សេអ៊ូល៖ យោងតាម Reuters ក្រសួងការពារជាតិកូរ៉េខាងត្បូងបាននិយាយនៅថ្ងៃសុក្រថា ខ្លួនកំពុងចរចាដើម្បីលក់គ្រាប់កាំភ្លើងធំអោយសហរដ្ឋអាមេរិកដែលជាអ្នកផ្គត់ផ្គង់អាវុធដ៏សំខាន់ដល់អ៊ុយក្រែន។
ក្រសួងការពារជាតិកូរ៉េបានចេញសេចក្តីថ្លែងការណ៍ថា ជំហររបស់កូរ៉េខាងត្បូងមិនផ្លាស់ប្តូរទេក្នុងការមិនផ្តល់ជំនួយមានលក្ខណៈកាចសាហាវដល់អ៊ុយក្រែន។
សេចក្តីថ្លែងការណ៍បានថ្លែងថា “ដើម្បីបំពេញភាពខ្វះខាតគ្រាប់កាំភ្លើងធំ 155mm នៅសហរដ្ឋអាមេរិក ការចរចារវាងក្រុមហ៊ុនអាមេរិកនិងក្រុមហ៊ុនកូរ៉េកំពុងបន្តដើម្បីនាំចេញគ្រាប់រំសេវ” ។ “នេះគឺជាការសន្មត់ថាសហរដ្ឋអាមេរិកគឺជាអ្នកប្រើចុងក្រោយ។”
កាសែត Journal បាននិយាយថា កិច្ចព្រមព្រៀងនេះតម្រូវឱ្យសហរដ្ឋអាមេរិកទិញគ្រាប់កាំភ្លើងធំ155
មីលីម៉ែត្រចំនួន100,000គ្រាប់(១០ម៉ឺនគ្រាប់)ដែលនឹងបញ្ជូនទៅឱ្យអ៊ុយក្រែន។ប្រធានាធិបតីអ៊ុយក្រែនលោក Volodymyr Zelenskiy បានអំពាវនាវឱ្យកូរ៉េខាងត្បូងផ្តល់អាវុធ ដែលលោកបាននិយាយថា “មិនអាចខ្វះបាន” ។
កាលពីខែមុន ប្រធានាធិបតីកូរ៉េខាងត្បូង Yoon Suk-yeol បាននិយាយថា ទីក្រុងសេអ៊ូលមិនបានផ្តល់អាវុធដ៍សាហាវណាមួយដល់អ៊ុយក្រែនទេ បន្ទាប់ពីប្រធានាធិបតីរុស្ស៊ីលោក Vladimir Putin បាននិយាយថាការសម្រេចចិត្តបែបនេះនឹងបំផ្លាញទំនាក់ទំនងទ្វេភាគី។កូរ៉េខាងត្បូងជាសម្ព័ន្ធមិត្តអាមេរិក ព្យាយាមជៀសវាងមានជម្លោះជាមួយរុស្ស៊ី ទាំងហេតុផលសេដ្ឋកិច្ច និងហេតុផលឥទ្ធិពលក្រុងម៉ូស្គូមកលើកូរ៉េខាងជើង។
អ្នកនាំពាក្យសន្តិសុខជាតិអាមេរិក លោក John Kirby បាននិយាយកាលពីសប្តាហ៍មុនថា ក្រុងវ៉ាស៊ីនតោនមានព័ត៌មានថា កូរ៉េខាងជើងកំពុងផ្គត់ផ្គង់គ្រាប់កាំភ្លើងធំអោយរុស្ស៊ីដោយសម្ងាត់សម្រាប់ប្រើប្រាស់ក្នុងប្រទេសអ៊ុយក្រែន។
ប្រភព៖ Reuters ចុះថ្ងៃទី១១ ខែវិច្ឆិកា ឆ្នាំ២០២២
