ភ្នំពេញ៖អតីតបុគ្គលិកវិទ្យុសំឡេងប្រជាធិបតេយ្យ VOD ចំនួន ២៨ នាក់ ពោលគឺស្មើប្រមាណពាក់កណ្តាលនៃបុគ្គលិកក្នុងស្ថាប័នមួយនេះ បានដាក់ពាក្យស្នើសុំចូលបម្រើការងារក្របខណ្ឌរដ្ឋ ខណៈឱសានវាទនៃការអនុញ្ញាតឱ្យបុគ្គលិក VOD អាចចូលបំរើការងារក្នុងក្របខណ្ឌរដ្ឋ បានបិទបញ្ចប់កាលពីថ្ងៃទី២៨ ខែកុម្ភៈ មិ្សលមិញ។
នេះបើតាមលោក ព្រុំ សុខា រដ្ឋមន្ត្រីក្រសួងមុខងារសាធារណៈ ប្រាប់បណ្តាញព័ត៌មាន Fresh News នៅថ្ងៃនេះ។
សម្រាប់ចំនួនបុគ្គលិកVODដែលបានដាក់ពាក្យសុំការងារក្របខណ្ឌរដ្ឋនេះលោក អ៊ិត សូធឿត នាយកផ្នែកប្រព័ន្ធផ្សព្វផ្សាយនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ(CCIM) ដែលគ្រប់គ្រងព័ត៌មាន វីអូឌី(VOD)ប្រាប់វិទ្យុស្រ្តីថា លោកពុំទាន់ក្តាប់បានតួលេខនេះច្បាស់លាស់នោះទេ។
តែយ៉ាងណាលោកថា បុគ្គលិកដែលបានដាក់ទៅភាគច្រើន គឺមិនមានសកម្មភាពការងារទៀតនោះទេ បន្ទាប់VODត្រូវបានបិទ។ តែលោកថា បុគ្គលិកដែលនៅសេសសល់កំពុងបន្តសកម្មភាពការងារតាមគម្រោងនានា ដែលលោកថាអាចនឹងរើសបុគ្គលិកបន្ថែមតម្រូវការជាក់ស្តែង។
ទោះយ៉ាងណា អ្នកគ្រប់គ្រងការផ្សាយព័ត៌មាននៅ វីអូឌីរូបនេះ នៅតែមានសុទិដ្ឋិនិយមថា សារព័ត៌មានដែលផ្តល់សំឡេងដល់ជនរងគ្រោះ ជនទន់ខ្សោយ ជនដែលគ្មានឱកាសបញ្ចេញសំឡេង តួយ៉ាងដូចVOD ជាដើមនោះ នឹងអាចមានវត្តមាននៅពេលអនាគតខាងមុខ ត្បិតវត្តមានរបស់សារព័ត៌មានឯករាជ្យគឺឆ្លុះបញ្ចាំងពីលំហលទ្ធិប្រជាធិបតេយ្យដែលមានចែងក្នុងរដ្ឋធម្មនុញ្ញ។
សំឡេងលោក អ៊ិត សូធឿត៖
បុគ្គលិក VOD ដែលបានដាក់ពាក្យសុំបម្រើការងារក្របខណ្ឌរដ្ឋនេះ ធ្វើឡើងបន្ទាប់ពីសម្តេច ហ៊ុន សែន នាយករដ្ឋមន្រ្តីបានចេញបទបញ្ជាក្នុងថ្ងៃទិវានៃក្តីស្រឡាញ់ កាលពីថ្ងៃទី១៤ ខែកុម្ភៈ ដោយសម្រេចផ្តល់ការងារក្របខណ្ឌមន្ត្រីរាជការជូនដល់អតីតបុគ្គលិករបស់វិទ្យុ VOD ដើម្បីដោះស្រាយការលំបាកក្នុងជីវភាព។
ការអនុគ្រោះផ្តល់ជូនការងារក្នុងក្របខណ្ឌរដ្ឋនេះ កើតមានឡើងបន្ទាប់ពីវិទ្យុ VOD ត្រូវបានសម្តេច ហ៊ុន សែន ចេញបញ្ជាឱ្យក្រសួងព័ត៌មានចេញសេចក្តីសម្រេចលុបចោលអាជ្ញាបណ្ណរបស់ វីអូឌី បន្ទាប់ពីស្ថាប័នមួយនេះត្រូវបាននាយករដ្ឋមន្រ្តីចោទថា បានផ្សាយព័ត៌មានខុស ហើយមិនព្រមកែតម្រូវ ឬសូមទោសជាសាធារណៈចំពោះកំហុសលើការផ្សាយនេះ។
សូមរំលឹកថា ស្ថាប័នVOD ត្រូវបានក្រសួងព័ត៌មាន ចេញសេចក្តីសម្រេចមួយលុបចោលអាជ្ញាបណ្ណកាលពីថ្ងៃទី១៣ខែកុម្ភៈឆ្នាំ២០២៣។ ការបិទស្ថាប័នព័ត៌មាននេះ កើតឡើងបន្ទាប់ពីនាយករដ្ឋមន្រ្តីមិនពេញចិត្តនឹងការផ្សាយអត្ថបទមួយដែលថា កូនប្រុសរបស់សម្តេច ហ៊ុន សែន គឺលោក ហ៊ុន ម៉ាណែត បានចុះហត្ថលេខាលើលិខិតមួយច្បាប់ស្តីពីការផ្តល់ជំនួយដល់ប្រទេសតួកគីដែលមានថវិកាចំនួន ១០ ម៉ឺនដុល្លារអាមេរិក៕
