នៅថ្ងៃទី១៧ ខែ មីនា ឆ្នាំ២០២៣នេះ ក្រសួងវប្បធម៌របស់លោកស្រី ភឿង សកុណា បានរៀបចំពិធីទទួលវត្ថុបុរាណដែលបានប្រគល់មកកម្ពុជា កាលពីពេលកន្លងទៅ។ ពិធីនេះមានការចូលរួមពីនាយករដ្ឋមន្រ្តីនិងរដ្ឋមន្រ្តីមួយចំនួនទៀតផងដែរ។
ផ្អែកតាមសេចក្ដីប្រកាសព័ត៌មានបានឱ្យដឹងថា រតនសម្បត្តិដែលបានទទួលមក មានបដិមាសំខាន់ៗមួយចំនួននៃព្រហ្មញ្ញសាសនា និងពុទ្ធសាសនា ជាពិសេសជាវត្ថុបុរាណសម័យមុនអង្គរ និងសម័យអង្គរ។
ក្រសួងវប្បធម៌បានឱ្យដឹងថា បដិមាធំៗទាំងនោះរួមមាន ព្រះឥសូរ និងព្រះស្កន្ទ ព្រះស្កន្ទគង់លើក្ងោក និងព្រះគនេស មានប្រភពដើមកំណើតមកពីប្រាសាទកោះកេរ អតីតរាជធានីនៃអាណាចក្រកម្ពុជានាសតវត្សន៍ទី១០ នៃគ.ស។ ក្រសួងសង្កត់ធ្ងន់ថា ទីនេះហើយធ្លាប់ជាគោលដៅនៃការលួយទ្រង់ទ្រាយធំអស់ជាច្រើនឆ្នាំនៅក្នុងអំឡុងសម័យសង្គ្រាមស៊ីវិល និងអសន្ដិសុខក្នុងស្រុក។
ប្រមុខរាជរដ្ឋាភិបាលកម្ពុជា សម្ដេច ហ៊ុន សែន នៅក្នុងពីធីទទួលវត្ថុបុរាណនេះ បានលើកឡើងថា ការប្រគល់មកវិញនូវវត្ថុបុរាណមកឱ្យកម្ពុជាវិញនេះ ជាកាយវិការថ្លៃថ្លាគួរឱ្យគោរព និងបង្ហាញពីក្រមសីលធម៌យកចិត្តទុកដាក់ដល់ប្រជាជាតិមួយ។
សូមជម្រាបថា រតនសម្បត្តិកម្ពុជាដែលត្រលប់មកវិញជាហូរហែរ មានទាំងតូច និងធំ ធ្វើពីប្រាក់ ថ្ម និងសំរិទ្ធ ភាគច្រើនទទួលពីសហរដ្ឋអាមេរិក និងចក្រភពអង់គ្លេស។ កាលពីពេលថ្មីៗនេះ គ្រឿងអលង្ការបុរាណខ្មែរ ដល់ទៅ៧៧ គ្រឿង ត្រូវបានចរចារយកមកពីចក្រភពអង់គ្លេសវិញនៅថ្ងៃទី១៧ ខែកុម្ភៈ ឆ្នាំ២០២៣។
បើតាមក្រសួងវប្បធម៌ វត្ថុបុរាណមួយចំនួនបានយកពីសារមន្ទីរនានា និងខ្លះទៀតយកពីអ្នកកាន់កាប់ជាឯកជនតាមរយៈការរឹបអូស និងការស្ម័គ្រចិត្ត។
យ៉ាងណាអង្គការយូណេស្កូ បានកំណត់ថា សម្បត្តិវប្បធម៌ របស់ប្រទេសណា គួរតែនៅប្រទេសនោះ៕
