សម្ដេច ទៀ បាញ់ រដ្ឋមន្ដ្រីក្រសួងការពារជាតិកម្ពុជា បាននិយាយថា ទំនាក់ទំនងយោធារវាងកម្ពុជា និងសហរដ្ឋអាមេរិក បានស្ថិតនៅក្នុងដំណាក់កាលលំបាកមួយ។ ការថ្លែងរបស់មេដឹកនាំកងទ័ពកម្ពុជារូបនេះ ក្នុងជំនួបរដ្ឋមន្ដ្រីការពារជាតិអាមេរិក ឡូយ អូសស្ទីន នៅថ្ងៃទី២២ ខែ វិច្ឆិកា ឆ្នាំ២០២២ មុនមួយថ្ងៃនៃកិច្ចប្រជុំរដ្ឋមន្ដ្រីការពារជាតិអាស៊ាន។ នេះបើយោងទៅតាមវេបសាយក្រសួងការពារជាតិ។
សម្ដេច ទៀ បាញ់ បានបន្ថែមថា ប្រសិនបើយើងយល់ឃើញថាកិច្ចសហប្រតិបត្តិការ រវាងកងទ័ពទាំងពីរមានសារៈសំខាន់ យើងត្រូវតែស្វែងរកមធ្យោបាយដ៏ល្អបំផុត សំរាប់ការយោគយល់គ្នា និងគោរពផលប្រយោជន៍គ្នាទៅវិញទៅមក។
បើតាមប្រភពក្រសួងការពារជាតិកម្ពុជាដដែលលោក ឡយ អូសស្ទីន បានបញ្ជាក់ថា៖ សហរដ្ឋអាមេរិកគាំទ្រជំហររបស់អាស៊ាន ហើយបន្តសម្ព័ន្ធមិត្តបន្តទៅទៀត នៅក្នុងតំបន់។ ប្រភពបន្ដថា សហរដ្ឋអាមេរិកបន្តការគាំទ្រចំពោះការខិតខំរបស់ប្រជាពលរដ្ឋខ្មែរ ដែលមានបំណងរក្សាសន្តិភាព។
ក្រសួងការពារជាតិបញ្ជាក់ថា កម្ពុជា និង សហរដ្ឋអាមេរិក មិនមានបញ្ហាអ្វីទេចំពោះការមិនយល់ និងមិនចុះសម្រុងគ្នា យើងនឹងពិភាក្សាគ្នារកដំណោះស្រាយ។
សូមជម្រាបថា ទំនាក់ទំនងកម្ពុជា អាមេរិក ក្នុងរយៈពេលប៉ុន្មានឆ្នាំនេះបានចុះថយ ក្រសួងរំលេចថាមិនត្រឹមតែបញ្ហាសិទ្ធិមនុស្ស និងលទ្ធិប្រជាធិបតេយ្យប៉ុណ្ណោះទេ ប៉ុន្តែក៏មកពីការខ្វះខាតនូវតម្លាភាពផងដែរ។
ទាក់ទងទៅនឹងមូលដ្ឋានយោធារបស់ចិននៅកម្ពុជាត្រូវបាន រដ្ឋមន្ត្រីការពារជាតិអាមេរិក ចាត់ទុកថាជាការគំរាមកំហែងដល់ផលប្រយោជន៍ សន្តិសុខសហរដ្ឋអាមេរិក និងសន្តិសុខសម្ព័ន្ធមិត្តរបស់អាមេរិកនៅក្នុងតំបន់។ សហរដ្ឋអាមេរិកចង់ស្ដារឡើងវិញនូវទំនាក់ទំនងការពារជាតិ រវាងប្រទេសទាំងពីរឡើងវិញប៉ុន្តែតម្លាភាពគឺ ជាបញ្ហាដ៏សំខាន់បំផុត។ នេះបើតាមក្រសួងការពារជាតិកម្ពុជាដដែល៕
