លោក យ៉ង សាំងកុមារ បានផ្តល់អនុសាសន៍តាមរយៈអត្ថបទផ្សព្វផ្សាយរបស់អង្គការសេដាកនៅថ្ងៃទី១២ ខែធ្នូ ថា រដ្ឋាភិបាលត្រូវចំណាយថវិកាប្រមាណ ២០ លានដុល្លារ ក្នុងមួយឆ្នាំ លើអ្នកជំនាញកសិកម្មប្រមាណ ៣០០០ នាក់ ដើម្បីចុះជួយពង្រឹងសមត្ថភាពដល់ប្រជាកសិករក្នុងការផលិតស្រូវឱ្យបានទន្និផលខ្ពស់។
ការផ្តល់អនុសាសន៍នេះ ស្របពេលដែលគោលនយោបាយនាំអង្ករចេញឱ្យបាន ១ លានតោន នៅឆ្នាំ២០១៥ របស់រដ្ឋាភិបាលកម្ពុជា មិនទាន់អាចសម្រេចបានតាមការចង់បាននៅឡើយ។ ពោលគឺបានតែ៥០% តែប៉ុណ្ណោះ នៃផែនការដែលបានគ្រោងទុកកាលពីចុងឆ្នាំ២០១០។
បើទោះបីជាកម្ពុជានាំអង្ករចេញបានតែកន្លះលានតោនក្តី តែលោក យ៉ង សាំងកុមារ ប្រធានអង្គការសេដាក យល់ឃើញថា នេះគឺជាជោគជ័យដំបូងរបស់កម្ពុជាដែលអាចនាំអង្ករចេញបានរហូត ០,៥ លានតោន ក្នុងឆ្នាំ២០១៥ បើប្រៀបធៀបនឹងឆ្នាំ២០១១ ការនាំចេញបានប្រមាណតែ ២ សែនតោន ហើយក្នុងរយៈពេល៥ឆ្នាំ កន្លងមកនេះ កម្ពុជានាំអង្ករចេញសរុបបានជិត ១,៧ លានតោនតែប៉ុណ្ណោះ។
លោក យ៉ង សាំងកុមារ បន្តថាដើម្បីជំរុញឱ្យកម្ពុជាអាចសម្រេចបានការនាំអង្ករចេញបាន ១០០% ជំនួសដោយការនាំស្រូវចេញវិញនោះ រដ្ឋាភិបាលត្រូវចំណាយថវិកាប្រមាណ ២០ លានដុល្លារ ក្នុងមួយឆ្នាំ លើអ្នកជំនាញកសិកម្មឱ្យបានយ៉ាងហោចណាស់ ១នាក់ ទៅ ៣នាក់ ក្នុងមួយឃុំដើម្បីជួយពង្រឹងសមត្ថភាពដល់កសិករ ជួយកសិករក្នុងការចងក្រងជាសហគមន៍កសិកម្មដើម្បីរួមគ្នាផ្សារភ្ជាប់មកទីផ្សារ អនុលោមតាមច្បាប់សហគមន៍កសិករដែលមានស្រាប់។
មួយវិញទៀត រដ្ឋាភិបាលត្រូវដោះស្រាយបញ្ហាទឹក ជូនដល់គ្រួសារកសិករ ដោយត្រូវស្តារ គ្រប់គ្រង និងថែរក្សាប្រព័ន្ធធារាសាស្ត្រដែលមានស្រាប់ និងត្រូវផ្តល់ទុនដល់កសិករ ក្នុងការជីកស្រះតាមស្រែដើម្បីស្តុកទឹកភ្លៀងទុកស្រោចស្រពបន្ថែម និងសម្រាប់ធ្វើកសិកម្មចម្រុះ។
លោក យ៉ង សាំងកុមារ បានអំពាវនាវ ដល់រដ្ឋាភិបាលគួរផ្តល់ឥណទានដល់សហគមន៍កសិកម្ម យកទៅធ្វើកន្លែងសម្ងួត ធ្វើជាឃ្លាំងស្តុកទុកនៅតាមមូលដ្ឋាន។ ជាពិសេសនោះ រដ្ឋាភិបាល គួរមានគោលនយោបាយកាត់បន្ថយតម្លៃអគ្គិសនី តាមរោងម៉ាស៊ីនកិនស្រូវ និងកាត់បន្ថយតម្លៃដឹកជញ្ជូន ជាពិសេសកាត់បន្ថយនូវចំណាយរដ្ឋបាលផ្សេងៗដើម្បីកាត់បន្ថយថ្លៃដើមអង្ករជាដើម។
សូមបញ្ជាក់ថាក្នុងរយៈពេល ១០ខែ ក្នុងឆ្នាំ២០១៥ នេះ កម្ពុជានាំចេញអង្ករទៅកាន់ទីផ្សារអន្តរជាតិបានចំនួនជាង ៤ សែនតោន កើនឡើង ៣៣.៩ ភាគរយ បើធៀបនឹងរយៈពេលដូចគ្នាកាលពីឆ្នាំ២០១៤៕
