en     km
en     km

អ្នកជំនាញការបោះឆ្នោត ចាត់ទុកការបដិសេដការសុំទោសរបស់សម្តេច ហ៊ុន សែន ជាបរិយាកាសនយោបាយមិនល្អមុនការបោះឆ្នោត

Share

សម្តេចតេជោ ហ៊ុន សែន បានបដិសេធមិនទទួលយកលិខិតសុំទោសរបស់លោក សុន ឆ័យ អនុប្រធានគណបក្សភ្លើងទៀននោះទេ ចំពោះការចោទប្រកាន់គណបក្សប្រជាជនកម្ពុជាថាបាន «លួចសន្លឹកឆ្នោត» កាលពីការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥។ ក្រោយការប្រកាសដាច់ណាត់បែបនេះ អ្នកជំនាញដែលតាមដានការបោះឆ្នោតនៅកម្ពុជា បានបង្ហាញក្ដីបារម្ភពីផលលំបាកសម្រាប់បណ្ដាគណបក្សនយោបាយដែលត្រូវចូលរួមក្នុងការបោះឆ្នោតខាងមុខ។

លោក គីម ចាន់ចាវ រាយការណ៍

 

 

សម្តេច ហ៊ុន សែន តាមរយៈបណ្តាញសង្គម នៅព្រឹកថ្ងៃទី២៨ ខែកុម្ភៈ បានឆ្លើយតបចំពោះសារលិខិតសុំទោសរបស់លោក សុន ឆ័យ ​ យ៉ាងដូច្នេះថា៖ «យើងមិនទទួលយកការសុំទោសនោះឡើយ។ យើងចង់បញ្ចប់វប្បធម៌លាបពណ៌ និងការប្រមាថ។ យើងទទួលយកមិនបាននូវការចោទប្រកាន់ថា យើងជាអ្នកលួចសន្លឹកឆ្នោត។យើងធ្លាប់ត្រូវបានគេសុំទោសច្រើនដងហើយតែរឿងច្រំដែលនៅតែកើតឡើងទើបយើងចង់បញ្ចប់វប្បធម៌រឿងដដែលហើយសូមទោសតាមផ្លូវតុលាការដើម្បីឲ្យមនុស្យអាក្រក់វារាងចាល»។

 

ចៅក្រម​តុលាការ​កំពូល កាលពីថ្ងៃទី២៣ កុម្ភៈ បាន​បដិ​សេធ​បណ្តឹង​សារទុក្ខ​របស់​មេធាវី ជូង ជូងី ដែល​ការពារ​ក្តី​ឱ្យ​លោក សុន ឆ័យ និង​បានតម្តល់​សាល​ដីកា​របស់​សាលា​ឧទ្ធរណ៍​លើ​សំណុំ​រឿង​«​បរិហារកេរ្តិ៍ជា​សាធារ​ណៈ​»​ ចាត់​ទុក​ជា​បាន​ការ​ដដែល​។ នេះ​ជា​សំណុំ​រឿង«​បរិយា​កេរ្តិ៍​ជាសាធារណៈ»ពាក់​ព័ន្ធ​នឹង​ការ​រិះគន់​របស់​លោក សុន ឆ័យ លើ​ភាព​មិន​ប្រក្រតី​ ការ​បោះ​ឆ្នោត​ក្រុម​ប្រឹក្សា​ឃុំ​សង្កាត់​កាល​ពី​ឆ្នាំ​មុន។

បើ​តាម​សាល​ដីកា​របស់​សាលា​ឧទ្ធរណ៍​ កាល​ពី​ខែ​ធ្នូ​ ឆ្នាំ​២០​២២​ តុលាការ​បាន​សម្រេច​ពិន័យ​ លោក សុន ឆ័យ ចំនួន​១០​លាន​រៀល​បង់​ចូល​រដ្ឋ​ និង​សង​ជំងឺ​ចិត្ត​ទៅ​គណ​បក្ស​ប្រជា​ជន​កម្ពុជា​ចំនួន​ ៤​ពាន់​លាន​រៀល ឬប្រមាណ​១លាន​ដុល្លារ​អាមេរិក​ និង​សម្រេច​ពិន័យ​ ១០​លាន​រៀល​ចូល​ថវិកា​ជាតិ​ផ្សេង​ទៀត​ទៅ​គណៈ​កម្មា​ធិការ​ជាតិ​រៀប​ចំកា​រ​បោះ​ឆ្នោត។

កន្លងមក មុននឹងឈានដល់ការសុំទោសមេបក្សកាន់អំណាចបែបនេះ អនុប្រធានគណបក្សភ្លើងទៀន បានអះអាងថា អ្វីដែលលោកលើកឡើង គឺក្នុងន័យស្ថាបនាការបោះឆ្នោតឲ្យមានភាពល្អប្រសើរ ហើយក៏មិនមែនត្រូវបានប្តឹងផ្តល់យ៉ាងដូច្នេះដែរ។ អ្វីដែលគួរឲ្យចម្លែកសម្រាប់លោក សុន ឆ័យ គឺគណៈកម្មាធិការជាតិរៀបចំការបោះឆ្នោត ដែលជាស្ថាប័នអាជ្ញាកណ្តាល បែរជាមកប្តឹងលោក ដោយមិនព្យាយាមចុះទៅពិនិត្យបញ្ហាដែលលោក និងគណបក្សនយោបាយមួយចំនួនផ្សេងទៀត បានលើកឡើង។

 

 

លើករណីនេះ លោក សម គន្ធាមី នាយក​ប្រតិបត្តិ​គណៈកម្មាធិការ   អព្យាក្រឹត និង​យុត្តិធម៌​ដើម្បី​ការ​បោះឆ្នោត​ដោយ​សេរី និង​ត្រឹមត្រូវ​នៅ​កម្ពុជា ហៅកាត់ថា (NICFEC)  បានបង្ហាញក្ដីបារម្ភពីផលលំបាកសម្រាប់បណ្ដាគណបក្សនយោបាយដែលត្រូវប្រជែងក្នុងការបោះឆ្នោតខាងមុខ។ លំបាកត្រង់ថា គណបក្សប្រឆាំងអាចនឹងមានក្ដីបារម្ភទៅលើការបញ្ចេញមតិឃោសនាបោះឆ្នោត និងការរិះគន់លើប្រព័ន្ធនៃការបោះឆ្នោត។

«វាពាក់ព័ន្ធនឹងគណបក្សផ្សេងៗទៀត មិនថាគណបក្សហ្នឹងទេ ដោយសារឃើញគណបក្សភ្លើងទៀនជាគំរូស្រាប់ហើយ ប្អូនណា៎..។ ហើយគណបក្សនយោបាយផ្សេងៗទៀតគ្នាជួបការលំបាកហើយ។ មានការបារម្ភច្រើនក្នុងការរិះគន់ ក្នុងការលើកឡើងពីភាពមិនប្រក្រតីសព្វបែបយ៉ាងហ្នឹងបាទ នៅពេលខាងមុខហ្នឹង។ មិនត្រឹមប៉ុណ្ណឹងទេ បរិយាកាសនយោបាយក៏វាមិនអំណោយផលដែរបាទ ព្រោះអីគណបក្សមានការបារម្ភនឹងសុវត្ថិភាព ក្នុងការលើកពីមតិឡើង។ សុវត្ថិភាពហ្នឹងខ្លាចការ ប្ដឹងផ្ដល់ដូចលោកសុន ឆ័យ? អាចដែរ ព្រោះអីវាអាចពាក់ព័ន្ធដល់បុគ្គលផង ពាក់ព័ន្ធដល់គណបក្សផង»។

 

 

សម្តេច ហ៊ុន សែន ដែលប្រកាសដាច់ខាតមិនលើកលែងដល់ លោក​ សុន ឆ័យ បានរំលឹកអំពីការសុំទោសរបស់ លោក សម រង្ស៉ី ហើយដែលសម្តេចធ្លាប់បានលើកលែងទោសឱ្យនាពេលកន្លងទៅ ។ មេបក្សកាន់អំណាចសរសេរថា «ភាពខ្លួនឯងបានដឹងច្បាស់ហើយតើសម រង្ស៊ីធ្លាប់បានសូមទោសខ្ញុំតែទីបំផុតវាកើតដដែល។ អ្នកគាំទ្រវាគឺដូចគ្នាដែលយើង ត្រូវតែប្រើផ្លូវច្បាប់ដើម្បីបញ្ចប់រឿងច្រំដែលនេះ»។

 

 

វិទ្យុស្ត្រីមិនអាចទាក់ទងសុំការឆ្លើយតប ពីលោក សុន ឆ័យបានទេនៅថ្ងៃទី២៨ ខែកុម្ភៈ នេះ ដោយទូរសព្ទខលចូលតែគ្មានអ្នកទទួល។ ដោយសារតែនេះជាបណ្ដឹងជុំវិញការបោះឆ្នោត លោក សម គន្ធាមី អំពាវនាវដល់ ភាគីគណបក្សបក្សនយោបាយ គួរដោះស្រាយបណ្ដឹងតាមរយៈគ.ជ.ប។ ទោះយ៉ាងណា លោកយល់ថា លោក សុន​ ឆ័យ បានចាញ់ក្ដីហើយ គួរតែបញ្ចប់រៀងនេះដោយស្ងប់ស្ងាត់ ដោយអនុគ្រោះពីការផ្ដល់សំណង។

«រឿងហ្នឹងគួរតែបញ្ចប់ដោយសារកុំ ទទួលយកសំណងហា៎។ ព្រោះអីតុលាការកាត់ក្ដីឱ្យចាញ់ហើយ ហើយគាត់សុំទោសហើយ គួរតែបញ្ចប់ករណីហ្នឹង តែម្ដងទៅកុំឱ្យវែងឆ្ងាយតទៀត ដើម្បីធានាបរិយាកាសឱ្យវារលូនបន្ដិតនៅមុនបោះឆ្នោតហ្នឹង»។

ការសុំទោសរបស់លោក សុន ឆ័យ ចំពោះសម្តេចហ៊ុន​ សែន នៅពេលនេះ ក្រោយពីមន្ត្រីជាន់ខ្ពស់បក្សប្រឆាំងរូបនេះ បានព្យាយាមប្ដឹងទាស់អស់លទ្ធភាព ទៅតុលាការទំាងជាន់ទាប និងជាន់ខ្ពស់ ប៉ុន្តែមិនទទួលបានជោគជ័យ៕

 

 

Share

Image
Image
Image