ស្ដ្រីវ័យក្មេងដែលបានយកសពកូនចេញពីក្នុងផ្ទៃ នៅសម្ភពដើមអង្ក្រងបានបាត់បង់ជីវិតហើយ នៅវេលាម៉ោង២ អធ្រាត្រ ថ្ងៃទី១៦ ខែមីនា ឆ្នាំ២០២៣ នៅមន្ទីរពេទ្យកាល់ម៉ែត្រ រាជធានីភ្នំពេញ។
ការបាត់បង់ជីវិតនេះ ក្រោយពេលស្ដ្រីរូបនោះបានបាត់បង់ពោះវៀនធំ និងស្បូន បានសម្រាកព្យាបាលនៅមន្ទីរពេទ្យស្រុកខ្មែរផង និងប្រទេសថៃផង ដោយក្រុមគ្រូពេទ្យព្យាយាមអស់ពីសមត្ថភាព។
នេះបើយោងទៅតាមអ្នកនាង ចាន់ រ៉ា បងស្រីជីដូនមួយរបស់ស្ដ្រីជនរងគ្រោះខាងលើបញ្ជាក់លើទំព័រហ្វេសប៊ុក។ ចំណែកហ្វេសប៊ុកលោក សា វឿន ដែលជាប្ដីរបស់ស្ដ្រីរងគ្រោះធ្លាប់បានសរសេរសារថា ប្រពន្ធរបស់លោកត្រូវការឈាមបន្ថែម ហើយសុខភាពកាន់តែដាបពីមួយថ្ងៃទៅមួយថ្ងៃ។
សូមរម្លឹកថា រឿងរ៉ាវដែលបណ្ដាលឱ្យស្ដ្រីរងគ្រោះខាងលើឈានដល់ដំណាក់កាលនេះ បណ្ដាលមកពីការធ្វេសប្រហែសរបស់គ្លីនិកសម្ភពដើមអង្ក្រង នៅខេត្តកំពង់ស្ពឺ ដែលបានកាត់ពោះវៀន និងស្បូនរបស់ស្ដ្រីរងគ្រោះ ដោយយល់ច្រលំថា ជាទងសុកទារក កាលពីខែកញ្ញា ឆ្នាំ២០២២។
ក្រសួងសុខាភិបាលបានផ្អាកដំណើរការជាបណ្ដោះអាស្នន ចំពោះគ្លីនិកសម្រាកព្យាបាលជំងឺឈ្មោះ ដើមអង្រ្កង ដើម្បីស្រាវជ្រាវឱ្យច្បាស់ពីហេតុការណ៍ដែលបណ្ដាលឱ្យកើតឡើងដែរ៕
