រដ្ឋមន្ត្រីក្រសួងមហាផ្ទៃ បានប្រកាសចាត់វិធានការអ្នកមានឋានន្ដរសក្ដិធំៗ ក៏ដូចជាលើក ទឹកចិត្តមន្ដ្រីនគរបាលចរាចរណ៍ ដែលហ៊ានចាប់ឃាត់រថយន្តថ្នាក់ដឹកនាំ ឬមន្ត្រីមានអំណាច ដែលបើកបរល្មើសច្បាប់ ដើម្បីផាកពិន័យ និងណែនាំអំពីច្បាប់ចរាចរណ៍។
យោងតាមការចុះផ្សាយរបស់គេហទំព័រអគ្គស្នងការនគរបាលជាតិ នៅថ្ងៃទី១៥ ធ្នូ ឆ្នាំ២០១៥ បានឲ្យដឹងថា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ដ្រីក្រសួងមហាផ្ទៃ បានថ្លែងក្នុងកិច្ចប្រជុំប្រកាសសមាសភាពគណកម្មាធិការជាតិសុវត្ថិភាពចរាចរណ៍ នាព្រឹកថ្ងៃទី១៥ ខែធ្នូ នៅទីស្តីការក្រសួងមហាផ្ទៃ ដោយប្រកាសឲ្យចាត់វិធានការ ចំពោះមន្ដ្រី មានឋាន នន្ដរស័ក្ដិណា ដែលមិនគោរពច្បាប់ចរាចរណ៍ ។
ជាមួយគ្នា សម្ដេចក្រឡាហោម ស ខេង ក៏បានលើកទឹកចិត្តថា នឹងដំឡើងស័ក្តិជូនមន្ត្រីនគរបាលចរាចរណ៍ ប្រសិនបើមាន ការចាប់ឃាត់រថយន្តថ្នាក់ដឹកនាំ ឬមន្ត្រីមានអំណាច ពិសេសមន្ត្រីថ្នាក់រដ្ឋមន្ត្រីណាដែលបើកបរល្មើស ច្បាប់ចរាចរណ៍ មកធ្វើការផាកពិន័យ និងមកណែនាំអំពីច្បាប់ចរាចរណ៍។
សម្ដេចក្រឡាហោម ស ខេង ក៏បានបញ្ជាក់ដែរថា គ្មានការអន្តរាគមន៍ណាឲ្យមានលើកលែងនោះទេពោលគឺ មន្ត្រីលំដាប់ថ្នាក់ធំៗ កូនចៅអ្នកមានបុណ្យស័ក្តិយស និងប្រជាពលរដ្ឋទាំងអស់នៅទូទាំងប្រទេស ត្រូវបានធ្វើការចាប់ឃាត់មកអប់រំ និងមានការផាកពិន័យដោយគ្មានការលើកលែងដូចគ្នា៕
