យោងតាម AP ក្រសួងការពារជាតិអូស្ត្រាលីនឹងដកកាមេរ៉ាឃ្លាំមើលដែលផលិតដោយក្រុមហ៊ុនចិនចេញពីអគាររបស់ខ្លួន។ រដ្ឋាភិបាលអូស្រ្តាលីបាននិយាយកាលពីថ្ងៃព្រហស្បតិ៍ទី៩ កុម្ភៈ ២០២៣ បន្ទាប់ពីសហរដ្ឋអាមេរិក និងអង់គ្លេសបានធ្វើស្រដៀងគ្នានេះដែរ។
កាសែតអូស្ត្រាលីបានរាយការណ៍កាលពីថ្ងៃព្រហស្បតិ៍ទី៩ កុម្ភៈ ថាយ៉ាងហោចណាស់មានកាមេរ៉ាសុវត្ថិភាព913 ប្រព័ន្ធintercoms និងឧបករណ៍ថតវីដេអូផ្សេងទៀត ដែលផលិតដោយក្រុមហ៊ុនចិន Hikvision និង Dahua ដែលមាននៅក្នុងការិយាល័យរដ្ឋាភិបាល និងទីភ្នាក់ងារអូស្ត្រាលី រួមទាំងនាយកដ្ឋានការពារជាតិ និងក្រសួងការបរទេស និងពាណិជ្ជកម្ម ។
ក្រុមហ៊ុនផលិតកាមេរ៉ាសុវត្ថិភាពឈ្មោះHikvision និង Dahua ជាកម្មសិទ្ធិរបស់រដ្ឋាភិបាលចិន។ស្ថានទូតចិនប្រចាំប្រទេសអូស្ត្រាលីមិនបានឆ្លើយតបភ្លាមៗចំពោះសំណើនេះទេ។ ជាធម្មតាប្រទេសចិននឹងឆ្លើយតបការពារក្រុមហ៊ុនបច្ចេកវិទ្យារបស់ខ្លួនក្នុងនាមជាសាជីវកម្មស៊ីវិលដ៏ល្អដែលអនុវត្តតាមច្បាប់ក្នុងស្រុកទាំងអស់ ហើយមិនចូលរួមក្នុងការប្រមូលទិន្នន័យស៊ើបការណ៍ឱ្យរដ្ឋាភិបាលចិន ឬគណបក្សកុម្មុយនិស្តចិនឡើយ។
រដ្ឋាភិបាលសហរដ្ឋអាមេរិកបាននិយាយកាលពីខែវិច្ឆិកា ២០២២ថា ខ្លួនកំពុងហាមឃាត់ការប្រើឧបករណ៍ថតវីដេអូឃ្លាំមើលពីម៉ាកល្បីៗរបស់ចិន រួមមាន Hikvision និង Dahua ដើម្បីការពារបណ្តាញសុវត្ថិភាពរបស់សហរដ្ឋអាមេរិក។កាមេរ៉ាសុវត្ថិភាពដែលផលិតដោយក្រុមហ៊ុន Hikvision ក៏ត្រូវបានហាមមិនឱ្យប្រើក្នុងអគាររដ្ឋាភិបាលអង់គ្លេសផងដែរកាលពីខែវិច្ឆិកា ឆ្នាំ២០២២។
រដ្ឋមន្ត្រីក្រសួងការពារជាតិអូស្រ្តាលី លោក Richard Marles បាននិយាយថា ក្រសួងរបស់លោកកំពុងវាយតម្លៃឧបករណ៍បច្ចេកវិទ្យាឃ្លាំមើលទាំងអស់។លោកMarles បានប្រាប់ Australian Broadcasting Corp ថា “កន្លែងដែលបំពាក់កាមេរ៉ាទាំងនោះនឹងត្រូវដកចេញ” ។លោកMarles បានបន្ថែមថា “មានបញ្ហានៅទីនេះ ហើយយើងនឹងដោះស្រាយវា” ។ក្រុមអ្នកត្រួតពិនិត្យអូស្ត្រាលីបានរកឃើញថា កាមេរ៉ា សុវត្ថិភាពផលិតដោយក្រុមហ៊ុនHikvision និងDahua និងឧបករណ៍សុវត្ថិភាពផ្សេងទៀតត្រូវបានបំពាក់នៅស្ទើរតែគ្រប់កន្លែង លើកលែងតែក្រសួងកសិកម្ម និងខុទ្ទកាល័យនាយករដ្ឋមន្ត្រី និងគណៈរដ្ឋមន្ត្រី។
ទីភ្នាក់ងារ ABC បានរាយការណ៍ថា វិមានអនុស្សាវរីយ៍សង្រ្គាមអូស្ត្រាលី និងភ្នាក់ងារធានារ៉ាប់រងពិការភាពជាតិបាននិយាយថា ពួកគេនឹងដកកាមេរ៉ាចិនដែលបានបំពាក់នៅកន្លែងរបស់ពួកគេចេញ។
អ្នកនាំពាក្យសន្តិសុខប្រព័ន្ធអ៊ីនធឺណិតលោក James Paterson បាននិយាយថា លោកបានជំរុញឱ្យមានការត្រួតពិនិត្យតាមដានរយៈពេលប្រាំមួយខែពីទីភ្នាក់ងារសហព័ន្ធនីមួយៗ បន្ទាប់ពីនាយកដ្ឋានកិច្ចការផ្ទៃក្នុងមិនអាចនិយាយបានថា តើមានកាមេរ៉ាប៉ុន្មាន ត្រូវបានដំឡើងនៅក្នុងអគាររដ្ឋាភិបាល។
លោក Paterson បាននិយាយថា “យើងត្រូវការផែនការបន្ទាន់ពីរដ្ឋាភិបាលអូស្រ្តាលី ដើម្បីដកឧបករណ៍ទាំងនេះចេញពីអគាររដ្ឋាភិបាល និងទីភ្នាក់ងាររដ្ឋាភិបាលអូស្ត្រាលី” ។លោកបានបន្តថា ក្រុមហ៊ុនទាំងពីរស្ថិតក្រោមច្បាប់ស៊ើបការណ៍ជាតិរបស់ប្រទេសចិន ដែលតម្រូវឱ្យពួកគេសហការជាមួយទីភ្នាក់ងារស៊ើបការណ៍សម្ងាត់ចិន។
លោក Paterson បាននិយាយថា “យើងមិនមានវិធីដឹងថាតើព័ត៌មានរសើប រូបភាព និងសំឡេងដែលប្រមូលបានដោយឧបករណ៍ទាំងនេះត្រូវបានបញ្ជូនត្រឡប់ទៅប្រទេសចិនដោយសម្ងាត់ប្រឆាំងនឹងផលប្រយោជន៍អូស្ត្រាលីយ៉ាងណានោះទេ”។
ប្រភព៖ AP ថ្ងៃទី ៩ ខែកុម្ភៈ ឆ្នាំ ២០២៣
