ភ្នំពេញ៖ ទំព័រហ្វេសប៊ុករបស់ក្រសួងសាធារណការ និងដឹកជញ្ជូន ចេញសេចក្តីជូនដំណឹងថា ចាប់ពីថ្ងៃទី០១ ខែវិច្ឆិកាឆ្នាំ២០២២នេះតទៅ អ្នកបើកបរលើផ្លូវល្បឿនលឿន ភ្នំពេញ-ក្រុងព្រះសីហនុ ត្រូវបង់ប្រាក់តាមចម្ងាយជាក់ស្តែង។
ក្រសួងសាធារណការ និងដឹកជញ្ជួន នៅថ្ងៃទី០១ ខែវិច្ឆិកាឆ្នាំ២០២២ នេះបានចេញសេចក្តីជូនដំណឹង ពីការយកកម្រៃថ្លៃយានយន្តធ្វើដំណើរលើផ្លូវល្បឿនលឿន ភ្នំពេញ-ក្រុងព្រះសីហនុ។
សម្រាប់តារាងកម្រៃលម្អិតត្រូវគិតតាមចម្ងាយ និងប្រភេទយានយន្តយោងតាមអត្រាថ្លៃធ្វើដំណើរដែលបានគិតបញ្ចុះតម្លៃត្រឹម ៨០% និងការគិតតម្លៃពេញ ១០០%៖
សម្រាប់ការបើកបរគិតតម្លៃ ៨០% ត្រូវចាប់ផ្តើមអនុវត្តនៅថ្ងៃទី០១ ខែវិច្ឆិកាឆ្នាំ២០២២នេះ រហូតដល់ថ្ងៃទី៣១ ខែតុលា ឆ្នាំ២០២៣។ ចំណែក តម្លៃពេញគិតចាប់ពីថ្ងៃទី០១ ខែវិច្ឆិកា ឆ្នាំ២០២៣ឡើងទៅ។
ចំពោះយានយន្តប្រភេទ A រួមមាន ទោចក្រយានយន្តកម្លាំងចាប់ពី ៥០០cc រថយន្តប្រភេទគ្រួសារ ៧កៅអីចុះក្រោម និងរថយន្តផ្ទុកទំនិញ ក្រោម ២តោន ត្រូវបង់ជាង ២៦០រៀល/១គីឡូម៉ែត្រ សម្រាប់ការគិតតម្លៃ៨០%។ ចំណែកតម្លៃពេញ១០០% អ្នកបើកបរយានយន្តប្រភេទ A ត្រូវបង់ប្រាក់ជាង ៣០០រៀល/១គីឡូម៉ែត្រ។
ចំពោះរថយន្តប្រភេទ B រួមមាន រថយន្តដឹកអ្នកដំណើរចាប់ពី ៨ កៅអី និង ១៩ កៅអីនិងរថយន្តដឹកទំនិញ ផ្ទុកទំនិញចាប់ពី ២ តោនដល់ ៥តោន ត្រូវបង់៥០០រៀល/១គីឡូម៉ែត្រ សម្រាប់ការគិតតម្លៃ៨០% ។ហើយ ត្រូវបង់ជាង ៦៥០រៀល/១គីឡូម៉ែត្រពេលគិតតម្លៃពេញ។
មួយទៀតគឺរថយន្តប្រភេទC រួមមាន រថយន្តដឹកអ្នកដំណើរចាប់ពី២០កៅអី ដល់៥៦កៅអីនិងរថយន្តដឹកទំនិញ ផ្ទុកទំនិញចាប់ពី៥តោនដល់ ១០ តោន ត្រូវបង់ជិត៨០០រៀល/១គីឡូម៉ែត្រ សម្រាប់ការគិតតម្លៃ៨០% ។ហើយត្រូវបង់ជិត ៩០០រៀល/១គីឡូម៉ែត្រពេលគិតតម្លៃពេញ។
និងចុងក្រោយគឺរថយន្តប្រភេទ E រថយន្តដឹកទំនិញ ផ្ទុកទំនិញលើសពី២០តោនឡើងទៅ មានទាំងកុងតែន័រផង ត្រូវបង់តម្លៃជាង១៣០០រៀល/១គីឡូ ម៉ែត្រសម្រាប់ការគិតតម្លៃ៨០%។និងបង់ប្រហែល១៦០០រៀល/១គីឡូម៉ែត្រសម្រាប់តម្លៃពេញ។
សម្រាប់តារាងកម្រៃមានបិទនៅតាមផ្ទាំងព័ត៌មាន ច្រកចេញចូលផ្លូវល្បឿនលឿនផងដែរ។
តាមសេចក្តីជូនដំណឹងរបស់ក្រសួងសាធារណការឱ្យដឹងបន្ថែមថា រាល់យានយន្តចូលប្រើប្រាស់ផ្លូវល្បឿនលឿន ត្រូវមាន៖
– ផ្លាកលេខសម្គាល់យានយន្ត
– ត្រួតពិនិត្យលក្ខណៈបច្ចេកទេស (ឆៀក) មានសុពលភាព
– និងកាតព្វកិច្ចផ្សេងៗតាមច្បាប់ដែលបានកំណត់៕
