នាយករដ្ឋមន្ត្រីកម្ពុជា បានថ្លែងថា ប្រទេសកម្ពុជាត្រូវតែមានកិច្ចសហប្រតិបត្តិការល្អ ជាមួយប្រទេសថៃ ឡាវ និងវៀតណាម ដើម្បីទប់ស្កាត់គ្រោះមហន្តរាយធម្មជាតិ។
លោកនាយករដ្ឋមន្ត្រី ហ៊ុន សែន បានថ្លែងបែបនេះ នាព្រឹកថ្ងៃពុធ ទី១៦ ខែធ្នូ ឆ្នាំ ២០១៥ នេះ នៅសណ្ឋាគារកាំបូឌីយ៉ាណា រាជធានីភ្នំពេញ ក្នុងកិច្ចប្រជុំរដ្ឋមន្ត្រីអាស៊ានទទួលបន្ទុកគ្រប់គ្រងគ្រោះមហន្តរាយនេះ ជាលើកទី២ ដែលប្រទេសកម្ពុជាជាម្ចាស់ផ្ទះ។
ជាមួយគ្នានោះដែរ លោកនាយករដ្ឋមន្ត្រីក៏បានអំពាវនាវដល់ថ្នាក់ដឹកនាំបណ្តាប្រទេសក្នុងតំបន់អាស៊ាន មានថៃ ឡាវ និងវៀតណាម ឱ្យបង្កើនកិច្ចសហការល្អ ក្នុងការផ្តល់ព័ត៌មានគ្នាទៅវិញទៅមក ជុំវិញបញ្ហាគ្រោះធម្មជាតិ ដើម្បីងាយស្រួលទប់ស្កាត់ និងកាត់បន្ថយការរីករាលដាលនៃគ្រោះធម្មជាតិកាន់តែធំឡើង។
លោកនាយករដ្ឋមន្ត្រីមានប្រសាសន៍ថា៖ «ខ្ញុំសូមអំពាវនាវដល់ថ្នាក់ដឹកនាំដែលពិភាក្សាថ្ងៃនេះ គប្បីធ្វើកិច្ចសហប្រតិបត្តិការគ្នាឱ្យបានល្អ ទៅលើបញ្ហាផ្តល់ព័ត៌មានជូនគ្នាទៅវិញទៅមក ដើម្បីកាត់បន្ថយនូវគ្រោះធម្មជាតិ។ ឧទាហរណ៍ [ទឹក] ជំនន់ ដែលកើតឡើងខាងប្រទេសឡាវអាចផ្តល់ព័ត៌មានឆាប់រហ័យមកដល់កម្ពុជា ហើយកម្ពុជាក៏ផ្តល់ព័ត៌មានឆាប់រហ័យទៅខាងវៀតណាម ដើម្បីកាត់បន្ថយគ្រោះថ្នាក់បែបនេះ»។
លោកនាយករដ្ឋមន្ត្រី ហ៊ុន សែន បានបន្ថែមទៀតថា បញ្ហាស្ថានភាពមួយចំនួន ដែលអាចបង្កផលប៉ះពាល់ ប្រទេសក្នុងបណ្តាតំបន់អាស៊ាន អាចផ្តល់ព័ត៌មានឱ្យបានឆាប់រហ័សដល់គ្នាទៅវិញទៅមក និងធ្វើការព្យាករណ៍ទុកជាមុននូវបញ្ហាដែលអាចកើតឡើងនៅក្នុងកម្រិតតំបន់៕
