ថ្ងៃទី១៩ ខែ តុលានេះ តុលាការបានបើបន្ដសំណុំរឿងលោក កឹម សុខា ដែលភាគីពាក់ព័ន្ធ ដាក់នូវសារណាការពារ និងការសន្និដ្ឋាន បន្ទាប់ពីតុលាការបានប្រកាសបិទបញ្ចប់ការសួរដេញដោលលើសំណុំរឿងទាំងមូល។ លោកស្រី ចក់ សុភាព នាយិកាប្រតិបត្តិនៃមជ្ឍមណ្ឌលសិទ្ធិមនុស្សកម្ពុជា គឺជាសាក្សីមួយរូប ដែលត្រូវបានតុលាការ សួរដេញដោលក្នុងឋានៈជាសាក្សីលើសំណុំរឿងលោក កឹម សុខាកាលពីថ្ងៃ១២ ខែតុលា ឆ្នាំ២០២២។
ក្រោយពេលបញ្ចប់ការសាកសួរ កាលពីថ្ងៃទី១២ តុលាកន្លងទៅ លោកស្រីបានស្នើសុំចៅក្រម បន្តអង្គុយស្តាប់សវនាការរហូតដល់ចប់ ហើយចៅក្រមក៏អនុញ្ញាតដល់លោកស្រី ដោយសារបានសាកសួរចប់សព្វគ្រប់ហើយ។
យ៉ាងណានៅថ្ងៃទី១៨ ខែតុលា លោកស្រីបានស្នើទៅតុលាការ ដើម្បីបានចូលរួមសង្កេតការណ៍ការជំនុំជម្រះបន្តនៅថ្ងៃនេះ តែខាងរដ្ឋបាលតុលាការមិនអនុញ្ញាតដល់ការស្នើសុំរបស់លោកស្រី ដោយសំអាងថា នាយិកាសិទ្ធិមនុស្សរូបនេះជាសាក្សី។ លោកស្រីចោទជាសំនួរថា ចុះខាងចៅក្រមលោកអនុញ្ញាតឱ្យខ្ញុំអង្គុយស្តាប់ដល់ចប់កាលពីរសៀលថ្ងៃទី១២ តើយ៉ាងដូចម្តេចវិញ?
ក្នុងនាមលោកស្រី ចក់ សុភាពជាអ្នកធ្វើការលើរឿងសិទ្ធិមនុស្សបានបញ្ជាក់ថាជាទូទៅ ពេលសង្កេតការណ៍ ករណីផ្សេងៗកន្លងមក គឺសាក្សីត្រូវបានអនុញ្ញាតឱ្យស្ថិតនៅក្នុងសវនាការបាន បន្ទាប់ពីត្រូវបានសួរដេញដោលរួចរាល់ហើយ៕
