en     km
en     km

ព្រលានយន្ដហោះតារាសាគរខេត្តកោះកុងគ្រោងបើកហោះហើរជាថ្មីនាពាក់កណ្ដាលឆ្នាំ២០២៣

Share

ភ្នំពេញ៖ ព្រលានយន្ដហោះស្ថិតនៅប៉ែកនិរតី នៃខេត្តកោះកុង គឺព្រលានយន្តហោះតារាសារគរ នឹងបើកការហោះហើរឡើងវិញនៅពាក់កណ្ដាលឆ្នាំ២០២៣នេះ ក្រោយពេលពន្យាពេលហោះហើរពីរដងដោយសារវិបត្តិកូវីដ១៩។ នេះបើតាមការឱ្យដឹងពីលោកស្រី មិថុនា ភូថង អភិបាលខេត្តកោះកុង ខណៈចូលរួមសន្និសីទសារព័ត៌មាន ស្ដីពី ភាពជោគជ័យក្នុងរយៈពេល ៥ ឆ្នាំកន្លងមក របស់រដ្ឋបាលខេត្តកោះកុងនៅថ្ងៃទី២១ ខែ កុម្ភៈ ឆ្នាំ២០២៣។


សូមជម្រាបថា ព្រលានយន្ដហោះនេះ សាងសង់រួចរាល់កាលពីឆ្នាំ ២០២០ ដោយចំណាយថវិកាទំហំ២០០លានដុល្លារ។ ព្រលានយន្ដហោះនេះ វិនិយោគដោយក្រុមហ៊ុនចិន Union Development Group បើកការសាងសង់តាំងពីឆ្នាំ២០១៨។
បើតាមរដ្ឋបាលខេត្តធ្លាប់បានលើកឡើងថា ព្រលានយន្ដហោះនេះ ជាការវិនិយោគសម្រាប់គាំទ្រ ដល់ពហុបំណងនិងវិស័យទេសចរណ៍។ អាកាសយានដ្ឋាននេះ មានសមត្ថភាពផ្តល់ការចុះចតប្រភេទយន្តហោះលំដាប់4E បាន ដូចជាយន្តហោះប្រភេទ Boeing-777 និង Airbus A-340/A-350។


សមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន  ធ្លាប់បានលើកឡើងថា អាកាសយានដ្ឋានអន្តរជាតិតារាសាគរមួយនេះ នឹងជំរុញដំណើរការទេសចរណ៍ឱ្យមានសកម្មភាព និងកំណើន ស្របពេលដែលកម្ពុជាបានប្រកាសបើកទទួលទេសចរអន្តរជាតិ៕

Share

Image
Image
Image