ថ្លែងក្នុងសិក្ខាសាលាចែករំលែកលទ្ធភាពស្តីពី “ការអនុវត្តល្អ និងបទពិសោធគម្រោងលើកកម្ពស់សិទ្ធិស្ត្រី និងពង្រឹងសេដ្ឋកិច្ចសង្គម” នៅថ្ងៃទី១៦ ខែធ្នូនេះ លោកស្រី ញ៉ែម មរកត អនុរដ្ឋលេខាធិការ ក្រសួងកិច្ចការនារី លើកឡើងថា ស្ត្រីខ្មែរបច្ចុប្បន្នបានកាត់បន្ថយការពឹងពាក់ ទាំងស្រុងលើចំណូលគ្រួសារដែលរកបានពីបុរសជាស្វាមី។
លោកស្រីបន្តថា ស្ត្រីគប្បីឈប់ពឹងផ្អែកលើសេដ្ឋកិច្ចបុរស ដើម្បីបញ្ចៀសការប្រមាថ ការមាក់ងាយ និងការប្រើហិង្សាលើស្ត្រីពីសំណាក់ស្វាមី។ លោក កែវ សុខា រាយការណ៍ពីព័ត៌មាននេះ៖
មន្ត្រីក្រសួងកិច្ចការនារីថ្លែងថា ផ្នែកមួយនៃអំពើហិង្សាលើស្ត្រី ការមាក់ងាយ និងការប្រមាទមកលើស្ត្រី គឺបណ្តាលមកពីបុរសជាមេគ្រួសារបានក្តាប់សេដ្ឋកិច្ចក្នុងគ្រួសារទាំងស្រុង។
អនុរដ្ឋលេខាធិការក្រសួងកិច្ចការនារី លោកស្រី ញ៉ែម មរកត បានមានប្រសាសន៍បែបនេះនៅក្នុងសិក្ខាសាលាចែករំលែកលទ្ធភាពស្តីពី “ការអនុវត្តល្អ និងបទពិសោធគម្រោងលើកកម្ពស់សិទ្ធិស្ត្រី និងពង្រឹងសេដ្ឋកិច្ចសង្គម ដែលរៀបចំធ្វើនៅថ្ងៃទី១៦ ខែធ្នូ ឆ្នាំ២០១៥នេះ នៅភោជនីយដ្ឋានទន្លេបាសាក់២។
លោកស្រី ញ៉ែម មរកត បន្តថា ស្ត្រីបច្ចុប្បន្នមានសមត្ថភាព និងមានសក្តានុពលច្រើន ក្នុងការរកចំណូលផ្គត់ផ្គង់គ្រួសារ។ លោកស្រី ញ៉ែម មរកត៖ «សេដ្ឋកិច្ចហ្នឹងវាគ្របយើង វាឱ្យស្ត្រីយើងងើបមុខមិនរួចតែម្តង តែបើស្ត្រីមានមុខរបប ទោះបីមុខរបបតូចក៏ដោយនោះនឹងធ្វើឱ្យស្ត្រីហ្នឹងមានកម្លាំងក្នុងខ្លួន ហើយអំពើហិង្សា ការរើសអើង ការមើលងាយប្រមាទ គឺថាកាត់បន្ថយអស់។
អនុប្រធានជនបង្គោលស្ត្រីប្រចាំអង្គការ GADC ខេត្តព្រៃវែង អ្នកស្រី អឿន សាមន់ លើកឡើងថា តាមរយៈការចុះបង្រៀនស្ត្រីកន្លងមក អ្នកស្រីមើលឃើញថា ភាគច្រើននៃស្ត្រីរងគ្រោះពីអំពើហិង្សាក្នុងគ្រួសារ ដែលបានរាយការណ៍មក គឺបង្កឡើងពីប្តី ដែលបានទទួលទានគ្រឿងស្រវឹង។ មួយវិញទៀត អ្នកស្រីរកឃើញថា អំពើហិង្សាក្នុងគ្រួសារមួយចំនួន គឺបណ្តាលមកពីស្វាមីបានអាងអំណាចក្នុងដៃ តាមរយៈចំណូលដែលខ្លួនជាអ្នករក។
អ្នកស្រី អឿន សាមន់៖ «មើលទៅក្នុងសហគមន៍ភាគច្រើនស្ត្រីនៅផ្ទះរងគ្រោះ រងគ្រោះដោយ សារអី! គឺបុរសមើលងាយ មិនឱ្យតម្លៃយល់ថាស្ត្រីហ្នឹងគ្មានបានប្រយោជន៍អីទេ គិតតែស៊ី ដេកៗ អញ្ចឹងបុរសដែលរកបានកំរៃពីក្រៅគាត់ខ្លាំង គាត់មានអំណាចតែម្តង ពេលស្ត្រីសួរនាំក៏កើតជាជម្លោះឈានដល់ការប្រើអំពើហិង្សាក្នុងគ្រួសារ»។
យោងតាមលទ្ធផលនៃគម្រោងលើកកម្ពស់សិទ្ធិស្ត្រី និង ពង្រឹងសេដ្ឋកិច្ចសង្គម របស់អង្គការយេនឌ័រ និងអភិវឌ្ឍន៍ដើម្បីកម្ពុជា និងអង្គការហេហ្វឺអន្តរជាតិកម្ពុជា ដែលបានធ្វើការគ្របដណ្តប់លើឃុំចំនួន ៦ ក្នុងខេត្តចំនួន៣ ក្នុងប្រទេសកម្ពុជា បានរកឃើញថា ចំនួនស្ត្រីដែលបានបង្កើនប្រាក់ចំណូល និងបានគ្រប់គ្រងលើធនធានក្នុងគ្រួសារមានចំនួនស្មើនឹងបុរស។
លទ្ធផលសិក្សាបន្ថែមថា យ៉ាងហោចណាស់មានស្ត្រី៩០% នៃពលរដ្ឋចំនួន ៣២០០ គ្រួសារ បានរកចំណូលខ្លួនឯង ក្នុងដំណើរការបង្កើនប្រាក់ចំណូលក្នុងគ្រួសារ ហើយ៨០% នៃពលរដ្ឋទាំងនោះ បានរាយការណ៍ថា មានស្បៀងហូបគ្រប់គ្រាន់តាមរយៈការធ្វើកសិកម្មប្រចាំគ្រួសារ ដែលជាសមិទ្ធិផលចេញពីកម្លាំងពលកម្មរបស់ស្ត្រី៕
