ក្រុមគ្រួសារសកម្មជននិងមន្ត្រី អតីតគណបក្សសង្គ្រោះជាតិ ក្រោយសាលាដំបូងរាជធានីភ្នំពេញផ្ដន្ទាទោស ស្វាមីរបស់ខ្លួន រួមនិងថ្នាក់ដឹកនាំ អតីតគណបក្សសង្គ្រោះជាតិសរុបចំនួន៣៦នាក់ឱ្យជាប់ពន្ធនាគារ ពួកគាត់បានយំស្រែកនៅមុខតុលាការថា តុលាការបានកាត់ក្ដីដាក់ទោសស្វាមីពួកគាត់ទាំងអយុត្តិធម៌។
លោក គីម ចាន់ចាវ រាយការណ៍
អ្នកស្រី ទៀង ចិន្តា ដែលត្រូវជាភរិយាសកម្មជនអតីតគណបក្សសង្គ្រោះជាតិ លោក វឿង សំណាង បានយំរៀបរាប់ ជាមួយកូនស្រី និងភរិយាសកម្មជនផ្សេងទៀត ប្រាប់អ្នកសារព័ត៌មាននៅមុខសាលាដំបូងរាជធានីភ្នំពេញថាស្វាមីអ្នកស្រីមិនបានធ្វើអ្វីខុសសោះ តែបែរតុលាការកាត់ទោសឱ្យជាប់ពន្ធនាគារ ៥ឆ្នាំ ទាំងអយុត្តិធម៌។ រយៈពេល២ឆ្នាំដែលស្វាមីជាប់ពន្ធនាគារ គឺអ្នកស្រីជួបការលំបាកច្រើន ដោយកូនស្រីនៅតូចនៅកំពុងរៀន។ អ្នកស្រីហាក់មិនរំពឹងសោះថាការប្ដឹងបន្តអាចឱ្យតុលាការដោះលែងស្វាមីអ្នកស្រី និងសម្មជនផ្សេងឡើយ។
«ខ្ញុំធ្វើម៉េចទៅ? ខ្ញុំពឹងអីទៀត? លើកអើយ អយុត្តិធម៌ណាស់! ដាក់៥ឆ្នាំពេញ អយុត្តិធម៌ណាស់។ ឡើងឧទ្ធរណ៍ឡើងហើយលែងគាត់វិញអត់ លែងទៅ អយុត្តិធម៌ណាស់»
តែពីរនាក់ម៉ែកូន ប្ដីជាប់ពន្ធនាគារ៥ឆ្នាំ ខ្ញុំពឹងអី?»
សាលាដំបូងរាជធានីភ្នំពេញ បានសម្រេចផ្ដន្ទាទោសថ្នាក់ដឹកនាំ និងសកម្មជន អតីតគណបក្សសង្គ្រោះជាតិចំនួន៣៧នាក់ឱ្យជាប់ពន្ធនាគារ ពី ៥ឆ្នាំ ដល់ ៧ឆ្នាំ ក្រោមបទចោទប្រកាន់ «រួមគំនិតក្បត់» ពាក់ព័ន្ធនឹងគម្រោងវិលចូលស្រុករបស់អ្នកស្រី មូរ សុខហួរ កាលពីដើមខែមករា ឆ្នាំ២០២១។
តាមស្មារតីនៃការសម្រេចរបស់តុលាការនៅថ្ងៃទី២២ ខែធ្នូ ក្នុងចំណោមជនជាប់ចោទទាំង៣៧នាក់នេះ មានសកម្មជនបីនាក់ កំពុងជាប់ឃុំក្នុងពន្ធនាគារព្រៃស រួមមាន លោក ខាន់ ប៊ុនផេង លោក គង់ ម៉ាស់ និងលោក វឿង សំណាង។ អ្នកទាំង៣ និងសកម្មជន២២នាក់ទៀត ត្រូវបានតុលាការកាត់ទោសឱ្យជាប់ពន្ធនាគារ៥ឆ្នាំ។ចំណែកថ្នាក់ដឹកនាំជាន់ខ្ពស់និងសមាជិកអតីតបក្សប្រឆាំង១១នាក់ផ្សេងទៀត ដែលភាគច្រើនកំពុងភៀសខ្លួននៅក្រៅប្រទេស រួមមាន លោក សម រង្សី និងភរិយាលោកស្រី ជូឡុង សូម៉ូរ៉ា អ្នកស្រី មូរ សុខហួរ លោក អេង ឆៃអ៊ាង លោក ម៉ែន សុថាវរិន្ទ លោក ហូរ វ៉ាន់ លោក ឡុង រី ជាដើម ត្រូវបានតុលាការកាត់ទោសឲ្យជាប់ពន្ធនាគារ៧ឆ្នាំ ខណៈដែលថ្នាក់ដឹកនាំដែលកំពុងភៀសខ្លួននៅក្រៅប្រទេសទាំងនោះ អ្នកខ្លះកំពុងតែមានទោសស្រាប់ទោសលើករណីផ្សេងទៀតទៅហើយនោះ។ ជនជាប់ឃុំដែលកំពុងត្រូវបានតុលាការបញ្ជូនទៅពន្ធនាគារ បានចាត់ទុកការផ្តន្ទាទោសនេះ ថា ជារឿងអយុត្តិធម៌មិនអាចទទួលយកបានឡើយ៕
