ជាថ្មីម្តងទៀត នៅថ្ងៃទី០១ ខែមីនា ឆ្នាំ២០២៣នេះ សម្តេច ហ៊ុន សែន នាយករដ្ឋមន្រ្តីបានប្រកាសលើកទឹកចិត្តឱ្យប្រជាពលរដ្ឋគួរចិញ្ចឹមសត្វកម្រជិតផុតពូជនៅតាមផ្ទះ ដែលអាចជាផ្នែកមួយជួយរកចំណូលតាមរយៈទេសចរផងដែរ។ការប្រកាសនេះ ខណៈសម្តេចចូលរួមប្រគល់សញ្ញាបត្រដល់និស្សិតវិទ្យាស្ថានតិចណូនៅថ្ងៃនេះ ដោយនាយករដ្ឋមន្រ្តីចង់ឱ្យពិនិត្យច្បាប់ជ្រើសរើសប្រភេទសត្វកម្រដទៃទៀត ដោយត្រូវអនុញ្ញាតឱ្យប្រជាពលរដ្ឋចិញ្ចឹមបាន។
សម្ដេចបន្ថែមថា ប្រជាពលរដ្ឋអាចរកកែច្នៃការចិញ្ចឹមសត្វព្រៃកម្រទៅជាការរកចំណូល ដោយទាក់ទាញទេសចរទៅទស្សនាបាន។
លោក ឌិត ទីណា រដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងតាមរយៈសារព័ត៌មានបារាំងអន្ដរជាតិពីទីក្រុងប៉ារីសថា ក្រសួងនឹងកែប្រែបទដ្ឋានច្បាប់ពាក់ព័ន្ធនានា និងជួយបច្ចេកទេសចិញ្ចឹមដល់ប្រជាពលរដ្ឋ ដើម្បីចិញ្ចឹមសត្វជិតផុតពូជឱ្យបានត្រឹមត្រូវ។ ក្រៅពីនេះ លោកថា ការចិញ្ចឹមសត្វព្រៃក៏ត្រូវផ្ទៀងផ្ទាត់លើនិយាមការបទដ្ឋានអន្ដរជាតិដូចគ្នា។
អង្គការជីវិតធម្មជាតិកម្ពុជាបានបង្ហាញការគាំទ្រចំពោះរាជរដ្ឋាភិបាលលើរឿងនេះ ហើយថានឹងចូលរួមពិនិត្យ និងសិក្សាពីផលប៉ះពាល់ ប្រសិនបើមានកិច្ចសហការឱ្យចូលរួមពីអ្នកពាក់ព័ន្ធ។
បែបនេះក្ដី រាជរដ្ឋាភិបាលថា បើសិនយកសត្វដែលប្រជាពលរដ្ឋចិញ្ចឹមទៅដាក់នៅសួនសត្វសាធារណៈដូចជាភ្នំតាម៉ៅ អាចធ្វើឱ្យសត្វកម្របាត់បង់ជិវិត ដោយខ្វះការយកចិត្តទុកដាក់ និងថែទាំ៕
