តាមសារព័ត៌មាន BBC បានឱ្យដឹងថា គោលនយោបាយសូន្យកូវីដ១៩ (zero-covid) របស់ចិន បានបង្កឱ្យមានភាពវឹកវរយ៉ាងខ្លាំងក្នុងប្រទេស ដោយមានការប្រឆាំងតវ៉ាពីសំណាក់ប្រជាពលរដ្ឋ ហើយថែមទាំងបង្កជាវិបត្តិសេដ្ឋកិច្ចទៀតផង។
ជុំវិញករណីផ្ទុះការបិទខ្ទប់ក្នុងប្រទេសចិនកើតមានឡើង ប្រជាពលរដ្ឋ និងក្រុមហ៊ុនជាច្រើនមានការភ័យខ្លាច និងស្ទាក់ស្ទើរក្នុងការចំណាយ។ សូម្បីតែ វិបត្តិអចលនទ្រព្យ និងការបង្រ្កាបលើបច្ចេកវិទ្យាធំៗ ក៏កំពុងក្លាយជាបន្ទុកដ៏ធ្ងន់ធ្ងរមួយសម្រាប់ប្រទេសចិន ពោលគឺប្រទេសដែលមានសេដ្ឋកិច្ចធំមួយ ដែលឈរនៅលំដាប់ទីពីរក្នុងពិភពលោក។
ផ្ទុយទៅវិញ គោលនយោបាយសូន្យកូវីដ១៩ បានបន្តធ្វើឱ្យទីផ្សារ និងអ្នកវិនិយោគ មានភាពរង្គោះរង្គើ សូម្បីតែតំបន់មួយចំនួន និងពិភពលោកផ្សេងទៀតកំពុងតែលើកយកប្រធានបទនេះមកពិភាក្សា។
យោងតាមប្រភពដដែលបានឱ្យដឹងបន្ថែមថា ការបិទខ្ទប់ និងការតេស្តកូវីដទ្រង់ទ្រាយធំនៅក្នុងមជ្ឈមណ្ឌលផលិតកម្មរបស់ប្រទេសចិន បានប៉ះពាល់ដល់សង្វាក់ផលិតកម្មសម្រាប់ម៉ាកយីហោថ្មីៗក្នុងពិភពលោកដែលមានដូចជា Apple និង Tesla ។
សូមបញ្ជាក់ថា អ្នកវិនិយោគហាក់មានក្តីសង្ឈឹមតិចតួចបំផុត ចំពោះយុទ្ធនាការចាក់វ៉ាក់សាំងបង្ការជំងឺកូវីដ១៩ដល់ប្រពលរដ្ឋចិនឱ្យបានគ្រប់ៗគ្នា។ អ្នកវិនិយោគទាំងនោះយល់ថា ស្ថានភាពក្នុងប្រទេសចិននឹងមិនអាចមានភាពល្អប្រសើរឡើងវិញ ក្នុងពេលឆាប់ៗនេះឡើយ។
តាមការរាយការណ៍បន្ថែមពីសារព័ត៌មាន BBC ថា បញ្ហានេះទំនងជាមានផលប៉ះពាល់ខ្លាំងសម្រាប់ប្រជាជនចិនក្នុងរយៈពេលវែង រួមទាំងការអភិវឌ្ឍន៍ និងសេដ្ឋកិច្ចរបស់ពួកគេ។ លើសពីនេះ វាអាចប៉ះពាល់ដល់សេដ្ឋកិច្ចពិភពលោក ដែលពឹងផ្អែកខ្លាំងលើប្រទេសចិន៕
ប្រភព៖ BBC ថ្ងៃចន្ទ ទី២៨ ខែវិច្ឆិកា ឆ្នាំ២០២២
