រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានក្រើនរំឭកដល់អ្នកសារព័ត៌មាន ឱ្យប្រើគោរពងារមន្ត្រីជាន់ខ្ពស់ តាមព្រះរាជទានរបស់ព្រះមហាក្សត្រ។
យោងសេចក្ដីជូនដំណឹងរបស់ក្រសួងព័ត៌មាន ចុះថ្ងៃទី១៦ ខែធ្នូ ឆ្នាំ២០១៥នេះ ឱ្យដឹងថា ក្រសួង តម្រូវឱ្យអ្នកសារព័ត៌មាន គោរពក្រមសីលធម៌វិជ្ជាជីវៈរបស់ខ្លួនឱ្យបានម៉ត់ចត់ ដោយត្រូវគោរពគោរមងារ ដែលព្រះមហាក្សត្រ បានប្រទានដល់មន្ត្រីជាន់ខ្ពស់ ដែលមានគោរមងារជាសម្តេច។
សេចក្ដីជូនដំណឹងដដែលក៏បានរំឭកដល់ម្ចាស់ស្ថានីយវិទ្យុ ទូរទស្សន៍ និងចាងហ្វាងសារព័ត៌មានទាំងអស់ ត្រូវគោរពតាមលិខិតក្រើនរំឭកលើវិជ្ជាជីវៈសារព័ត៌មាន របស់ក្រសួងចុះថ្ងៃទី៣០ ខែកក្កដា ឆ្នាំ២០០០ ដែលក្រសួងបានធ្វើការណែនាំកន្លងមក ឱ្យអង្គភាពព័ត៌មានទាំងអស់ ត្រូវតែគោរពគោរមងារដែលព្រះមហាក្សត្រទ្រង់រាជប្រទានដល់ឥស្សរជនជាន់ខ្ពស់ ឬថ្នាក់ដឹកនាំដ៏ឆ្នើម ដែលប្រជាពលរដ្ឋគ្រប់គ្នាគោរពស្រឡាញ់ ចំពោះឥស្សជននោះ។
គួរបញ្ជាក់ផងដែរថា គោរមងារដែលព្រះមហាក្សត្ររាជប្រទានជូនឥស្សរជនកំពូលៗរួមមាន សម្តេច ហ៊ុន សែន សម្តេច ហេង សំរិន សម្តេច ប៊ុនរ៉ានី សម្តេច ស ខេង សម្តេច សាយ ឈុំ សម្តេច គង់ សំអុល ព្រមទាំងរាជវង្សានុវង្សជាច្រើនទៀត ដែលទទួលបានគោរមងារជាសម្តេច៕
