មនុស្សរាប់ពាន់នាក់បានស្នើសុំយកទារិកាដែលកើតនៅក្រោមគំនរអគារបាក់រលំនៅភាគពាយព្យប្រទេសស៊ីរី បន្ទាប់ពីគ្រោះរញ្ជួយដីកាលពីថ្ងៃចន្ទទី៦ កុម្ភៈ ២០២៣។នៅពេលទារិកា Aya ត្រូវបានជួយសង្គ្រោះគេឃើញទងផ្ចិតនាងជាប់ជាមួយម្តាយនៅឡើយ។ព្រឹត្តិការណ៍នេះគេជឿថាជាអព្ភូតហេតុដ៏អស្ចារ្យនៅក្នុងជំនឿសាសនាអារ៉ាប់។
ម្តាយ ឪពុក និងបងប្អូនបង្កើតរបស់ទារិកា Aya ទាំងអស់បានស្លាប់ បន្ទាប់ពីគ្រោះរញ្ជួយដីបានវាយប្រហារទីក្រុង Jindayris ។ពេលនេះទារិកា Aya កំពុងសម្រាកនៅមន្ទីរពេទ្យ។គ្រូពេទ្យកុមារលោកHani Marouf ដែលមើលថែនាងបាននិយាយថា “នាងបានមកដល់មន្ទីរពេទ្យកាលពីថ្ងៃចន្ទក្នុងស្ថានភាពអាក្រក់បែបនេះ នាងមានស្នាមជាំ នាងត្រជាក់រងា និងស្ទើរតែគ្មានដង្ហើម”។ឥឡូវនេះនាងស្ថិតក្នុងស្ថានភាពនឹងនរ។
វីដេអូនៃការជួយសង្គ្រោះទារិកា Aya បានផ្សព្វផ្សាយពាសពេញបណ្តាញសង្គម។ វីដេអូបង្ហាញពីបុរសម្នាក់រត់ចេញពីអគារបាក់រលំមួយដោយបីទារិកាដែលប្រលាក់សុទ្ធតែធូលី។Khalil al-Suwadi ជាសាច់ញាតិឆ្ងាយម្នាក់ ដែលនៅកន្លែងកើតហេតុ នៅពេលដែលទារិកាត្រូវបានទាញចេញទៅកាន់កន្លែងសុវត្ថិភាព បាននាំទារិកាទើបនឹងកើតទៅមន្ទីពេទ្យនៅក្នុងទីក្រុង Afrin ប្រទេសស៊ីរី។
មនុស្សរាប់ពាន់នាក់នៅលើបណ្ដាញសង្គមស្នើសុំនាងទៅចិញ្ចឹម។មនុស្សម្នាក់បាននិយាយថា៖ «ខ្ញុំចង់ចិញ្ចឹមនាង ហើយផ្តល់ជីវិតសមរម្យដល់នាង។ពិធីករព័ត៌មានទូរទស្សន៍គុយវ៉ែតម្នាក់បាននិយាយថា “ខ្ញុំត្រៀមខ្លួនរួចជាស្រេចដើម្បីមើលថែ និងចិញ្ចឹមកូននេះ ប្រសិនបើនីតិវិធីផ្លូវច្បាប់អនុញ្ញាតឱ្យខ្ញុំយកនាងមកចិញ្ចឹម”។
អ្នកគ្រប់គ្រងមន្ទីរពេទ្យ Khalid Attiah និយាយថា គាត់បានទទួលការហៅទូរស័ព្ទរាប់សិបដងពីមនុស្សជុំវិញពិភពលោកដែលចង់យកទារិកា Aya ធ្វើជាកូនចិញ្ចឹម។វេជ្ជបណ្ឌិត Attiah ដែលមានកូនស្រីអាយុទើបតែបួនខែបាននិយាយថា “ខ្ញុំនឹងមិនអនុញ្ញាតឱ្យអ្នកណាយកនាងឥឡូវនេះទេ។ រហូតដល់គ្រួសារសាច់ញាតិរបស់នាងត្រឡប់មកវិញ ខ្ញុំនឹងចាត់ទុកនាងដូចជាកូនរបស់ខ្ញុំ”។ពេលនេះប្រពន្ធរបស់ខ្ញុំកំពុងបំបៅដោះទារិកាជាមួយកូនស្រីខ្លួនឯង។
នៅទីក្រុង Jindayris ប្រទេសស៊ីរី ដែលជាស្រុកកំណើតរបស់ទារិកា Aya ។លោក Mohammed al-Adnan បានប្រាប់ BBC ថា “ស្ថានភាពគឺជាគ្រោះមហន្តរាយ។ មានមនុស្សច្រើនណាស់នៅក្រោមគំនរអគារបាក់បែក។ មានមនុស្សជាច្រើនដែលយើងមិនទាន់បានយកចេញនៅឡើយ”។លោកបានប៉ាន់ប្រមាណថា 90% នៃទីក្រុងនេះត្រូវបានបំផ្លាញ ហើយជំនួយភាគច្រើនបានមកពីប្រជាជនក្នុងតំបន់។
ក្រុមអ្នកជួយសង្គ្រោះមកពីអង្គការ White Helmets ដែលមានបទពិសោធជួយមនុស្សចេញពីគំនរបាក់រលំអស់រយៈពេលជាងមួយទសវត្សរ៍ក្នុងអំឡុងពេលសង្គ្រាមស៊ីវិលនៅប្រទេសស៊ីរី បានជួយសង្គ្រោះនៅទីក្រុង Jindayris ។
លោក Mohammed al-Kamel បាននិយាយថា “អ្នកជួយសង្គ្រោះក៏អាចក្លាយជាជនរងគ្រោះផងដែរ ដោយសារតែអគារទាំងនេះអាចបាក់បន្ថែមទៀតពេលប្រតិបត្តិការជួយសង្គ្រោះ”។លោកបានបន្ថែមថា “យើងទើបតែទាញសាកសព៣ចេញពីគំនរបាក់បែក ហើយយើងគិតថាមានគ្រួសារមួយនៅទីនោះដែលនៅរស់នៅឡើយ យើងនឹងបន្តធ្វើការ” ។តាមរបាយការណ៍នៅប្រទេសស៊ីរីមានអ្នកស្លាប់ជាង 3,000 នាក់ ដោយការរញ្ជួយដី។តួលេខនេះមិនរាប់បញ្ចូលអ្នកស្លាប់ក្នុងតំបន់កាន់កាប់ដោយក្រុមប្រឆាំងស៊ីរីទេ។
ប្រភព៖ BBC ថ្ងៃទី១០ ខែកុម្ភៈ ឆ្នាំ២០២៣
