ដើម្បីចូលរួមផ្សព្វផ្សាយអំពីសុវត្ថិភាពចរាចរណ៍ និងការពាក់មួកសុវត្ថិភាព ស្របពេលដែល ច្បាប់ចរាចរណ៍ផ្លូវគោក នឹងចូលជាធរមាននៅដើមឆ្នាំ២០១៦នោះ ក្លឹបអ្នកកាសែត កម្ពុជា សហការជាមួយអង្គការមូលនិធិបង្ការរបសួអាស៊ី(AIP) និងរៀបចំសិក្ខាសាលាមួយ ជុំវិញ ការផ្សព្វផ្សាយ អំពីសុវតិ្ថភាពចរាចរណ៍រយៈពេលបីថ្ងៃ នៅឯខេត្តព្រះសីហនុ។
សិក្ខាសាលានេះនឹងរៀបចំនៅខេត្តព្រះសីហនុ ចាប់ពីថ្ងៃទី២៣ ដល់ថ្ងៃទី២៥ធ្នូ ខាងមុខនេះ ។
ថ្លែងប្រាប់វិទ្យុស្ដ្រីFM102 នៃមណ្ឌលព័ត៌មានស្ដ្រីកម្ពុជា នៅថ្ងៃទី១០ ធ្នូ ឆ្នាំ២០១៥ លោក ប៉ែន បូណា ប្រធានក្លឹបអ្នកកាសែតកម្ពុជា បានឲ្យដឹងថា ដើម្បីចូលរួមផ្សព្វផ្សាយ អំពីសុវត្ថិភាព ចរាចរណ៍ និងការពាក់មួកសុវត្ថិភាពនេះ ក្លឹបអ្នកកាសែតកម្ពុជា ដែលទទួលបានការសហការ ជាមួយអង្គការមូលនិធិបង្ការរបសួអាស៊ី(AIP) នឹងរៀបចំសិក្ខាសាលាមួយ ដើម្បីបណ្ដុះបណ្ដាលអ្នកសារព័ត៌មាន អំពីសុវត្ថិភាព ចរាចរណ៍ និងការពាក់មួកសុវត្ថិភាព។
លោក ប៉ែន បូណា បានឲ្យដឹងបន្ថែមថា ក្រៅពីគោលបំណង ទាំងនេះ សិក្ខាសាលានៅពេល នោះ ក៏មានគោលបំណងសំខាន់មួយទៀត នាំយកចំណេះដឹង ពីការផ្សព្វផ្សាយនេះ ផ្ដល់ទៅ អ្នកកាសែត ដូចជា ចំណេះដឹងពីច្បាប់ចរាចរណ៍ផ្លូវគោកថ្មី ចំណេះដឹងពីសារៈប្រយោជន៍ នៃមួកសុវត្ថិភាព។ ហើយ ទន្ទឹមនឹងនេះ អ្នកសារព័តមាន ក៏នឹងមានឱកាសជួបសម្ភាស ផ្ទាល់ជាមួយជាមួយមន្ដ្រីប៉ូលីសទាក់ទងនឹងច្បាប់ចរាចរណ៍ផ្លូវគោកថ្មីនេះផងដែរ។
«ផ្ដើមមុនគេ គឺការយល់ដឹងរបស់អ្នកកាសែតយើង ពីច្បាប់ចរាចរណ៍ផ្លូវគោកថ្មីហ្នឹង តើវា យ៉ាងម៉េច? វាមានលក្ខណៈពិសេសអី? ហើយគេក៏និយាយអំពីមួកសុវត្ថិភាព ការប្រើប្រាស់មួក សុវត្ថិភាពយ៉ាងម៉េច? ហើយបើយើងអត់ពាក់មួកសុវត្ថិភាព ច្បាប់ចរាចរណ៍ហ្នឹង គឹផាកពិន័យ យ៉ាងម៉េច? ផលប្រយោជន៍មួកសុវត្ថិភាពហ្នឹងគឹមានសារៈសំខាន់អី?»។
សូមជម្រាបថា សិក្ខាសាលា អំពីការផ្សព្វផ្សាយ អំពីសុវតិ្ថភាពចរាចរណ៍ រយៈពេលបីថ្ងៃ នៅឯខេត្តព្រះសីហនុនេះ មានអ្នកសារព័ត៌មាន ចួមរួមជាច្រើន សឹងតែគ្រប់ស្ថាប័ន ទាំង វិទ្យុ ទូរទស្សន៍ ការសែត និង វេបសាយ នៅរាជធានីភ្នំពេញ៕