៌មាន លោក ខៀវ កាញ៉ារីទ្ធ ដែលកំពុងមានប្រជាប្រិយភាពលើបណ្ដាញសង្គម បានបង្ហោះសាររបស់ពលរដ្ឋម្នាក់ដែលបានលើកឡើងពាក់ព័ន្ធនឹងលេខទូរសព្ទបន្ទាន់ ឬHotline ដែលមានលេខ១១៨ ដោយគេរាយការណ៍ថាលេខនេះទាក់ទងពេលមានអាសន្នពិបាក។ បើតាមលោក លោក ខៀវ កាញ៉ារីទ្ធ ពលរដ្ឋបានរាយការណ៍មកលោកក្នុងសំណេរដើមថា
«ជម្រាបសួរឯកឧត្តមអ៊ំ ខ្ញុំបានជិះកាត់រោងចក្រដែលកំពុងឆេះនៅម្ដុំព្រៃស ហើយខ្ញុំបានទូរស័ព្ទទៅឡានទឹក។ ខ្ញុំមាន២ចំនុចដែលខ្ញុំចង់ជម្រាបជូនអ៊ំនិងគិតថាយើងអាចពង្រឹងបាន។ ១. ពេលទូរស័ព្ទទៅ១១៨ ខ្ញុំត្រូវចុចលេខ១បន្ដ ដើម្បីជួបសហការី ២. ទូរស័ព្ទទៅគ្មានអ្នកលើក។ នេះគឺជាលេខទូរស័ព្ទបន្ទាន់ពេលមានអាសន្ន គួរតែមិនចាំបាច់ចុចច្រើនដំណាក់កាលដើម្បីជួបសហការីទេ។»
តើពិតទេដែលលេខទូរសព្ទរាយការណ៍បន្ទាន់ករណីមានអគ្គិភ័យ គ្មានអ្នកលើក និងឆ្លងកាត់ច្រើនដំណាក់កាល បែបនេះ?
ឆ្លើយតបនឹងការលើកឡើងនេះ នាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ នៃអគ្គស្នងការដ្ឋាននគរបាលជាតិ បានឱ្យដឹងថា លេខ Hotline ១១៨ ទើបតែស្នើរសុំបើកឱ្យដំណើរការឡើងវិញបានមួយសប្តាហ៏តែប៉ុណ្ណោះ ការរៀបចំបច្ចេកទេសមិនទាន់បានរួចរាល់នៅឡើយទេ ដោយលេខ Hotline ១១៨នេះត្រូវបានផ្អាកលែងដំណើរមួយរយៈពេលមកហើយ។
នាយកដ្ឋាននគរបាលបង្ការពន្លត់អគ្គិភ័យអះអាងប្រាប់លោក ខៀវ កាញ៉ារីទ្ធបន្តថា ក្នុងដំណើរការមួយររយៈពេលខ្លីមកនេះខាងអង្គភាពពន្លត់អគ្គិភួជួបបញ្ហាទូរសព្ទ (Call) មករំខានគ្រប់វិនាទី មិនថាពេលយប់ឮពេលថ្ងៃនោះទេ ពីសំណាក់ប្រជាពលរដ្ឋមួយចំនួនដែលទូរសព្ទ (Call) លេងសើចទាំងព័ត៌មានល្អ អាក្រក់និងអសុរោះមកលេខ Hotline ១១៨ ដែលធ្វើឱ្យក្រុមប្រចាំការធុញទ្រាន់លែងហ៊ានលើក។
ទន្ទឹមនឹងការសុំទោសចំពោះការខកខានលើកទូរសព្ទ អង្គភាពអង្គភាពពន្លត់អគ្គភ័យសន្យាថានឹងខិតខំពង្រឹងនិងកែសម្រួលនូវចំណុចខ្វះខាតដោយអចេតនាឱ្យមានភាពល្អប្រសើរ និងមានប្រសិទ្ធភាពឡើងវិញ។ អង្គភាពអង្គភាពពន្លត់អគ្គភ័យអំពាវនាវដល់ក្រសួង មន្ទីរ ស្ថាប័ន និងអង្គភាពរដ្ឋ និងវិស័យឯកជន ឱ្យគាំទ្រ ប្រើប្រាស់សេវា Hotline ១១៨ រាល់ការ ទូរសព្ទ (Call) ចូលដោយឥតគិតថ្លៃរបស់អគ្គស្នងការដ្ឋាននគរបាលជាតិ ឱ្យមានប្រសិទ្ធិភាព និងដោយសេចក្តីថ្លៃថ្នូរ។
អង្គភាពដដែលក៏បានសំណូមពរដល់ពលរដ្ឋទូទៅ បើពុំមានការចាំបាច់ទេ សូមកុំ ទូរសព្ទ (Call) រំខាន ទុកឱ្យប្រជាពលរដ្ឋជួបគ្រោះអគ្គិភ័យពិតប្រាកដពេលដែលពួកគាត់មិនអាចទប់ស្កាត់បាន ទូរសព្ទ (Call) មកលេខជំនួយបន្ទាន់១១៨ ដើម្បីស្នើសុំជំនួយបន្ទាន់ពីអង្គភាពនគរបាលបង្ការពន្លត់អគ្គីភ័យ និងសង្ក្រោះ ចេញជួយអន្តរាគមន៏ឱ្យបានទាន់ពេលវេលា៕
