ភ្នំពេញ៖ លោកស្រី អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បានកត់សម្គាល់ឃើញថា បច្ចុប្បន្នស្ត្រីនៅតែមានបញ្ហាប្រឈម និងនៅមានឧបសគ្គមួយចំនួននៅឡើយ ពាក់ព័ន្ធទៅនឹងការចូលរួមធ្វើសេចក្តីសម្រេចចិត្ត នៅក្នុងវិស័យនយោបាយ។ ការថ្លែងរបស់លោកស្រីបែបនេះ ធ្វើឡើងនៅក្នុងកម្មវិធីវេទិកាជាតិ ស្តីពីស្ត្រីជាថ្នាក់ដឹកនាំក្នុងវិស័យសាធារណៈ និងនយោបាយ នៅឯសណ្ឋាគារអ៊ីនធើខនភ្នំពេញ នៅថ្ងៃទី១៤ខែធ្នូនេះ។
ថ្លែងក្នុងកម្មវិធីវេទិកាជាតិស្តីពីស្ត្រីជាថ្នាក់ដឹកនាំក្នុងវិស័យសាធារណៈ និងនយោបាយ ដែលមានការចូលរួមពីសំណាក់ស្ត្រីជាថ្នាក់ដឹកនាំជាតិ ថ្នាក់ក្រោមជាតិ ដៃគូអភិវឌ្ឍន៍ និងតំណាងអង្គការមិនមែនរដ្ឋាភិបាលនានា ប្រមាណ ៨០០ នាក់ រដ្ឋមន្ត្រីក្រសួងកិច្ចការនារី លោកស្រី អ៊ឹង កន្ថាផាវី មានប្រសាសន៍ថា បច្ចុប្បន្នស្ត្រីនៅតែមានបញ្ហាប្រឈម និងមានឧបសគ្គមួយចំនួននៅឡើយពាក់ព័ន្ធទៅនឹងការចូលរួមធ្វើសេចក្តីសម្រេចចិត្ត និងនៅក្នុងវិស័យនយោបាយ។
លោកស្រីពន្យល់ពីបញ្ហាប្រឈមនេះថា គឺដោយសារឥរិយាបថសង្គមនៅមានការរើសអើងលើស្រី្ត ការទទួលបានការអប់រំរបស់ស្ត្រីនៅមានកម្រិត បន្ទុកធ្ងន់ធ្ងរលើកការទទួលខុសត្រូវក្នុងគ្រួសារ កង្វះខាតការគាំទ្រផ្នែកហិរញ្ញវត្ថុ និងការគាំទ្រពីគ្រួសារជាដើម។
ចំណែកក្នុងវិស័យនយោបាយវិញ លោកស្រីរដ្ឋមន្ត្រីក្រសួងកិច្ចការនារី បង្ហាញថា ស្រី្តនៅជួបកង្វះការគាំទ្រពីគណបក្ស និងប្រធានអង្គភាពរបស់ខ្លួន ក្នុងការដាក់បេក្ខភាពស្ត្រីនៅលំដាប់លេខរៀងខ្ពស់ ឬក្នុងការតម្លើងតួនាទី រួមទាំងទស្សនៈអវិជ្ជមានរបស់ស្ត្រីខ្លួនឯងដែលធ្វើឱ្យស្ត្រីមិនហ៊ានឈរឈ្មោះបោះឆ្នោត ឬទទួលតួនាទីតាមការតែងតាំង។
អ្នកស្រី ខាវ ខាំអន មេឃុំសាមឃួយ ស្រុកសេសាន ខេត្តស្ទឹងត្រែង បាននិយាយថា នៅមូលដ្ឋានដែលអ្នកស្រីរស់នៅបច្ចុប្បន្ន ចាប់ផ្តើមមានសមាសភាពស្រី្តក្នុងថ្នាក់ដឹកនាំកើនឡើងមួយកម្រិត ប៉ុន្តែបើប្រៀបធៀបទៅនឹងចំនួនបុរស នៅមានភាពខុសគ្នាឆ្ងាយនៅឡើយ។
អ្នកស្រីបានអំពាវនាវសូមឱ្យរដ្ឋាភិបាល ត្រូវយកចិត្តទុកដាក់បន្ថែមក្នុងការលើកស្ទួយស្ត្រីឱ្យបានច្រើន តាមរយៈការកំណត់សមាមាត្របុរសនិងស្ត្រីឱ្យមានភាពស្មើគ្នា។ អ្នកស្រី ខាវ ខាំអន ៖ នៅភូមិ ឃុំរបស់ខ្ញុំសមាមាត្ររវាងបុរស និងស្ត្រី គឺបុរសមានច្រើនជាងស្ត្រី។ ជាគំនិត និងអារម្មណ៍របស់ខ្ញុំផ្ទាល់ គឺចង់ឱ្យរដ្ឋាភិបាលធ្វើយ៉ាងណាលើកកម្ពស់ស្ត្រីឱ្យបានខ្ពស់ និយាយរួមក្នុងក្របខណ្ឌការងារអ្វីទាំងអស់ ទាំងថ្នាក់ជាតិ ថ្នាក់ក្រោមជាតិ គឺដាក់ស្ត្រីឱ្យបានស្មើភាពដូចបុរស។
ជុំវិញបញ្ហានេះ លោកស្រី ធីតា ឃិះ នាយិកាអង្គការសីលការ និងជាប្រធាននៃគណៈគ្រប់គ្រងនៃគណកម្មការលើកស្ទួយស្ត្រីក្នុងវិស័យនយោបាយ លើកឡើងថា ការផ្តល់ឱកាសដល់ស្ត្រីចូលរួមចំណែកក្នុងការធ្វើសេចក្តីសម្រេចចិត្ត និងក្នុងវិស័យនយោបាយបានច្រើននោះ នឹងធ្វើឱ្យប្រទេសជាតិមានការរីកចម្រើនទៅមុខបានឆាប់រហ័ស ព្រោះស្ត្រីមើលឃើញបញ្ហាបានគ្រប់ជ្រុងជ្រោយជាងបុរស។
លោកស្រី ធីតា ឃិះ ៖ «កាលណាស្ត្រីជាថ្នាក់ដឹកនាំ ហើយបានចូលរួមក្នុងការសម្រេចដោយស្មើភាពជាមួយបរុស នោះនឹងធ្វើឱ្យការសម្រេចចិត្តនោះមានប្រសិទ្ធភាព នេះមិនមែនសម្រាប់តែស្ត្រីទេ គឺសម្រាប់មនុស្សទូទាំងប្រទេសម្តង ព្រោះស្ត្រីមើលល្អិតជាង ហើយស្ត្រីមើលទៅលើការងារសង្គមកិច្ច ខាងផ្នែកគ្រួសារ និងសេដ្ឋកិច្ចបានច្រើន។
យោងតាមការអនុវត្តផែនការយុទ្ធសាស្ត្រនារីរតនៈទី៣ ឆ្នាំ២០០៩-២០១៣ បានបង្ហាញថា ក្នុងឆ្នាំ២០១៣ សន្ទស្សន៍នៃការចូលរួមរបស់ស្រី្ត ក្នុងទីផ្សារការងារមាន ៧៩,២% ដែលសន្ទស្សន៍នេះ បានបង្ហាញថាគម្លាតយេនឌ័រសកលក្នុងឆ្នាំ ២០១៣ ទាក់ទងនឹងការចូលរួមផ្នែកសេដ្ឋកិច្ចកម្ពុជាទទួលបានចំណាត់ថ្នាក់ខ្ពស់មធ្យមសម្រាប់ការចូលរួមរបស់ស្ត្រី ក្នុងកម្លាំងពលកម្ម។ រីឯនៅឆ្នាំ ២០១២ វិញ សមាជិកព្រឹទ្ធសភាជាស្ត្រីទទួលបានអាសនៈ ១៤,៧៥% ដែលមានការកើនឡើងបីដងក្នុងរយៈពេល ២ ទសវត្សរ៍ កន្លងមកនេះ។ ចំណែកសមាមាត្រស្ត្រីជាមន្ត្រីរាជការកើនឡើងពី ៣២% ក្នុងឆ្នាំ២០០៧ ដល់ ៣៧% ក្នុងឆ្នាំ២០១៣៕
