វិមានក្រឹមឡាំងបានថ្លែងឱ្យដឹងនៅថ្ងៃសុក្រ ទី១៧ មីនា ២០២៣ ថាប្រធានាធិបតីចិនលោក Xi Jinping នឹងធ្វើទស្សនកិច្ចទៅប្រទេសរុស្ស៊ីចាប់ពីថ្ងៃទី ២០ ដល់ ២២ ខែមីនា ដែលជាទស្សនកិច្ចផ្លូវរដ្ឋ ដែលត្រូវបានអញ្ជើញដោយប្រធានាធិបតី Vladimir Putin ។
ដំណើរទស្សនកិច្ចនេះ ធ្វើឡើងនៅពេលដែលប្រទេសចិនធ្វើជាអ្នកសម្រួបសម្រួលស្វែងរកសន្តិភាពក្នុងជម្លោះរុស្ស៊ី-អ៊ុយក្រែន។ កិច្ចខិតខំប្រឹងប្រែងនេះបង្កភាពសង្ស័យដល់ប្រទេសលោកខាងលិចថាទីក្រុងប៉េកាំងបានការគាំទ្រផ្នែកការទូតដល់ប្រទេសរុស្ស៊ី។
វិមានក្រឹមឡាំងបានថ្លែងថា”ក្នុងជំនួបនេះពួកគេនឹងពិភាក្សាធ្វើយ៉ាងណាឱ្យរីកចម្រើនបន្ថែមទៀតនៃទំនាក់ទំនងភាពជាដៃគូលើគ្រប់ជ្រុងជ្រោយ និងកិច្ចសហប្រតិបត្តិការជាយុទ្ធសាស្ត្ររវាងប្រទេសរុស្ស៊ី និងប្រទេសចិន”។តាមប្រភពដដែលបានឱ្យដឹងបន្ថែមថា “មានឯកសារព្រមព្រៀងទ្វេភាគីសំខាន់ៗមួយចំនួននឹងត្រូវចុះហត្ថលេខាក្នុងជំនួបនេះ” ។
ប្រទេសចិន និងរុស្ស៊ីបានឈានដល់ទំនាក់ទំនងភាពជាដៃគូ “គ្មានដែនកំណត់” នៅខែកុម្ភៈ ឆ្នាំ ២០២២ នៅពេលដែលលោកពូទីន បានបំពេញទស្សនកិច្ចនៅទីក្រុងប៉េកាំងក្នុងព្រឹត្តិការណ៍បើកកីឡាអូឡាំពិករដូវ
រងា ពោលគឺតែប៉ុន្មានសប្តាហ៍ប៉ុណ្ណោះ មុនពេលរុស្ស៊ីបានឈ្លានពានអ៊ុយក្រែន។ចាប់តាំងពីពេលនោះមក ភាគីទាំងពីរបានបន្តអះអាងនូវភាពរឹងមាំនៃទំនាក់ទំនងរបស់ពួកគេ។
ពាណិជ្ជកម្មរវាងប្រទេសទាំងពីរបានកើនឡើងចាប់តាំងពីមានការលុកលុយអុយក្រែន។ ប្រទេសចិនគឺជាអ្នកទិញប្រេងដ៏ធំបំផុតពីរុស្ស៊ី ដែលជាប្រភពចំណូលដ៏សំខាន់សម្រាប់ទីក្រុងម៉ូស្គូ៕
ប្រភព៖ C N A ថ្ងៃទី ១៧ ខែ មីនា ឆ្នាំ ២០២៣
