ប៉េកាំង៖ ប្រទេសចិន និងអ៊ីរ៉ង់បានជំរុញឱ្យអាហ្វហ្គានីស្ថានដែលជាប្រទេសជិតខាងខ្លួន បញ្ចប់ការរឹតបន្តឹងការងារ និងការអប់រំលើស្ត្រី។ការអំពាវនាវនេះបានធ្វើឡើងនៅក្នុងសេចក្តីថ្លែងការណ៍រួមមួយដែលបានចេញផ្សាយកាលពីថ្ងៃព្រហស្បតិ៍ទី១៦ កុម្ភៈ ២០២៣ នៅពេលបញ្ជប់ដំណើរទស្សនកិច្ចរបស់ប្រធានាធិបតីអ៊ីរ៉ង់លោក Ebrahim Raisi ទៅកាន់ទីក្រុងប៉េកាំង។
សេចក្តីថ្លែងការណ៍រួមរបស់ចិននិងអ៊ីរ៉ង់បានអំពាវនាវឱ្យមេដឹកនាំអាហ្វហ្គានីស្ថានបង្កើតរដ្ឋាភិបាលមួយដោយមានរួមបញ្ចូលក្រុមជនជាតិភាគតិច និងក្រុមអ្នកនយោបាយទាំងអស់ ហើយលុបចោលរាល់វិធានការរើសអើងប្រឆាំងនឹងស្ត្រី ជនជាតិភាគតិច និងសាសនាដទៃទៀត”។ សហរដ្ឋអាមេរិក និងសម្ព័ន្ធមិត្តណាតូ «គួរតែទទួលខុសត្រូវចំពោះស្ថានភាពបច្ចុប្បន្ននៅអាហ្វហ្គានីស្ថាន»។ចាប់តាំងពីចូលកាន់កាប់ប្រទេសអាហ្វហ្គានីស្ថានក្នុងខែសីហា ឆ្នាំ 2021 ក្រុមតាលីបង់បានហាមឃាត់ស្ត្រី និងក្មេងស្រីមិនឱ្យចូល រៀននៅមធ្យមសិក្សា និងសាកលវិទ្យាល័យ។
ការអំពាវនាវឱ្យគោរពសិទ្ធិស្ត្រីពីសំណាក់ប្រទេសអ៊ីរ៉ង់គួរឱ្យភ្ញាក់ផ្អើល ដែលប្រទេសនេះមានការតវ៉ាជាច្រើនខែមកហើយ ដោយសារការស្លាប់នារីវ័យក្មេងឈ្មោះMahsa Amini នៅក្នុងមន្ទីរឃុំឃាំងរបស់ប៉ូលីសសីលធម៌អ៊ីរ៉ង់ ពីបទស្លៀកពាក់មិនត្រឹមត្រូវតាមបែបឥស្លាមប្រកាន់តឹង។ជាមួយគ្នានេះ ប្រទេសអ៊ីរ៉ង់បានប្រហារជីវិតមនុស្សយ៉ាងហោចណាស់បួននាក់ ចាប់តាំងពីបាតុកម្មបានចាប់ផ្តើមនៅក្នុងខែកញ្ញា មកដល់ពេលនេះ ។
សេចក្តីថ្លែងការណ៍រួមចិន-អ៊ីរ៉ង់ភាគច្រើនបានសង្កត់ធ្ងន់លើទំនាក់ទំនងនយោបាយ និងសេដ្ឋកិច្ចដ៏រឹងមាំ ការស្វែងរកសន្តិភាព និងយុត្តិធម៌នៅមជ្ឈិមបូព៌ា និងការរំសាយអាវុធនុយក្លេអ៊ែរ។នៅក្នុងជំនួបលើកមុនជាមួយមេដឹកនាំចិន លោក Xi Jinping លោកប្រធានាធិបតីអ៊ីរ៉ង់ Raisi បានសម្តែងការគាំទ្រចំពោះការបង្រ្កាបរបស់ចិនលើអ្នកតវ៉ានៅហុងកុង និងគាំទ្រការទាមទារតៃវ៉ាន់ឱ្យមកនៅក្រោមការគ្រប់គ្រងរបស់ចិនវិញ។
លោក Xi បានថ្លែងនៅក្នុងសេចក្តីថ្លែងការណ៍មួយដែលធ្វើឡើងដោយទូរទស្សន៍រដ្ឋចិនថា “ប្រទេសចិនគាំទ្រអ៊ីរ៉ង់ក្នុងការការពារអធិបតេយ្យភាពជាតិ” និង “ប្រឆាំងនឹងឯកតោភាគីនិយម និងការគំរាមកំហែង” ។រដ្ឋាភិបាលចិនបានប្រកាសថា លោក Xi និង Raisi បានចូលរួមការចុះហត្ថលេខាលើកិច្ចព្រមព្រៀងសហប្រតិបត្តិការចំនួន 20 រួមទាំងពាណិជ្ជកម្ម និងទេសចរណ៍។ បន្ថែមលើនេះកិច្ចព្រមព្រៀងយុទ្ធសាស្ត្ររយៈពេល 25 ឆ្នាំដែលបានចុះហត្ថលេខានៅឆ្នាំ 2021 ដើម្បីសហការក្នុងការអភិវឌ្ឍប្រេង ឧស្សាហកម្ម និងវិស័យផ្សេងៗទៀត។ប្រទេសចិនជាប្រទេសមួយក្នុងចំណោមប្រទេសដែលបានទិញប្រេងអ៊ីរ៉ង់ច្រើនជាងគេ និងជាប្រភពវិនិយោគដ៏សំខាន់សម្រាប់អ៊ីរ៉ង់ដែរ។ អ៊ីរ៉ង់បានតស៊ូអស់ជាច្រើនឆ្នាំក្រោមទណ្ឌកម្មហិរញ្ញវត្ថុ និងពាណិជ្ជកម្ម ដែលដាក់ដោយក្រុងវ៉ាស៊ីនតោន និងរដ្ឋាភិបាលលោកខាងលិច។ រដ្ឋាភិបាលអាមេរិកបានកាត់ផ្តាច់អ៊ីរ៉ង់មិនឱ្យមានបណ្តាញតភ្ជាប់ជាមួយធនាគារនានាក្នុងសកលលោកនៅឆ្នាំ ២០១៨។
ប្រភព៖ AP ថ្ងៃទី ១៧ ខែកុម្ភៈ ឆ្នាំ ២០២៣
