ពិធីអបអរសាទរទិវាជនពិការកម្ពុជាលើកទី១៧ និងទិវាជនពិការអន្តរជាតិលើកទី៣៣ ឆ្នាំ ២០១៥ បានប្រារព្ធទ្បើងក្រោមប្រធានបទ រួមគ្នាបង្កលក្ខណៈងាយស្រួលដល់ជនពិការ ដើម្បី បរិស្ថានគ្មានពិការរភាព។ ទិវានេះបានធ្វើឡើងនៅវិទ្យាស្ថានជាតិអប់រំ នាថ្ងៃទី០៧ ខែធ្នូ ឆ្នាំ២០១៥ នេះ។
រាជរដ្ឋាភិបាលកម្ពុជាបានជំរុញទៅគ្រប់ស្ថាប័នទាំងអស់ រួមគ្នាដោះស្រាយបញ្ហាប្រឈមរបស់ជនពិការ ដែលកំពុងតែជួបប្រទះសព្វថ្ងៃ ដើម្បីជាការរួមចំណែកក្នុងលើកកម្ពស់ សិទ្ធិជនពិការ។
ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច លោកស្រី ម៉ែន សំអន បានថ្លែងក្នុងពិធីប្រារព្ធទិវាជនពិការកម្ពុជាលើកទី១៧ និងទិវាជន ពិការអន្តរជាតិលើកទី៣៣ នៅវិទ្យាស្ថានអប់រំ ព្រឹកថ្ងៃទី០៧ ខែធ្នូ ឆ្នាំ២០១៥នេះថា គ្រប់ ស្ថាប័នពាក់ព័ន្ធទាំងអស់ ដែលធ្វើការងារលើកកម្ពស់ជនពិការ ត្រូវតែចូលរួមដោះស្រាយ បញ្ហាប្រឈមរបស់ជនពិការ ដើម្បីជាការជួយសម្រួលទៅដល់ជនពិការ ឲ្យអាចចូលរួមចំណែកក្នុងការងារសង្គម។
«ខ្ញុំសូមមានសំណូមពរក៏ដូចជាធ្វើការអំពាវនាវដូចខាងក្រោម៖ ទី០១ គ្រប់ក្រសួង ស្ថាប័នព្រមទាំងអាជ្ញាធរមានសមត្ថកិច្ចគ្រប់លំដាប់ថ្នាក់ ត្រូវរៀបចំការបង្កលក្ខណៈងាយ ស្រួលចេញចូលនៅទីកន្លែងសាធារណៈសម្រាប់ជនពិការគ្រប់ប្រភេទគ្រប់ទម្រង់…»។
ទាក់ទងនឹងរឿងនេះដែរ លោកងិន សៅរ័ត្ន នាយកប្រតិបត្តិអង្គការជនពិការកម្ពុជា ថ្លែងតប ក្រោយបញ្ចប់វេទិការថា ការជំរុញរបស់រដ្ឋាភិបាលជារឿងល្អមួយ ។ ប៉ុន្ដែលោកមានចម្ងល់ថា តើប្រសាសន៍ ឬក៏អនុសាសន៍ ដែលរាជរដ្ឋាភិបាលលើកឡើងនេះ អាចឲ្យថ្នាក់ក្រោមជាតិ អនុវត្តបានកម្រិតណា។
«ខ្ញុំគិតថា នេះវាជារឿងល្អមួយ ប៉ុន្ដែអ្វីដែលខ្ញុំព្រួយបារម្ភ គឺថ្នាក់ខាងក្រោមអត់បាន អនុវត្តនូវប្រសាសន៍របស់លោកជំទាវ ក៏ដូចជាប្រសាសន៍របស់សម្ដេចនាយករដ្ឋមន្ដ្រី ។ អ៊ីចឹង យើងបារម្ភថា ជនពិការរបស់យើងនឹងបាត់បង់សិទ្ធិដដែល»។
ជាមួយគ្នានេះ នាយកប្រតិបត្តិអង្គការជនពិការកម្ពុជា ក៏បានលើកឡើងបន្ថែមថា ប្រសិនបើ ចង់ឲ្យប្រមុខរដ្ឋាភិបាល ឬក៏ប្រសាសន៍របស់ប្រមុខរដ្ឋាភិបាល មានប្រសិទ្ធភាព លុះណាតែអ្នកនៅខាងក្រោមអនុវត្តតាមអនុសាសន៍របស់រាជរដ្ឋាភិបាល ទើបជនពិការបានទទួលសិទ្ធិសេរីភាព។
«ឥឡូវយើងមើលឃើញស្រាប់ហើយថា អគារនៅទីនេះក្ដី អត់ទាន់មានជម្រាល ឲ្យបងប្អូនជនពិការទេ វាមានន័យថា ស្ទើរតែ៩០ភាគរយ អត់ទាន់មានជម្រាល ដល់បងប្អូនជនពិការ ។ អ៊ីចឹងទេ ដើម្បីឲ្យអនុសាសន៍ហ្នឹង ក្លាយជាការពិត ដរាបណាអ្នកតាក់តែងគោលនយោបាយហ្នឹង មានកញ្ចប់ថវិកា និងការអនុវត្ត ហើយអនុវត្តតាម ប្រសាសន៍របស់ប្រមុខរដ្ឋាភិបាល ។ តែបើសិនជាគាត់អត់នាំគ្នាគោរពតាម ប្រសាសន៍របស់រាជរដ្ឋាភិបាលទេ មានន័យថា ប្រសាសន៍ អនុសាសន៍ល្អៗមែន ប៉ុន្ដែជនពិការយើងនៅតែបាត់បង់ឱកាស។ អ៊ីចឹងជនពិការយើង អត់អាចទទួលបានសិទ្ធិស្មើភាពគ្នាទេ ប្រសិនបើ ពួកគាត់ នៅថ្នាក់ក្រោម មិនព្រមនាំគ្នាអនុវត្តសិទ្ធិរបស់បងប្អូនជនពិការរបស់យើងបា៎ទ» ។
សូមជម្រាបថា ក្នុងវេទិកាទិវាជនពិការកម្ពុជាលើកទី១៧ និងទិវាជនពិការអន្ដរជាតិ លើកទី៣៣ នៅវិទ្យាស្ថានជាតិអប់រំថ្ងៃនេះ រាជរដ្ឋាភិបាលកម្ពុជា បានដាក់ចេញនូវអនុសាសន៍៧ចំណុច ដើម្បីឲ្យស្ថាប័នពាក់ព័ន្ធ ចូលរួមដោះស្រាយពីបញ្ហាប្រឈមរបស់ជនពិការ ។ អនុសាសន៍ទាំង៧ចំណុចនោះរួមមាន ការស្នើឲ្យគ្រប់ក្រសួងស្ថាប័ន ព្រមទាំងអាជ្ញាធរមាន សមត្ថកិច្ចគ្រប់លំដាប់ថ្នាក់ ត្រូវររៀបចំកន្លែងចេញចូលនៅទីកន្លែងសាធារណៈ សម្រាប់ ជនពិការគ្រប់ប្រភេទ ដូជា ការរៀបចំណតយានយន្ដ និងការធ្វើជម្រាល ការបំពាក់ ឧបករណ៍ធ្នាក់ដៃនៅតាមបន្ទប់ទឹក ការដាក់ស្លាកសញ្ញានានានៅតាមក្រសួង ស្ថាប័ន មន្ទីរ ផ្លូវថ្នល់ ទីកន្លែងលំហែកាយ មជ្ឈមណ្ឌលវប្បធម៌ កន្លែងលេងកីឡា កន្លែងកម្សាន្ដ គ្រឹះស្ថានអប់រំ សណ្ឋាគារ មន្ទីរពេទ្យ មជ្ឈមណ្ឌល សុខភាព និងមធ្យោបាយដឹកជញ្ជូន ជាដើម ៕
