(វ៉ាស៊ីនតោន)៖ យោងតាម AP បានផ្សាយថាសេតវិមានបាននិយាយកាលពីថ្ងៃព្រហស្បតិ៍ថា កងទ័ពអ៊ីរ៉ង់ “បានចូលរួមដោយផ្ទាល់នៅលើដី” នៅតំបន់គ្រីមៀ និងបានគាំទ្រការវាយប្រហាររបស់រ៉ុស្ស៉ីដោយយន្តហោះគ្មានមនុស្សបើកទៅលើស្ថានីយ៍ថាមពលអ៊ុយក្រែន និងហេដ្ឋារចនាសម្ព័ន្ធសំខាន់ៗផ្សេងទៀត។សេតវិមានអះអាងថា ខ្លួនមានភស្តុតាងជាក់លាក់អំពីតួនាទីដ៏ស៊ីជម្រៅរបស់ទីក្រុងតេហេរ៉ង់ ក្នុងការជួយដល់ប្រទេសរុស្ស៊ី។
អ្នកនាំពាក្យក្រុមប្រឹក្សាសន្តិសុខជាតិអាមេរិក លោក John Kirby បានប្រាប់អ្នកយកព័ត៌មានថា អ៊ីរ៉ង់បានបញ្ជូនបុគ្គលិកជំនាញ “មួយចំនួនតូច” ទៅកាន់តំបន់គ្រីមេ ដើម្បីជួយដល់កងទ័ពរុស្ស៊ីក្នុងការប្រើប្រាស់ដ្រូនផលិតដោយអ៊ីរ៉ង់ប្រឆាំងនឹងអ៊ុយក្រែន។ យោងតាមរដ្ឋាភិបាលអង់គ្លេសបានឲ្យដឹងថា កងឆ្មាំបដិវត្តន៍អ៊ីរ៉ង់ត្រូវបានបញ្ជូនទៅជួយកងកម្លាំងរុស្ស៊ីក្នុងការប្រើប្រាស់យន្តហោះគ្មានមនុស្សបើក។ការលាតត្រដាងការសម្ងាត់របស់សហរដ្ឋអាមេរិកកើតឡើងនៅពេលដែលរដ្ឋបាលលោក Biden ស្វែងរកការដាក់សម្ពាធអន្តរជាតិលើទីក្រុងតេអេរ៉ង់បន្ថែមទៀត ខណៈដែលរុស្ស៉ីបានទម្លាក់គ្រាប់បែកលើជនស៊ីវិលអ៊ុយក្រែន ដោយមានជំនួយពីយន្តហោះគ្មានមនុស្សបើកដែលផលិតនៅប្រទេសអ៊ីរ៉ង់។ប្រធានាធិបតី Volodymyr Zelenskyy បាននិយាយនៅសប្តាហ៍នេះថា កងកម្លាំងរុស្ស៊ីបានបំផ្លាញស្ថានីយ៍ថាមពលចំនួន 30% របស់អ៊ុយក្រែន ចាប់តាំងពីថ្ងៃទី 10 ខែតុលា។
លោក Kirby បាននិយាយថា “ព័ត៌មានដែលយើងទទួលបានគឺអ៊ីរ៉ង់បានបញ្ជូនគ្រូបណ្តុះបណ្តាល និងជំនួយផ្នែកបច្ចេកទេសទៅតំបន់ Crimea ប៉ុន្តែកងទ័ពរុស្ស៊ីជាអ្នកបញ្ជាយន្តហោះដ្រូនទាំងនោះដោយខ្លួនឯង”។លោកបានបន្ថែមថា រដ្ឋបាលលោក Biden កំពុងសម្លឹងមើលការដាក់ទណ្ឌកម្មថ្មីលើទីក្រុង Tehran និងស្វែងរកមធ្យោបាយទប់ស្កាត់អ៊ីរ៉ង់កុំអោយលក់អាវុធបែបនេះទៅឱ្យរុស្ស៊ី។សហរដ្ឋអាមេរិកបានលាតត្រដាងជាលើកដំបូងថា រុស្ស៊ីកំពុងទិញយន្តហោះគ្មានមនុស្សបើករបស់អ៊ីរ៉ង់ដើម្បីប្រឆាំងអ៊ុយក្រែន។ តែអ៊ីរ៉ង់បានបដិសេធថាមិនបានលក់អាវុធឲ្យរុស្ស៊ីទេ។
ឧត្តមសេនីយ Pat Ryder លេខាធិការព័ត៌មានរបស់មន្ទីរបញ្ចកោណ បានប្រាប់អ្នកសារព័ត៌មានថា ប្រសិនបើរុស្ស៊ីរកទិញយន្តហោះគ្មានមនុស្សបើកបន្ថែមទៀតពីអ៊ីរ៉ង់ មន្ត្រីយោធាអាមេរិក “នឹងមិនភ្ញាក់ផ្អើលទេ” ។ លោកប្រធានាធិបតីអ៊ុយក្រែនZelenskyy បាននិយាយកាលពីសប្តាហ៍មុនថា រុស្ស៊ីបានបញ្ជាទិញដ្រូនចំនួន 2,400គ្រឿងពីអ៊ីរ៉ង់។មន្ត្រីអាមេរិកជឿជាក់ថា អ៊ីរ៉ង់អាចនឹងដាក់ពង្រាយបុគ្គលិកយោធា ដើម្បីជួយដល់រុស្សីក្នុងការប្រើប្រាស់យន្តហោះគ្មានមនុស្សបើកដែលផលិតដោយអ៊ីរ៉ង់។ នៅអង្គការសហប្រជាជាតិក្នុងសប្តាហ៍នេះ អ៊ុយក្រែនបានចោទប្រកាន់អ៊ីរ៉ង់ថាបានរំលោភលើការហាមឃាត់របស់ក្រុមប្រឹក្សាសន្តិសុខលើការលក់យន្តហោះគ្មានមនុស្សបើកដែលមានសមត្ថភាពហោះហើរបានចម្ងាយ 300 គីឡូម៉ែត្រ។ រដ្ឋមន្ត្រីការបរទេសអង់គ្លេស លោក James Cleverly បាននិយាយនៅក្នុងសេចក្តីថ្លែងការណ៍មួយថា “ការវាយប្រហារដោយយន្តហោះគ្មានមនុស្សបើកទាំងនេះ គឺជាទង្វើនៃការអស់សង្ឃឹម” ។ «តាមរយៈការវាយប្រហារទាំងនេះ បុគ្គល និងក្រុមហ៊ុនផលិតអាវុធបានធ្វើឱ្យប្រជាជនអ៊ុយក្រែនរងទុក្ខដោយមិនដឹងខ្លួន។ យើងធានាថាពួកគេនឹងត្រូវទទួលខុសត្រូវចំពោះសកម្មភាពរបស់ពួកគេ»។
ប្រភព៖ AP ថ្ងៃទី ២១ ខែ តុលា ឆ្នាំ ២០២២
