ភ្នំពេញ៖ លោក អ៊ិត សូធឿត នាយកផ្នែកប្រព័ន្ធផ្សព្វផ្សាយនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ(CCIM) ដែលគ្រប់គ្រងព័ត៌មានវីអូឌី(VOD)ប្រាប់វិទ្យុស្រ្តីនៅល្ងាចថ្ងៃទី១៥ ខែកុម្ភៈឆ្នាំ២០២៣ថា រហូតមកទល់ពេលនេះ បុគ្គលិក VOD ពុំទាន់មាននរណាម្នាក់លាឈប់ពី VOD ហើយទៅទទួលយកការងារក្នុងក្របខ័ណ្ឌរបស់រាជរដ្ឋាភិបាលនៅឡើយទេ។ លោក សូធឿត បន្តថា ក្រុមការងារផ្នែកព័ត៌មាននៅVOD មានជំហររឹងមាំ និងស្រលាញ់ការងារនៅ VOD ដែលលោកអាចរំពឹងថា ពួកគេនឹងមិនចាកចេញពី VOD ឡើយ។
តែយ៉ាងណាលោកថា ការចាកចេញទៅយកតំណែងឬតួនាទីការងារក្នុងក្របខ័ណ្ឌជាមន្រ្តីតាមក្រសួងរបស់រដ្ឋាភិបាល គឺជាសេរីភាពរបស់ពួកគេ ដោយស្ថាប័នមិនហាមឃាត់ឬរារាំងការសម្រេចចិត្តរបស់បុគ្គលិកឡើយ។
សំឡេងលោក អ៊ិត សូធឿត៖
ការផ្តល់ព័ត៌មានពីលោក អ៊ិត សូធឿត ជុំវិញស្ថានភាពថ្មីៗនៅស្ថាប័នVODនេះ បន្ទាប់ពីសម្តេច ហ៊ុន សែន បានឱ្យក្រសួងព័ត៌មានចេញសេចក្តីសម្រេចលុបចោលអាជ្ញាបណ្ណរបស់ វីអូឌី និងបន្ទាប់ពីសម្តេច ហ៊ុន សែន កាលពីថ្ងៃទី១៤ ខែកុម្ភៈ ម្សិលមិញ បានសម្រេចផ្តល់ក្របខ័ណ្ឌរដ្ឋសម្រាប់បុគ្គលិកVODដែលមានបំណងចូលបំរើកិច្ចការរដ្ឋ។សម្តេច ហ៊ុន សែន បន្តថាករណីបុគ្គលិកVOD ចង់បានការងារក្នុងក្របខ័ណ្ឌ គឺទំនាក់ទំនងជាមួយក្រសួងមុខងារសាធារណៈ ដើម្បីដាក់ពាក្យសុំធ្វើការបាន។
នាយករដ្ឋមន្រ្តី បញ្ជាឱ្យរដ្ឋមន្ត្រីក្រសួងមុខងារសាធារណៈ ត្រូវទទួលយកពាក្យសុំនិងបែងចែកទៅតាមក្រសួងនានាស្របតាមមុខជំនាញនិងត្រូវសុំការសម្រេចចុងក្រោយពីនាយករដ្ឋមន្រ្តី។
សម្តេច ហ៊ុន សែន បានសរសេរបន្ថែមលើទំព័រហ្វេសប៊ុក ដោយដាក់ការស្តីបន្ទោសលើថ្នាក់ដឹកនាំរបស់VODថា ការបាត់បង់ការងាររបស់បុគ្គលិកVOD ដែលធ្វើឱ្យពួកគេអាចប៉ះពាល់ជីវភាពគឺមកពីកំហុសរបស់អ្នកដឹកនាំនៅ VOD។
ស្ថាប័នVOD ត្រូវបានក្រសួងព័ត៌មាន ចេញសេចក្តីសម្រេចមួយលុបចោលអាជ្ញាបណ្ណកាលពីថ្ងៃទី១៣ខែកុម្ភៈឆ្នាំ២០២៣។ ការបិទស្ថាប័នព័ត៌មាននេះ កើតឡើងបន្ទាប់ពីនាយករដ្ឋមន្រ្តីមិនពេញចិត្តនឹងការផ្សាយអត្ថបទមួយដែលថា កូនប្រុសរបស់សម្តេច ហ៊ុន សែន គឺលោក ហ៊ុន ម៉ាណែត បានចុះហត្ថលេខាលើលិខិតមួយច្បាប់ស្តីពីការផ្តល់ជំនួយដល់ប្រទេសតួកគីដែលមានថវិកាចំនួន ១០ ម៉ឺនដុល្លារអាមេរិក។
